[2ana 7or]

المشاركة الأصلية بواسطة 3nter

يا Mrs 2ana 7or

انا لاادافع عن السعوديه والسعوديين ولا الوليد بن طلال لشخصه
كل اللى بقوله ان ممكن نشكر بدل ما نهاجم على طول
انا مسلم آه بس ماعندى ذره من التعصب لأى دين كان
الكل عندى سواسيه طالما الشخص كويس معايا
اما عن دينه فهو بينه وبين الرب ليس لى اى سبب للتدخل فى هذه العلاقه
مش ملاحظه ان لا اتدخل او ازعل من اى واحد يشتم الاسلام
او نبي الاسلام محمد(صلعم)
خللى اللى يشتم يشتم لا الشتيمه راح تقلل من احترامى لنبينا او المدح راح يزيد من احترامى له
جايز اللى بيشتم ده مش لاقى طريقه غير الشتيمه كى يحتج بها
واى واحد يشعر بالظلم من حقه ان يطلق صرخه احتجاج بالطريقه التى يراها مناسبه اوالمتاحه له
انا معاكى ان فيه كتير من المسلمين خساره فيهم الحرق بالجاز
وانتم كمسيحيين معكم حق بس هناك بينكم بن لادن مسيحي والزرقاوى مسيحي وعمر عبد الرحمن مسيحي وعمر عبد الكافى مسيحي
فاهمه قصدى؟
ايه يعنى بت حبت واد واسلمت ك ل ب ه وغارت او واحد استنصر ك ل ب وغار
اللي يبيع دينه ما يستاهل حتى الواحد يجيب سيرته
سمعت مره واحد من الجماعه اياهم بيقول ان حرام تدى لواحد مسيحى حسنه
عليا النعمه كنت راح اضربه وقلت له بالحرف الواحد (حُرمت عليك عيشتك يا بعيد) هات لى آيه من القرآن بتقول كده
طبعا سكت ومعرفش يرد
هما دول اللى خاربين الدنيا وكرهونا فى بعض بس مش راح يطولوا غرضهم
لأنى متأكد 100% انك بتحبينى كأخ مصرى مثل ما بحبك كأخت مصريه واكثر كمان

خلال ال 3 سنوات الماضيه نزلت مصر حوالى 10 مرات بعد غياب 15 سنه انقطاع
وكنت متخيل ان هلاقى حريقه بين المسيحيين والمسلمين فى مصر
بالعكس لسه عم ملاك بتاع المسامير قاعد مع ابو سيد البواب وهاتك يا شد فى الجوزه واحلى مسا
وصفوت نجيب لسه شغال عند محمد الطعمجى والواد محسن لسه عند عم جرجس الحلاق ولسه برضه ام شعبان الدايه
مولده البت نجوى بنت داود الجزماتى وعم فتحى التمرجى لسه عند الدكتور ايليا بس عشان اقول الحق الواد سيد العربجى اتخانق مع عاطف
ابن عم لطفى المنجد الافرنجى وكله علقه!!!!


ياختى فى ناس بتعمل من الحبه قبه بلاش نكون انا وانتى منهم

يا ريت يا عنتر تكبر الخط شويه عشان الحول بس ممكن

على رأى الفنانة العظيمة اليهودية ليلى مراد "كلام جميل و كلام معقول ما قدرش اقول حاجة عنه" لكن انتم فين يا عم الناظر اين المسلمين المعتدلين ليه مش فى الصورة و تركتم العالم الغجر و الغوغاء و الهمج هما الى بيتكلموا بأسم الأسلام ...
على الفكرة الكلام الى بقوله ده فى مصلحة الأسلام و من القلب ... لأننا أحنا أتربينا و أكلنا عيش و ملح مع بعض ... و العشرة ما تنهنش غير على أبن الحرام ...
يا ناس يا مسلمين يا معتدلين ... انتم فين ؟؟؟ سيبين دينكم ليه مشوه و تصرون على أنه هذا هو الحق !!!
صدقنى لما اقولك أشتقت لعدالة أبن البلد المسلم و جدعنته و دفاعه عن الضعيف ضد كل متكبر ظالم حقود على مستوى الشارع المصرى ...
فين الشهامة و المروة التى كان يتميز بها أبن البلد سواء كان مسلم أو مسيحى ... أكلوهم بلطجية الأخوان و الجماعات المتطرفة ...
يا خسارة وألف خسارة عليك يا مسلم يا مصرى يا معتدل !!!
على فكرة أنا قاصد أذكرك بليلى مراد أنها يهودية ... بس أوعى تقول عليا يهودى علشان نبهت لحاجة زى كده ... أنا أقصد حاجة تانية ... يا رب تفهم !!!