لا أدعو لقطع الجسور بيننا وبين الدولة

[elmafdy]

اخوتى الاحباء سامى و اشرف و K K و مكه كولا . . .

اولا كل سنه و انتم جميعا طيبين و بخير , و ربنا يبارككم و يحفظكم جميعا

ثانيا أنا معجب جدا بالموضوع المثار حاليا , و الحقيقه ان ما حدش فيكم غلطان , كل واحد شاف جزء من الحقيقه , و كل واحد برضه أغفل بعض النقط , و الحقيقه ان وجود مبارك ليه مميزاته و عيوبه , و ابتعاده برضه ليه مميزاته و خطورته , خصوصا ان فيه سؤال تانى مهم . . .

لو مبارك رحل مين اللى ها يحل محله ؟؟؟ هل ها يكون احسن و لا اسوأ ؟؟ هل ها يكون حد علمانى , و لا حد من الاخوان ؟؟

الملاحظه الوحيده الهامه جدا اللى انا عاوز اضيفها ان الوضع فى مصر حاليا مخيف جدا جدا جدا , مبارك و حكومته اللى طول حاجه و عشرين سنه حاكمين قبضتهم على البلد بمنتهى القوه انهاروا و بقوا فى مهب الريح قدام التيار الاسلامى المتمثل فى الاخوان , لازم نعترف جميعا ان الميول الاصوليه الاسلاميه بقت مغروسه بقوه جوه كل المسلمين فى مصر , انا شفت بعينيا كل المسلمين اللى حواليا و اللى ما لهمش فى السياسه خالص ازاى كانوا بيتخلوا عن سلبيتهم و بيروحوا الانتخابات النيابيه الاخيره و يسيبوا شغلهم و يخسروا فلوس و يتزاحموا و يتبهدلوا علشان ينجحوا مرشح الاخوان و يتكبدوا فى سبيل ذلك كل ثمين و غالى , و لولا ان حكومة مبارك و الشرطه مارسوا كل انواع العرقله و الارهاب كان الاخوان حصدوا كل المجلس و لأول مره تظهر اصوات اعتراض عنيفه على مبارك و يتجمع الشعب بنسب كبيره ضده , واضح زى ما قال اخى مكه فى فقرته دى

فى ظل ثقافة الشعب المتأسلم لمدة أكثر من ثلاثون عاما - أى لدينا الأن جيل من الشباب لم ينشأ ولم يعرف سوى ثقافة الأسلمه - من سيختار الشعب رئيسا فى حال الإطاحة بمبارك أو عائلته
بكل تأكيد ستخرج نتيجة الإنتخابات 99.99% لصالح (الإسلام هو الحل)

علشان كده انا شايف ان فيه مشكله كبيره , و هى ان بقاء مبارك او رحيله ممكن يكون غصب عننا , بمعنى تانى ممكن حتى لو اقتنعنا ان بقاء مبارك هو الانسب لينا يرحل غصب عننا بحكم ضعفه اللى بيزيد يوم بعد يوم قدام سطوة الاسلام اللى لغى و مسح عقول الجميع .

و الحقيقه ان الوضع ده اوحى لى بحل وحيد بس لازم نتحلى بأكبر قدر من الحنكه السياسيه علشان نحققه , وهو أننا نعلن اننا كفئه من الشعب مؤيدين بقوه لبقاء مبارك , او حتى تولى جمال - أنا شخصيا اتمناه - فى مقابل اخذ حقوقنا بجد و فى مقابل اصلاح حال الاقباط اصلاحا فعليا بقوانين و اليات لتنفيذها , لأننا غالبا ها نكون عن قريب القشه الوحيده اللى محتاج يتعلق بيها قدام انخفاض شعبيته و روح الرفض الاسلامى العام ضده .

المفدى