[iwcab]

س : إنطباعك إيه بعد متابعتك لموقع قبطس عدة سنوات ؟
ص : حالياً عندى إحساس مضمونه إن الأقباط ناس مرتاحين وماعندهمش مشاكل لكن لا يوجد لديهم تمثيل سياسى ولا سلطة ، والدليل على كده إنك لا تجد عندهم تعاطف مع أى مشكلة موجودة فى العالم ، الموضوع الأساسى اللى بيهتموا به ( على الإنترنيت ) هو حصول إعتداء على أحد الأقباط ، ومهاجمة الإسلام ( دون تأكيد على نشر المسيحية ) ، وعاوزين يشيلوا الإسلام ويحطوا العلمانية ، مع تأييد لكل ما يصدر عن أمريكا ، والهدف الظاهر هو الحصول على حصة سياسية ووظيفية
س : أمال إنت عاوز إيه ؟
ص : أنا عاوز حركتنا تبقى مسيحية فى مبدأها، ومسيحية فى أعمالها وسلوكها ، ومسيحية فى هدفها ، علشان يبقى طابعها النضافة وعدم الأنانية ، لما نطلب فائدة الآخر الروحية والمادية نبعد عن وحل المادة والذات والطمع ، عاوزين خدمتنا وهدفنا يبقى على الحاجات الأبدية .. الخلاص الأبدى .. مملكة السموات الأبدية .. الملك اللى لا نهاية لملكه .. الشهادة لعمل المسيح والنعمة .. المسيح قال جئت لا ليخدمونى بل لأخدم وأبذل نفسى ، وفى مكان تانى : وضع نفسه وأطاع حتى الموت موت الصليب لذلك رفعه الله أيضاً وأعطاه إسماً فوق كل إسم