[Aphex]

المشاركة الأصلية بواسطة dr.yousef_matta

أنا فاهمك جدا ومقدرش ألومك ببساطة لان عندك حق

كلامك زي كلام ولادي مرتبطين بانجلترا و شايفين مصر أقصى تقدير هتكون زيارات كل كام سنة

انت شاب ومحتاج تتعلم و ولادك يتعلموا و تشتغل وتعمل فلوس كويسة وتعيش وتتبسط وبالتالي اختيارك صح

بس المشكلة ان أنا مثلا عديت الستين و من جيل شاف مصر حلوة فعلا مفهاش كل المشاكل دي

لكن انت اتولدت وعشت في العصر التعيس وكل جيلك كده ومستحيل تقتنع بمصر في الوضع الحالي ده

والمشكلة الأكبر في مهاجرين من جيل تاني بيكونوا ملهمش اي ارتباط بمصر ومش فاهمين ابدا ايه عاجب ابوهم في بلد متخلفة زي دي وليه بيحب البلد الزحمة اللي حياة أهلها صعبة موت

المهم أرجوك لازم ولادك يحبوا مصر ولازم ينزلوا اجازات عرفهم انهما مصريين اوعى تنسى وربنا معاك يا حبيبي.

معلهش يا دوكتور ما اخدتش بالي ان حضرتك مهاجر و عايش في انجلترا، كنت فاكر انك لسه عايش في مصر ارض المطحونين.

و دي اول مرة اعرف ان سنك فوق الستين. ياراجل ده كل كلامك رغم نضجه الواضح يدل علي شباب روحك..

انا لسه شاب صغير في العشرينات و متجوزتش. و لكن اوعدك لما اتجوز و اخلف ، هحكي لعيالي عن مصر و اخدهم زيارات كل سنة و اللا اتنين، و اخدهم علشان يزوروا كل الاماكن الجميلة في مصر بما فيها المدن السياحية الباهظة التكاليف التي لم استطع زيارتها عندما كنت في مصر..
و لكن مش متأكد لسه اذا ما كنت عايز اطفالي يتعلموا اللغة العربية ام لا..

لعلمك يا دكتور، انا لا اعتقد ان امريكا هي الجنة، و احيانا بزهق منها و من وحدتي فيها، و من بعض عاداتها و تقاليدها السخيفة و خايف اني مش هعرف اربي اولادي فيها. الجنس و الخمر و التفكك الاسري و مشاكل تانية كتير للاسف موجودة في الغرب كما تعلم و مش عارف هعمل ايه لما اجيب عيال.

احيانا كتير بفكر انه هييجي اليوم اللي هتعب فيه من امريكا و اقوم اطفش لاي بلد تانية. الاحساس ده بينتابني كتير كلما فكرت في حياتي بعد الستين و ايه اللي مفروض اعمله لما اطلع علي المعاش؟ احيانا بفكر اني ارجع اموت في مصر، و احيانا افكر اني اروح اشتري بيت في اي بلد من بلاد امريكا اللاتينية لان الحياة فيها رخيصة و هادية بعيدا عن الدوشة في امريكا. لدرجة اني قررت تعلم اللغة الاسبانية العام الماضي و اشتريت مكتبة كتب و كورسات تعليم اسباني و بذاكر كل اسبوع و امارس اللغة مع زملائي في الشغل لحد ما بقيت بربنط في الاسباني.

اسف اذا كنت خرجت عن الموضوع

تحياتي يا دكتور و مرحبا بك في منتدي اقباط امريكا