وظيفة خالية

[el chife]

بقلم: دكتور ماهر حبيب
6 برمودة 1727 للشهداء – 14 أبريل 2011 ميلادية

مطلوب على وجه السرعة رئيس جمهورية لمصر على أن يتمتع بالمواصفات الأتية

1 وظيفة لمدة اربع سنين قابلة للتجديد لمدة أربع سنين أخرى الأربع سنين الأولانية مطلوب إنه يتعرف على ظروف البلد و مش ضرورى يعمل حاجة لأنه عنده مشاكل كتيرة مش حا يعرف يحلها

2 فى حالة التمديد يمكن للرئيس أن يعمل بعض المشاريع الجديدة وأن يجمع أكبر قدر من العمولات والرشاوى حيث أن وظيفته على وشك الإنتهاء

3 أن يتمتع باللباقة ويكون مفتح ويلعب بالبيضة والحجر

4 أن تكون حالته الصحية جيدة وقادرة على دخول السجن بعد إنتهاء مدة خدمته لأنه يا حيخش السجن يا يتسمم يا يتقتل يا يتبهدل ( راجع سيرة الرؤساء السابقين الأول حبسوه والتانى سموه والتالت قتلوه والرابع بهدلوه)

5 يفضل أن يكون عازب ومعندوش خلفه علشان يبقى مقطوع من شجرة ويريح دماغه من وجع الدماغ عند الإقالة أو الإستقالة

6 يكون على علاقة طيبة بالمحظورة ويبنى جسور ثقة مع السلفين وكمان يكون مرضى عنه من حماس وحزب الله

7 مرتبه لا يزيد عن 5000 جنية بالبدلات ومعاشه 2000 جنية وعليه يفتح مخه لتمشية حاله ويدبر باقى مصاريفه بمعرفته

8 يفضل رئيس ملوش دعوة بالكورة وخصوصا الكابتن حسن شحاتة وحسام وأخوه

9 لا يشترط إجادته لأى لغات أجنبية لأنها حرام

10 أفضل حاجة ما يكونش ليه سكرتاريه إلا إذا كانوا عاوزين يخشوا السجن

11 يعمل بالحكمة القائلة لا أسمع لا أرى ولا أتكلم ولا أمارس الحكم علشان أروح لبيتى سليم بعد مدة الخدمة

12 يفضل عدم ذكر أسمه فى كتب التاريخ ماهو إللى حا يتكتب حا يتمسح بأستيكة بعد ما يغور فى داهية ( راجع كتب التاريخ من أول مسح أسامى الفراعنة من على المسلات ونسبها لفرعون تانى وحتى مسح أسم رمسيس من على محطة المترو وتسميتها بأسم الرئيس السابق)

13 يستحسن ما يكونش ليه علاقة بالحاج أبو عمامة لأنه مش مضمون التعامل معاه

14 لا يشترط صحيفة سوابق ما هو بعد 8 سنين صحيفة سوابقه حا تتملى يعنى حا تتملى

فمن يجد فى نفسه الشجاعة والمواصفات السابقة أن يتقدم بالطلب فى الكشك إللى قدام مجمع التحرير مشفوعا بخطاب توصية موقع من صاحب طظ فى مصر والشيخ حسان

الوسطاء يمتنعون