الفنكوش

[abomeret]

الفنكوش

بقلم: دكتور/ ماهر حبيب

الفنكوش إختراع إخترعه عادل إمام لكى يلهى الناس بما هو ليس موجود وعمل الدعاية القوية التى تجعل الناس تتكلم ليل ونهار على الفنكوش تنام تحلم بالفنكوش تصحى تدور على الفنكوش تاكل تفتكر إنك حا تاكل الفنكوش يندهك مديرك تظن إنه حا يمنحك جايزة الفنكوش وفى الأخر بعد ما ينهد حيلنا يطلع الفنكوش فنضام مضروب فناكله وإحنا أخر إنشكاح إننا أكلنا الفنكوش.
وفنكوش الأيام دى هو مين حا يطلع رئيس المخروسة - المحروسة سابقا - وهل هو توافقى أو بالتراضى .

هل هو طويل والا قصير عسكرى متخفى فى صورة مدنى والا مدنى متخفى فى بدلة عسكرية .. إسلامى التوجه أو إسلامى الفكر أو مرضى عنه من المرشد والا مرضى عنه من السلفيين من نزلاء العباسية والا الخانكة أو التحرير .. هيصة وزمبليطة ومش بعيد نعمل فوازير رمضان السنة دى بدرى شوية عن مين هو الفنكوش وفى أخر الحلقات نعمل السحب على الفايز والجايزة هى أنبوبة بوتاجاز .. عشرين لتر بنزين 80 وطن سولار.

وبنفس طريقة فيلم الفنكوش خرج علينا إخوان طظ فى مصر بتصريح أقرب إلى الفيلم الكوميدى بأن الرئيس القادم لسه ما ظهرش لكن أول أوصاف فنكوش الإخوان إنه وطنى وإدارجى وحا ينزلوا أوصافه أول كل إسبوع وكل واحد يوم السبت يروح يطلع على ميدان التحرير وفيه طوبة محطوطة جنب قاعدة التمثال نشيلها نلاقى تحتها ورقة مكتوب عليها الوصف التدريجى لفنكووشنا كلنا فمثلا السبت إللى جاى يتقال ده عنده حسنة فى ضهره عند الضلع نمرة خمسة يمين .. والإسبوع إللى بعده ركبته الشمال معمول فيها عملية الغضروف وبعدين ده شايل المرارة بالمنظار ثم بيلبس نضارة شمس بس مش ريبان لكن نوع تانى .. وهكذا حتى يكتمل أوصاف الفنكوش إللى حا يكون مفاجأة لينا جميعا .

حتى للفنكوش نفسه إللى مش عارف إنه هو الفنكوش وطبعا حا نكتشف إن كل الناس المحترمة إللى تعبانة وفاكره إنها ممكن تكون الريس لكن مش مرضى عنها من الإخوان حا يكتشفوا إن نقبهم طلع على شونة لأن ولا واحد من على الساحة الأن حا يكون فنكوش لكن سر الفنكوش موجود على ضهر قرموط عايم فى النيل لكنه مربوط بحبل واصل لحى الروضة أو المقطم وأول ما ميعاد كشف الفنكوش حا ييجى حا يروح واحد مكشوف عنه الحجاب مادد أيده وساحب الحبل إللى فى أخره القرموط إللى مكتوب على ضهره إسم الفنكوش وساعتها كلنا حا نهتف ونغنى إخترناك إخترناك أدى حبيبنا الفنكوش إخترناه .