مصر تحتاج الى 4517 كنيسة جديدة

[ماجد منيب]

عزيزي مينا
كمحاور وصديق مش عايز أخسرك، والشئ الثاني ان مهما اختلفنا، طالما الاحترام متبادل فلن أمل من الحوار، دعوت لي من قبل بأن أُرزق بولد اسمه مينا(يعني مطلوب تغيير هويتي كمسلم حتى أنول رضاك) طب تحب أدعيلك بولد تسميه محمد؟. الشئ الثاني الآن هو دعوتك الى دولة مستقلة، أقول ايه طب ازاي ؟؟ مش معقول ، هل حتفكوا الكنائس وتاخدوها معاكم، وماهي خريطة هذه الدول المسيحية، هل حتاخدوا 10% من الصحراء، ووادي النيل والبحر الأحمر والبحر الأبيض، الشئ الثالث اني باقول يمكن الكنائس أكبر شوية، لأ مش يمكن ده أكيد، وأنا شبراوي المولد،ودخلت الكنائس بنفسي مثل سانت تريزا،وماري مرقس، وشفت المساحات قد ايه، ماري مرقس لوحدها قد مساجد شبرا تقريباً(ده على سبيل ان المبالغة تفيد التعبير)، ولو دخلنا الأديرة في الحسبة، يبقى الكنائس حتكون أكبر من المساجد، فقد دخلت دير الأنبا مقار، مع صديق مسيحي(شريكي) منذ مايقرب من 7 سنوات لشراء لبن (شريكي المسيحي هو الذي يدير السوبر ماركت لإني لاأقيم في مصر وبيودي نصيبي لأخويا أول كل شهر) ودير الأنبا مقار مساحته قد مساجد مصر تقريباً ، ولكني لم أدخل الأديرة في الحسبة لأنني أعلم انها غير مفتوحة للمصلين(أو الشعب القبطي كما تقولون) . كمان شفت كنيسة الشرابية على قناة الحياة وحسيت ان المحاضرة التي يلقيها القس تنعقد في مجلس الشعب وليس كنيسة، وكل ماذكرته، هو أسس للمقارنة وليس رفض المقارنة.وهذا حقكم. تطالبني كمسلم أن اتبنى قضاياكم، طب ازاي ، يبقى نفاق لو قلتلك ممكن ، أنا ممكن أتفهم قضاياكم كشركاء واخوة في الوطن، ولكن لو ده ممكن يحصل يبقى بالمرة نضم الكنائس لوزارة الأوقاف. طبعاً لأ صاحب القضية بيتبناها، وبيجد من يناصرها من غير أصحابها.
والدولة المستقلة دي مستعد أفتحها مادة للحوار عن تكيفيتها اقتصادياً، وسياسياً، وعسكرياً،وكثقافة وتراث وتاريخ كيف سنفصلها. مستحيل. أبسط شئ مين اللي حارب اليهود، مثال ساذج مين اللي فاز بكأس أفريقيا لكرة القدم،(سمير عدلي المدير الاداري مسيحي، والجمهور 10% منهم مسييحيين)، كيف سنفصل تاريخ مشترك على مدى أربعة عشرة قرناً ن عشنا وتجاورنا، وتحاببنا واختلفنا واتخانقنا وعانينا من أزمات اقتصادية و..و....و....ن الى مالا نهاية، بعض الأمور بتشعركم بالظلم ولكن بالاقيلها سبب بل أسباب، فمن الكلام ده أستطيع تفهم نسبتكم المحددة في الجيش، والشرطة لانها ضرورة لحفظ الأمن القومي.وعندما أرى موضوع باسم رئيس قبطي لمصر ، والكل بيتسابق بانه سيطمس كل ماهو اسلامي في الحكم اذا كان الرئيس، استطيع أن اكون أكثر قناعة برفضي لرئيس مسيحي لمصر.
أدام الله التعايش بيننا.
ماجد منيب.

[Mena0064]

شوف يا ماجد، إنت ذكى و هادى و تقرأ ما بين السطور. و أنا ليست كل هذة الصفات الحميدة، أنا صريح و مباشر لكنى غير دبلوماسى و لا أعرف إزاى أغمس الكلام فى العسل.
أنا سعيد بمساهمتك الأخيرة لأنها كلام من الأخر. لازم تعرف إن قضية الأقباط أهميتها للمسلم المفروض تكون كبيرة، ليس لأننا شركاء الوطن إلى آخرة من كلام الجرايد و الخطب. بل لأنها هتكون سابقة مهمة الأقباط أكبر أقلبة و بالتالى يرثون الدور الليبرالى و هزيمة الأقباط هى علامة أكيدة لإكتساح المتشددين و إرجاعنا مئات السنين للوراء.
الحقيقة المصريين عملوا نفس الغلطة بتخليهم عن أهل النوبة و اليهود المصريين و باقى الأقليات من وقت الثورة و ها الأقباط يدفعون تمن إندثار القوى الليبرالية غاليا، لا تستهين بما ترمز إلية القضية أؤكد لك الدور على أمثالك بعدنا.
سواء مقتنع بوجهة نظرى أم لا دة حقك و لا أجبرك على شئ لكن يا عزيزى لا تأتى و تقوللى إن كلة تمام، هل تظن إنى سبت بلدى و عائلتى طمعا فى مر الغربة؟ هل تظن إنى لا أتمزق كل ما فكرت فى مصر؟ إذا كنت لا ترى مشاكل الأقباط فلا الومك لأنك لا تعانيها كونك مسلم لكن يا أخى فى الوطن لا تكتم صرختى لأن الألم فى عظامى أنا.
أرجوا إنك تكون فهمت أنا كنت غلس لية لكن إذا كان إسلوبى حاد فأنا أعتذر بلا حجج. حقك على! و إنشاللة تخلف بدل محمد عشرة.

بالنسبة للوطن المستقل، فهذا أبغض أمنياتى لكنة بلا شك أفضل من أن يعيش الأقباط مهددين بسوط الدولة الدينية و حكم الشريعة، أنا لا أتمنى حدوث هذا أو ذاك و لا أعرف كيف و أين و لكن إذا وصل الأمر لهذا الحد فما باليد حيلة.

[Bahnass]

عزيزى ماجد
يا ألف أهلا" بأهل شبرا

ياترى هل سمح وقتكم بزيارة مسجد ابن طولون (وده له فى تاريخ بناؤه حكايات) ... السيد البدوى .. السيدة زينب أو أى مساجد كبرى !!!!!!! مش مهم بلاش دى

الأهم إن فى الديانة المسيحية يحتاج الأمر لدار عبادة لممارسة شعائر خاصة للزواج والصلاة على الميت وتعميد المولودين وخلافه
طقس زواج + طقس خطبة (واحدة على الأقل) هنا يحتاج فرد واحد الكنيسة كاملة لحسابه مهما كان حجمها ولا يصح أن يمارس هذا السر المقدس(الزواج) فى قاعة عادية
إذن هذه احتياجات إخوة الوطن وهم مستعدين لتحمل نفقات شراء الأرض ودفع فاتورة الكهرباء (التى لا يدفعها غيرهم)
كم كيلو متر تعتقد أنها مسافة مناسبة تمشيها لمسجد لتصلى الجمعة (رغم أنك تثاب على كل خطوة تخطوها)

الكلام كثير بس انت أذكى من إنى افصله لك
وياسيدى يارب تخلف عشرين محمد (أفترض أن الحساسية من هذا الاسم تزول بزوال سببها)

ربنا يبارك حياة الجميع

[ماجد منيب]

أعزائي مينا وBhnass
أولاً لم اجد أي شئ يغضبني في مداخلتكم اللطيفة وكلها وجهات نظر واحنا الحوار لإما يقربنا، لإما يخلينا محلك سروكن مش عايزه يبعدنا، وده سبب الدبلوماسية اللي انت بتوصفني بيها ودي حقيقة.
عزيزي Bhnass، تصدق بالله، اني أول ماحسيت انك من شبرا، نسيت كل حاجة ونسيت المداخلة، ونسيت انك مسيحي وافتكرت شبرا ، ويمكن فيه اغنية باحبها لمحرم فؤاد بتقول:
باحبك ياشبرا باحبك صحيح
ياموال واوبرا وعربي وفصيح
ياجامعة محمد وعبد المسيح
على بسطة واحدة..بعد كدة مش فاكر
والبسطة الواحدة دي جمعتنا كتير جداً ، والشارع الواحد جمعنا كتير جداً، في الزمن الجميل، اللي ارجو الا يكون قد ولى. ومش قادر أنسى العشرة اللي جمعتنا في الأفراح والآمال والالام، مناسبات الزواج، والعزاء،لازالت حاضرة في ذهني،وستظل حاضرة حتى نهاية عمري، اللي مش فاضل فيه كتير.
نخُش في الموضوع، أنا لم اجزم ان مساحة الكنائس في مصر تجعل عددها مناسباً، ولكن قلت ينبغي ان يؤخذ ذلك في الاعتبار. وأن الكثير من المساجد تتسم مساحتها بالصغر في المساحة وتحت المنازل، ولاتُعرف اصلاً بالمساجد.
وبالنسبة لبعد المسجد عني فاعتقد انه لايجب أن يزيد عن كيلو.
مينا لم تكن غلس ولاحاد ولاحاجة، وطالما بنتناقش لازم نستحمل بعض، وحاشا لله أن تكون غلس طول عمرك راجل ذوق، ولكن صدقني بالنسبة للدولة المستقلة فلو خُيرت اني أعيش في مصر واغلبها مسيحيين حيكون أفضل لي من الاستقلال.
حارجع لBhnass انت من شبرا واضح، مش عارف أنا بشوف في شبرا نموذج جميل للعلاقة بين المسيحي والمسلم، ايه رأيك، ولاأنا من أيام زمان شوية؟
على فكرة يابهنس أنامقيم خارج مصر ومش مستقر في دولة،وأول مابارجع مصر وأدخل شبرابالعربية بافتكر فوازير عم فؤاد لما كان بيقول أصل اشتقت لشارع بيتنا سبت الدنيا بحالها وجيت، بس بدل بيتنا بأقول شبرا.