رسالة الى المفتى يوساب<صائد الذباب>

[صائد الذباب]

بسم الرب يسوع المسيح

امبارح ليلاً وانا امر بفترة مرض شديدة الزمتنى الفراش...فتحت الموقع هنا وبدأت اقرأ بعض

المواضيع...فبطبيعة الحال رجلى ودتنى لموضوع للحبيب..... الاخ.... القبطى..... الهمام

المصرى .....الفرعونى....الاخ يوساب...باسم <الجديد>...ويارتنى ما دخلت ...الا

وعديكم على الحرارة اللى ارتفعت...ووصلت لدرجة الغليان فى دمى...الحليوة

ابو مخ لمييع ..قرأت لةاول ماقرات وما وقع نظرى على اقوالة وفتواة المضحكة المبكية بجد

هو فتوتة بأن البنت اللى خطفها هذا السنى ابو دقن بنى..ومعة حفنة من الاوغاد..

فتى فتوة لو وصلت لاهل البنت هيموتوا كمداً دة غير ان كلام موقعنا فشر فى فشر

فتوتة بتقول ايية....قال ايية يا خواتى البنت هى اللى عايزة تنخطف!!!!

علشان مش لقية حد يعبرها ولا لقية حد يستر عليها ويتجوزها؟؟؟؟!!!!!!!!!!!!

للدرجة دى مخك اصبح فى الكلتش ....يعنى بنبهتك كدة يا اخ يوساب البنت هى اللى عايزة

كدة؟؟؟...المهم ...وطبعاً الاستاذ الفهييم ابن يسوع وابن المدارس قبل ما يفتى بهذة الفتوة

ام راح قال...وجايز يكون كلامى غلط؟؟؟؟ اعوز باللة منك يا شيخ ....طب انت مش عارف

حاجة فى اى حاجة....حد قاللك تتحفنة بكلامك وفتواك؟؟؟ادام مش عارف الصح من الغلط

لية بترمى البنت بالكلام دة......حرام عليك....كلامك كدة معناة ان اخوتناالبنات ممكن يعملو كدة

لما قطار الزواج ميوصلش ليهم؟؟؟؟؟؟

تخيل ان اختك هى اللى حصلها كدة...وانا جيت بغلاسة وعدم فهم وقلت اللى انت قلتة عنها

ايية هيكون رد فعلك ياحلو معايا؟؟؟؟ ولو مش مصدقنى اننى اعرف اهلها كويس

هستسمح المسؤلين عن المكان واطلب من اهلها يبعثو برد عليك يا مفتى الديار المصرية

علشان يعرفوك الحقيقة وتعرف بعد كدة تركبلك جلدة جديدة لحنفية الفتاوى اللى بتخر منك

************************

طبعاً بعد ما الحرارة للعبد للة ارتفعت بل انطلقت كالصاروخ ضاربة نافوخى المولع اصلاً

قمت من مكانى وجلست امام الكمبيوتر...لاننى كنت نائم واخى <اخو صائد الذباب>

هو اللى كان بيقرأ لى هذا الموضوع....فجلست...وجتلى حالة غريبة...قلت لازم اشوف الاخ يوساب....كاتب ايية تانى فى نفس موضوع<الجديد> فجبت الموضوع من اول صفحة

وقلت يمكن الاقى مادة فكاهية لى اكتب فيها ...مهو واضح ان الاخ يوساب صاروخ

من الفكاهة....

من اول سطر ...ضحكت...اسمعوا معايا بيقول ايية<<اللطف من ثمار الروح>>يا سلام ياعبد السلام....اللطف ....حاجة غريبة...انا اعرف ان اللطف من ثمار الجنون مش الروح القدس...

تانى شىء...الراجل قال على كل الاقباط هنا انهم بيحربوا فى معركة غير نظيفة؟؟؟؟؟؟؟؟؟؟

واننا بنستخدم فيها كل الاسلحة التقليدية....والغير تقليدية وطبعاً الاسلحة الممنوعة

وبقول كمان<<يبقى لازم نؤمن بوجود اللة وسيطرتة على ادوات الانتاج...عفواً ...اقصد

سيطرتة على كل شىء>>..يعنى احنا يا اخ يوساب مش عرفين ربنا...يعنى

انت بتأكد شتائم اخوتنا المسلمين اننا كفرة؟؟؟؟...اديها لخبطة ادى...


ثالث شىء: بيقول ..لافض فوة...الحبيب يوساب...فكرة المساواة بيننا وبين المسلمين

فكرة باطلة...ياليلة سودة...لان المسلم لة الارض ونحن لنا الجنة...

كلمة حق اراد بها باطل....يعنى يا يوساب يا حبيبي لو انت مقتنع بكلامك دة...طب لية

انت عضو هنا؟؟؟؟ انت مش عارف ان من اول اهداف الموقع دة محاولة المساواة بيننا وبين

اخوتنا فى الوطن من المسلمين؟؟؟؟انا مش عارف الاخ يوساب دة بيتعاطى ايية بالظبط

وبيكمل الحلو ....لابد نؤمن انة ان طلبنا من اللة شىء حسب مشيئتة فانة يسمع لنا

ياسلام على الكلام....تصدق باللة ياراجل ...انا اول مرة اسمع الكلام ....واول

مرة اعرف كدة...نفس الاسطوانة المشروخة بتاعة الناس العجزة المتواكلين..

يعنى احنا نقعد فى بيوتنا وهاتك يا صلاة .وتسابيح واطلاق بخور ...لنطلب من الرب ان يعطينا

بالزمة دة كلام واحد عايز يأخذ حقة فى حياة كريمة....وطبعاً كلمة حق يراد بها باطل

وهو اننا نترك الكلام فى موضوع حقوقنا ونسبها على ربنا...ونعمة باللة يا حلوة

رابعاً:قال الغنداف كبير الغنادييف يوساب...فكرة التمرد والاعتراض والرفض ممكن تصلح

لعالم الروح ضد الهرطقات...ولكن لا تصلح فى الامور المادية..فياريت يكون فية هدوء

مبنى على الايمان واننا محفوظين ولانتمرد....

حد بقى يرد علية ....كلامة كلة غلط فى غلط ...وباين كدة انك لمؤخذة عندك حول فى

الفكر...ياراجل انت شقلبت الحقيقة....يعنى لما احب اخذ حقى من المغتصب ادييها

هدوء وخنوع وصلاة فقط....ولما يكون فية هرطقة يكون التمرد عهلى الهرطقة باليد وليس

بالهدوء....طب انت كل كلامك هرطقة ...وهرطقة مضروبة كمان مش اصلى ...يعنى

اى عيل صغيير هيعرف يرد عليك....انا مش عارف الكلام اللى بيقولة يوساب ملقاش حد يعترض علية لية ؟؟؟

خامساً:المفروض انة لايجب التنازل فى كلمة الحق ...لكن ممكن التنازل عن الماديات

وربنا بيعوض اضعاف

لكن ما يحدث هو تنازل عن كلمة الحق وتمسك بالماديات والذاتيات.....<طبعاً دة كلام يوساب اللى فات>
الرد....يا حبيبى يوساب ....المسيح لما دخل الهيكل ولقى الباعة والسيارفة...قلب موائدهم

وطاردهم ....يعنى الحق مقرون بالكلمة والمادة....

المسيح قال لهم< ان بيتى بيت الصلاة ..وانتم جعلتموة مغارة لصوص>...ولم يقل هذا القول

الا بعد ان طردهم بالفعل....يعنى الحق هو...قول وفعل ...يا حلولة ياوردة يافللة

لكن تقوللى الحق قول وتتمسك بقولك فقط ...وربنا بيعوض عليك...فعلاً يا اخى يوساب

دة لو اللى موجودين هنا فى المنتدى ذيك كدة...يبقى يعوض اللة ....يعوض اللة يعوص اللة..... على المسيحية والمسيحين فى مصر ....


كلمة اخيرة ....اذا كان تفكير بعض الاشخاص الذين ينتمون للاقباط بهذا التفكير من تهبيط

العزائم ...ونشر الوعى الهدام وخداع الاعضاء بمعسول الكلام ..واتيان الباطل فى ثوب الحق

فخير لهؤلاء ان يربطو ارجلهم بحجر ويلقون بانفسهم فى ماء النيل ...لانهم اصبحو حجر عثرة

لكثيرين

وانا اشك ان يكون الاخ يوساب مع انة جولد يوزر ...اقول اشك ان يكون قبطى من الاساس

او ان الاخ يوساب طفل غرير لا يقدر ويعرف ماذا هو كاتب

او هو رجل قد اكلت السنوات الكثيرة عقلة فأضحى يخرف تخريف العواجيز بل اكثر من ذلك

او هو مجموعة من الاشخاص ..كل يكتب حسب اهوائة

ارحمنا ياراجل ....يرحمك اللة ....عمال تلغبط فى كلامك ......وفكرنا صغار قدامك

<<ولسة يا ما فى الجراب ياحاوى ......بس دلوقتى الحرارة اتنيلت اكتر>

سلام الرب يكون معكم جميعاً

صائد الذباب....واخطاء البشر الهباب