[ريجان]

يعنى يوم ما مجلس الشورى يولع و هو فاضى - مافيهوش حد - نلاقى عربيات المطافى و اسطول من عربيات الاسعاف (مع ان ماكانش فيه حد جوة عشان يحتاج اسعاف أساسا) دة حتى طائرات الاطفاء التابعة للجيش تدخلت لإخماد الحريق كل دة عشان مجلس الشورى كان هو اللى فيه المشكلة - مع ان مجلس الشورى مالهوش أهمية و لا لزمة اللهم الا انه بيدى (يعطى) حصانة لأعضاءه و بس. يعنى لو اتحرق و ولع باللى فيه الشعب مش هاتفرق معاه أساسا غير ان شارع القصر العينى هايتقفل كام يوم, و اللى مش مصدقنى يشوف كم السلبية من أفراد الشعب اللى كانوا موجودين وقت الحادث - نظرات لامبالاة (يعنى هو كان قدملنا ايه) تقراها فى عيون شهود العيان, دة غير جو الشماتة فى الحكومة و أعضاء المجلس الموقرين. أما حادث المقطم اللى راح فيه ارواح قبل كدة فى الانهيار اللى فات و الحكومة حتى ماكلفتش نفسها و نقلت البيوت العشوائية دى من أحضان المقطم الى اى حتة تانية مع ان فات على الانهيار الاخير فى المقطم اكتر من سبع سنين, سايبين العشوائيات زى ما هى و طبعا هايطلع علينا أحمد نظيف و يقول "احنا حذرنا الناس دى كتير انهم مايسكنوش فى المكان دة و هما اللى مابيسمعوش الكلام" (يعنى يروحوا فين؟ هما يعنى كانوا شافوا فيلا فى مارينا و مارضيوش يروحوها؟) و سيتبرأ كل وزير من مسئوليته و مش هايفضل غير المصرى الغلبان هو اللى يشيل مسئولية اللى حصل لوحده. و هى دى مصر يا عبله ربنا يخلينا بابا حسنى وماما سوزان