امن الدولة .. الى كل ناشط قبطى

[menaa2005]

لإن امن دولتنا العظيم بقى بيحبنا وعايز دايما يكون جنبنا وضيافته لنا فى لاظوغلى تهمنا
فيجب علينا اننا ناخد فكرة عن هذه الضيافة ، وناخد حذرنا ونتعرف على بيتنا الجديد المريح .
ولأن امن الدولة ولاظوغلى لهم اساليب فى الضيافة مش لازم تغيب عن اى فرد مننا قررت اتعرف على اساليب ضيافتهم وقلت اشارككم بها لعل وعسى تنفع فى ساعة ليل
ولأنى معنديش خبرة فى الموضوع ده قعدت ابحث فى الانترنت ، وفرحت جدا ان الاخوان المسلمين قايمين بالواجب وزيادة ، فالذكريات فى لاظوغلى كتيرة وبينشروها بالتفصيل الممل على الشبكة العنكبوتية ، فمش عيب نستفيد منهم .
عامة انا لقيت شوية نصائح قلت ابدأ بهم الموضوع ، وياريت الاخوة كلهم يشاركوا معانا ، ويكشفوا لنا ايه اللى بيحصل فى امن الدولة علشان الكل يبقى على نور من اولها lol

خللى بالك

خللي بالك 00 علشان اول حاجة بيعملها الظابط انه يستغل حالة الخوف والرعب اللي بتكون فيها ويبدا يكلمك بهدؤ وعطف وحنان علشان يكسر حالة التحفز والحشد النفسي اللي بتبقي فيها وانت داخل التحقيق

خللي بالك 00 اذا لقي ان الاسلوب ده منفعش بيلجأ للاسلوب التاني وهو تهديدك وتخويفك وبعدها بيتنقل لاهانتك وسبك وكل من يمت لك بصلة باقذع الشتائم والسباب

خللي بالك 00 هايسب ويشتم كل الرموز والنماذج والقدوات اللي انت بتحترمها وهايتطور الامر لسباب اله الكون واهانة كل ما هو مقدس وذو قيمة في حياتك

خللي بالك 00 هاينتهك كل قيمة او ضابط او عرف او مقدس علشان يوصلك رسالة انه مالوش كبير وانه وحش كاسر لا يعرف الرحمة وانك يجب ان تخضع له

خللي بالك 00 هو عارف ان صاحب الفكرة والمعتقل علي خلفية سياسية يعتز بنفسه وكرامته لاقصي حد ولذا فستجد منه تفنن في اهانتك او جرح كرامتك

خللي بالك 00 انه هايلجأ للتعذيب النفسي اولا وايهامك بانك دخلت مكان لن تخرج منه ثم ينتقل بك الي مرحلة التعذيب البدني والنفسي في ان واحد

خللي بالك 00 هايقطع فترات التعذيب البدني والنفسي بمحاولات خبيثة من احد مساعديه بايهامك انه ناصح امين لك وانك لن تخسر شئ اذا طاوعته حتي تخرج من هذا الجحيم ولا تتعجب اذا وجدته نسخة متطابقة من سيده اذا رفضت الاذعان لوسوسته

خللي بالك 00 صدقني ما ستشعر به هو اول قلم واول صعقة كهرباء وبعدها لن تشعر باي الم