رسالة إلي الشيخ «مشعل»

[abomeret]

رسالة إلي الشيخ «مشعل»

بقلم د. لميس جابر ١٦/٢/٢٠٠٨
سلامو عليكو يا عم الشيخ.. ماتآخذنيش عشان أنا عقلي علي قدي.. وعلامي بسيط يادوب، أقرأ اسمي والجواب ده أنا بأمليه لراجل جارنا ابن حلال وأمير ما يتخيرش عنك.. معلش استحملني عشان أنا مكلومة علي جوزي وأبو ولادي محمود سويلم اللي مات بضرب النار في العربية في رفح ساعة الهوجة بتاعتكم.. أمر الله يا عم الشيخ ولا قوة إلا بالله،

لكن أنا قلبي محروق عليه وعلي شبابه ومش عارفة أعمل إيه في التلات عيال اللي فاتهملي.. ده حتي الصغير لسه بيرضع.. وأمه كمان اللي هي حماتي عايشة معانا وفي رقبته.. لكن ربنا كبير وإن شاء الله هايقدرني ويقويني.. لكن الحزن بيغلبني وبابكي لما عينيا تورم وبعد كده استغفر وأقول الصبر من عندك يارب.. وأمه الغلبانة ما بتبطلش عياط ليل ونهار لما نظرها قرب ينطفي، ما هو ضناها ومافيش أغلي من الضنا

وربنا يتولانا برحمته أصل جوزي محمود الله يرحمه ويجعل متواه الجنة كان خلاص فاضل له كام شهر ويخلص الجيش ويرجع البلد يشوف القيراطين زرع وال*****ة اللي حيلتنا ونتلم تاني بعد التلات سنين غربة وبعاد وشحططة.. لكن أمر الله إنه يموت برصاصة من عندكم وانتوا إخواتنا وعرب ومسلمين وأنا مش فاهمة ليه أصلا يحصل كده؟

ده حتي أنا وكلنا في البلد كنا زعلانين قوي عشان اليهود قافلين عليكم في غزة والناس اللي عندكم يا حول الله مش لاقيين العيش ولا الدوا إلا اللبن وكمان اليهود قطعوا عليكم النور منهم لله البعدا.. وإحنا وحياة سيدنا النبي كنا قاعدين طول اليوم ندعي عليهم وندعي لكم بفك ضيقتكم ويقويكم عليهم وينصركم.. يقوم يجي ضرب النار من عندكم علي صدر الغلبان أبوولادي ويموته؟

طيب وهو ماله؟ وهو كان منع عنكم الأكل والشرب والنور يا عم الشيخ؟ ده راجل في حاله كان قاعد علي الحدود يحرسها ويعد الأيام علشان يرجع بيته لولاده وأمه وبلده وزرعه.. والنبي علي قلبك تفهمني علشان أنا عقلي علي قدي..

أصل عم جوزي مات شهيد في سينا في حرب أكتوبر مات برصاص اليهود وهو دلوقتي في الجنة مع الأبرار وجد جوزي اللي هو أبو حمايا مات برضه شهيد في سينا في ١٩٦٧ وبرصاص اليهود وهو كمان مع الأبرار في الجنة ونعيمها وأبو جد جوزي اللي هو جد حمايا مات في القنطرة في ١٩٥٦ شهيد في سينا برضه وبرصاص اليهود وهو معاهم في الجنة مع الشهداء مع ابنه وابن ابنه.

حظ عيلة جوزي كده.. والحمد لله علي كل حال وكل الحروب دي كانت عشان فلسطين وأهلها الغلابة اللي بقالهم سنين مش طايلين سما ولا أرص وولادهم بيموتوا شهدا هما كمان.. وأنا أيام ما اتجوزت وجوزي محمود كان لسه صغير علي سن الجيش قلت الحمد لله..

دلوقتي فيه سلام وبطلنا حروب خلاص هايروح الجيش التلات سنين ويعدوا بسرعة وعلي خير ويرجع لنا يربي ولاده ويعيش لنا ولشبابه ولأمه الغلبانة، رحمتك يارب، مقدر ومكتوب، يموت هو كمان في سينا زي عمه وجده وأبوجده اللهم لا اعتراض.. الولد الكبير في أولي ابتدائي مابيعيطش علي أبوه كتير، لكن ساكت علي طول وبطل لعب في الشارع وأنا مابعيطش قدامه،

لكن قلبه يا روح أمه مجروح ونفسه مكسورة، وخايفة عليه من قلة الفضفضة والتاني طول النهار يقول: أبا فين يا أمه؟ وأنا أكدب وأقول مسافر وراجع.. ربنا يسامحني أعمل إيه.. والصغير علي إيدي لسه بيرضع لكن رضاعة الحزن والسواد، بطلت أرضعه وربنا يخلي خالته بترضعه بعدما خس النص.. أصل لبن الحزن مر بعيد عنك وربنا ما يوري حد خراب البيوت..

أمال لما راجل البيت يروح يبقي هو ده الخراب يا سيدنا الشيخ.. أنا باكتب لك علشان كل ما حد يعزيني يقوللي دول بتوع حماس والشيخ مشعل وأنا ما أعرفش إيه حماس دي وماتآخذنيش ما كنتش أعرفك لغاية ما شاوروا لي علي التليفزيون وقالوا لي هو ده بتاع حماس اللي موتوا جوزك.. قلت أشتكي لك وأنت الريس بتاعهم وأنت باين عليك مؤمن وبتاع ربنا ومايرضيكش اللي حصل وكمان قلت أسألك وأنت مش هاتكدب علي هو جوزي محمود كده يبقي مات شهيد ولا لأ؟

أصل شيخ الجامع عندنا في البلد قال لأ مش شهيد ده مات برصاص عرب مسلمين، والواد ابن عم أمي لسانه طويل وبيقول دي نيران صديقة اللي يموت بيها ما يبقاش شهيد وأنا مابانمشي من الفكر والحزن.. يعني بيتنا يتخرب والولاد يتيتموا ويطلعوا للدنيا مش فاكرين شكل أبوهم إيه، وأمه قربت تموت من كتر البكا وكمان مايبقاش شهيد ولا يروح الجنة مع الأبرار مع عمه وجده وأبوجده؟..

يعني كده يموت في عز شبابه فطيس؟ وحياة ولادك ترد علي وتريح بالي وأنا عارفة إنك هاتقول الحق.. قول لي إنه مات شهيد.. ده اللي هايبرد النار اللي في قلبي عليه وعلي عيالي وعلي حالي.. وربنا عنده العوض وعنده الصبر.

من طرف أرملة الشهيد بإذن الله محمود
http://www.almasry-alyoum.com/articl...rticleID=93930

[adel_samir]

كل شيخ وله فتوى .... يحلل اللي يحلله ويحرم اللي يحرمه .. وذي ما تيجي معاه وتخدم هواه . وعجبي