[Dr.Yousef_Matta]

المشاركة الأصلية بواسطة Aphex

معلهش يا دوكتور ما اخدتش بالي ان حضرتك مهاجر و عايش في انجلترا، كنت فاكر انك لسه عايش في مصر ارض المطحونين.

و دي اول مرة اعرف ان سنك فوق الستين. ياراجل ده كل كلامك رغم نضجه الواضح يدل علي شباب روحك..

انا لسه شاب صغير في العشرينات و متجوزتش. و لكن اوعدك لما اتجوز و اخلف ، هحكي لعيالي عن مصر و اخدهم زيارات كل سنة و اللا اتنين، و اخدهم علشان يزوروا كل الاماكن الجميلة في مصر بما فيها المدن السياحية الباهظة التكاليف التي لم استطع زيارتها عندما كنت في مصر..
و لكن مش متأكد لسه اذا ما كنت عايز اطفالي يتعلموا اللغة العربية ام لا..

لعلمك يا دكتور، انا لا اعتقد ان امريكا هي الجنة، و احيانا بزهق منها و من وحدتي فيها، و من بعض عاداتها و تقاليدها السخيفة و خايف اني مش هعرف اربي اولادي فيها. الجنس و الخمر و التفكك الاسري و مشاكل تانية كتير للاسف موجودة في الغرب كما تعلم و مش عارف هعمل ايه لما اجيب عيال.

احيانا كتير بفكر انه هييجي اليوم اللي هتعب فيه من امريكا و اقوم اطفش لاي بلد تانية. الاحساس ده بينتابني كتير كلما فكرت في حياتي بعد الستين و ايه اللي مفروض اعمله لما اطلع علي المعاش؟ احيانا بفكر اني ارجع اموت في مصر، و احيانا افكر اني اروح اشتري بيت في اي بلد من بلاد امريكا اللاتينية لان الحياة فيها رخيصة و هادية بعيدا عن الدوشة في امريكا. لدرجة اني قررت تعلم اللغة الاسبانية العام الماضي و اشتريت مكتبة كتب و كورسات تعليم اسباني و بذاكر كل اسبوع و امارس اللغة مع زملائي في الشغل لحد ما بقيت بربنط في الاسباني.

اسف اذا كنت خرجت عن الموضوع

تحياتي يا دكتور و مرحبا بك في منتدي اقباط امريكا

انا كنت فاكرك عجوز شوية بس انت طلعت من دور ولادي

ربنا يحميك وتفرح بشبابك

لا اسف ولا حاجة يا ابني الحبيب

همومك ومشاكلك دي انا فاهمها كويس واتمنى انك تكون ماشي كويس في شغلك وبتحافظ على صحتك
المهم اوعى تتجوز امريكانية
حاول على قد ما تقدر تتجوز بنت مصرية وجاليتنا في اميركا كبيرة نشكر ربنا
بس تكون من بيت كويس يعني وانت فاهم

لما تتجوز ويكون في حب وتفاهم الملل والزهق بتاعك هيروح والفراغ النفسي هيتحسن وهتحس بسعادة كبيرة لان الوحدة فعلا في الغرب كابوس كبير

تربية الولاد مشكلة فعلا واقترح عليك في مرحلة المراهقة انهم ينزلوا لمدة سنة واحدة مصر وده مهم قوي انا عملت كده مع ولادي عشان يعرفوا الناس في بلدهم عايشين ازاي وان الاباحية دي مش صح وان الشذوذ ده مش حرية شخصية

المشكلة ان المدرسة والمجتمع بيحطلهم standard غلط لحاجات كتير وكونهم يشوفوا مصر ويعيشوا فيها فترة ولو قليلة عيشة وحياة مش مجرد اجازة ده بيصحح حاجات كتير ومهم جدا

المهم بس انت حاول تتجوز وعيش حياتك بالطول والعرض ومتكتأبش يا رجال دانت في عز شبابك والحياة قدامك والدنيا مستنياك
ربنا معاك يا حبيبي ..