ولاد الهبلة

[abomeret]

ولاد الهبلة

بقلم إسعاد يونس - المصرى اليوم

■ ليس لدى تعليق على ما يجرى للبنى آدمين فى سوريا الشقيقة غير جملة واحدة.. إلهى يا بشار يا بن الأسد تطلب الموت ما تلاقيهوش.. آمين..

■ كما توقعت تماما.. نجح مهرجان الأقصر للسينما الأفريقية بفضل شعب الأقصر المتحضر.. الذى أمّن الضيوف والفعاليات فى كل لحظة ومكان.. كان مضيفا رائعا ومنظما وبشوشا.. تطوع أكثر من ثلاثمائة شاب وشابة بلا مقابل لمصاحبة الضيوف وتوفير كل سبل الراحة لهم.. شعب الأقصر.. أرفع لك القبعة.

■ واحد راجل لابس بدلة شبه بتاعة فؤاد المهندس فى السكرتير الفنى بالظبط.. قصيرة وشالحة وعصاعيص رجليه باينة منها.. فاضلّه الطربوش المزيت ويبقى كوبى بيست منه.. معاه كرسى بلاج جربان كده معلقة ف كتفه.. وماسك ف إيده البوق اللى شبه القمع ده.. يمشى شوية فيلاقى تجمع ناس.. يقوم فارد الكرسى وقاعد حاطط رجل على رجل ودافس بقه فى البوق و«ارحل.. ارحل».. مش منتظر مشاركة من حد.. شوية ويقوم قايم لامم الكرسى وحاطط البوق تحت باطه ومنشن على حتة تانية وقاعد: «ارحل.. ارحل».. قعدت أتفرج عليه شوية وأتتبعه.. مش مجنون ولا شحات.. خفت أروح أسأله هو مين ده اللى يرحل لا نقع فى المحظور.. ومشيت وأنا حاموت م الفضول.. يا ترى عايز مين يرحل يا ربي؟؟.. مين؟؟.. مين؟

■ ممكن واهد سؤال زؤنن؟؟.. المليار اللى اتصرف على انتخابات الشورى دى عند مين بالظبط؟؟.. مين اللى أصر على إجرائها رغم معرفتنا جميعا إنه مجلس مالوش تلاتين لازمة.. ولا هو كان إصرار إن اللى مالحقش يدخل مجلس الشعب يركب عالجناح فى الشورى.. هى الترصيصة كانت ناقصة؟؟.. ماهما فى المجلس اترصصوا خلاص.. حلاوثهم حلاوثهم وهما قاعدين محاذيين كده جنب بعضيهم توائم توائم.. بحس إنهم عالساعة إتنين الجرس حايضرب ويطلعوا سندوتشات البيض بالسطرمة والحلاوة بالقشطة م اللانش بوكس اللى باعتاه ماما.. طب حساب المليار عند مين بقى يا أفندية؟

■ بالمناسبة.. هما الأعضاء بيبصوا لفوق ليه ويبتسموا وهما فاتحين بقهم؟؟.. الظاهر فيه شاشة متعلقة زى بتاعة الماتشات بتوريهم الكادر اللى على الهوا فى التليفزيون.. طبعا يا حبايبى انتوا كبار وعاقلين.. إوعى حد يعمل باى باى للكاميرا.

■ الشعب يريد التصويت الإلكترونى للنواب.. حطولهم لوحة قدام كل واحد فيها زرارين.. واحد أخضر يعنى نعم.. وواحد إسود يعنى لأ.. ما هى دى الألوان اللى ممكن يفهموها.. مرتبطة ارتباط شرطى بالاستفتاء بتاع قول «نعم» تاخد كارنيه الجنة.. قول «لأ» إبليس ياخدك أنجاچيه ع النار.. ليس شكاً فى النتائج لا سمح الله.. ولكن تأكيدا على دخول الأقلية النار.. يللا بلا عتلة هم.

■ تذكروا معى فيلم حياة أو موت.. بتاع الدواء فيه سم قاتل.. بنت صغيرة تسير بمفردها.. قاطعة أحياء كاملة فى القاهرة بحثا عن الدواء التركيب لأبيها.. وصيدلى يركب الدواء غلط فيقلب البلد حتى لا يصل الدواء الذى به سم قاتل للمريض.. وبوليس يجند الإعلام لعمل نشرة تحذر الرجل.. ويترك اللى وراه وقدامه حتى يصل له ويتم إنقاذه.. شاهد هذا الفيلم بعين اليوم.. محدش قلّب البنت فى الفلوس اللى معاها.. محدش خطفها أثناء سيرها فى الشارع وطلب فيها فدية.. محدش تحرش بيها أو اغتصبها وبعدين قتلها ورمى الجتة فى الرياح.. فيه واحد مجنون ابن مجنونة خدها وراه على العجلة عشان يوصلها لمحطة ترام فى حى آخر من غير ما يقطع ودنها ويسرق الحلق.. واسرح بخيالك وكمل الفيلم عشان تعرف حجم المصيبة اللى احنا فيها.. يقدر السادة اللى سوحونا وخنقونا وطرشونا وصدعونا بجدوى الدقن لضابط الشرطة يرجعولنا المجتمع ده؟؟؟؟؟؟؟؟؟؟؟؟

■ ماما.. نعم يا حبيبى.. هو إحنا مش حانخرج؟؟.. نخرج فين يا حبيبى.. نخرج من هنا.. نخرج من هنا نروح فين؟؟.. زى مايكل وبيتر أثحابى المثيحيين.. مش فاهمة يا عين أمك.. مايكل وبيتر وكل العيلات بتاعتهم خرجوا.. راحوا بالطيارة ومش راجعين.. يا خبر؟؟.. فى سرّها «أستغفر الله العظيم.. منهم لله اللى طفشوهم».. معلش يا حبيبى بكره يرجعوا.. مش حايرجعوا خالث.. يللا بقى خرجينى.. لأ يا حبيبى دى بلدنا وإحنا قاعدين فيها.. ماهى كانت بلدهم برضه إشمعنى هما؟؟.. فى سرّها «يادى النيلة الواد بيزنقنى».. عشان إحنا لازم نقعد ونبنى البلد عشان مستقبلك يا حبيبى.. مثتقبلى أنا؟؟.. هو إنتى حاتقعدينى هنا فى وثط الناث اللى بتقعدى تتفرجى عليهم الثبح فى التليفزيون دول وبيزعقوا جامد؟؟.. أيوه يا حبيبى.. أنا بخاف منهم يا ماما.. لأ يا حبيبى ما تخافش دول حلوين.. فى سرها «سامحنى يارب».. فى سره وهو يستدير مبتعدا «حلوين؟؟.. يانهار إثود.. يانهار إثود.. يانهار إثود»..

■ الاسم الجديد لقناة أون تى فى.. الفاسوخة.. سايبينهالنا يخزوا بيها العين.. عشان يبقى فيه قناة بتعبر عن السلالة المنقرضة أحادية الخلية والقرن.. أم ست صوابع ومنخارين منزوعة العصعص اللى كان اسمها الثوار.. عايزين متحف بشرى بقى نحط فيه تماثيل لصاحب القناة نجيب ساويرس وريم ماجد ويسرى فودة وباسم يوسف وشوية آثار كده لحبة ثوار على كام عين مفقوعة ورجل طايرة.. ويافطة كبيرة مكتوب عليها «هنا يرقد اللى صدقوا إن كان فيه ثورة».

zahqanin@gmail.com