اللجوء الدينى للاقباط

[engmms2011]

أ/ مينا أنا فعلاً شاكر لردك ... بس ما تضحكش عليا حسابى ما يعديش 40 ألف مش عارف يمشى ولا...

ورسالتى الى أ/ماكس ... أنا برده قريت قبل كده مشكلتك .. وعلى فكرة مش مشكلتك لوحدك ... بالعكس ...أنت مميزعنا لسه سنك غير تقدر تتعب شوية هنا أعمل قرش وأتعلم لغة وسافر .. ماللى عنده بيت وعيلين وزوجة يعمل أيه بس ... صدقنى أشكر ربنا ... ممكن تكون ظروفك أحسن من كتييرين ... وما تجيش أوى على الأستاذ / جانج لأنه صدقنى عايز لينا الخير بس مش هايقدر يساعد ...على العموم ربنا يبارك الجميع ... سلام المسيح للجميع

[maxpayne]

أخواتي الاعزاء المباركين
سلام المسيح معكم جميعا
اشكركم كلكم علي حسن المتابعه و الاهتمام بالرد و اقدر كل شخص بذل من وقته للرد علي مشاركتي
بالنسبه للاستاذ مينا بالفعل انا حاولت ان لا امشي مظبوط و ان التف و اطلب فيزا للسياحه بدافع الدراسه لانك كما تعلم يجب ان تبرر لهم لماذا انت ذاهب اصلا للسياحه ؟ و كان السياحه بحاجه لاسباب و مبررات و خلافه و لكنني علي الرغم من اوراقي السليمه و اهدافي المحدده و الوقت البسيط الذي طلبت علي اساسه الفيزا فقد واجهت سياسه متعنته الهدف منها اصلا عدم مساعده اي شخص مصري مسيحي علي المضي قدما في التاشيره او الحصول عليها لاي سبب باي مده للسفر اصلا بغض النظر عن ما تقدمه من ادله او علمه انك ستعود ام لا انما هو ينفذ اجنده معينه و تعليمات واضحه محدده كما فهمت من الردود علي الشكاوي التي ارسلتها لكبار المسؤلين في الحكومه النيوزيلانديه باختصار السفارات مفتوحه فقط علشان تلم فلوس لا اكثر و لا اقل يعني عمليه نصب تقدر تقول و من يسافرون هم قله قليله جدا و غالبا من المسلمين او كما قلت من دول البترودولار الارهابيه حتي لا يتهمهم احد بانهم لا يقومون بوظيفتهم او انهم يعطلون البت في الاوراق لاسباب معينه ياراجل ده علشان تعرف مدي كذبهم كاتبين علي موقعهم انهم في البت في مشكلتي بيحاولوا يتحلوا بالموضوعيه و الحياديه و يقرئوا المشكله من وجهه نظر مرسلها و في واقع الامر هم ضربوا كل هذا بعرض الحائط و عملوا العكس تماما و هم يقرئوا مشكلتي كانوا متحيزين و متعصبين و يقرئوا الرساله من وجهه نظر الموظف الذي اعطاني الرفض و في الاخر قرارهم نهائي و لا يمكن الطعن فيه او شكوتهم و مهما بذلت من مجهود صوتك لن يصل لاي مسئول و الردود محفوظه و لن تحصل علي حقك او تعويض عن كل ما لحق بك من اضرار من هذه المساله

بالنسبه للاخ انج انا عارف اني مميز عنك بسني بس التميز ده مطلوب بره اكتر من هنا و انا عايز اوظف كل ميزه في في مكانها الصحيح علشان اقدر اربح من وزناتي كقول الكتاب و انت كما تري ان من احد اهم شروط الهجره السن الصغير و انا بصراحه صعبان علي حالي اضيع عمري هنا في هباء تذريه الريح عن وجه الارض و اكتشف اني لم احصل علي اي حياه كريمه مما كنت احلم بها لمجرد اني ماعرفتش اكافح و اعافر و اهاجر و اعيش في البلد اللي اختارها انا كانسان حر مش اللي اتولدت فيها غصب عني و لم يكن لي اي يد ان اولد و اعيش و اتربي في بلد منكوبه مشئومه متعصبه كبلدنا مصر انا مستوايا ممتاز في اللغه و دراستي كلها بالانجليزيه و قولتلك مشكلتي انه العمليه كلها اوراق مطلوب ورق يثبت كل حاجه حضرتك نفسك ورقه بالنسبه للدوله بتاعتنا لو ضاعت انت مالكش وجود بالنسبه لها و لا راي حضرتك ايه
الشغل النهارده هنا بقي مستحيل لاي شاب تروح للمسلم مش عايز يشغل الا مسلم زيه او يمارس تعصبه و تزمته تجاه المسيحي و المسيحي جبان هنا و في المهجر و علي فكره ( زي الاخ اللي اسمه بيرفهارت اللي عمال يفتي علشان قاعد بره طيب انا بقي باقولك لو انت مقتنع بالكلام اللي بتقوله تعالي خد مكاني هنا في مصر و سيب كل حاجه عندك و خليني انا اعيش مكانك في بلاد المهجر و اوعي ترجع تاني هناك وانا اخد مكانك هناك ووريني تطبيقك العملي لشعاراتك بتاعه المواطنه و رفضك للمسيحيين ترك البلد و اعاله المسيحين و الكلام اللي بتقوله ده )
بيشغل المسلم و يتملقه و ينافقه علشان يامن شره علي حساب المسيحي الشاب اللي هو اولي بالرعايه و الاهتمام منه و لنا في نجيب ساويرس اسوه حسنه اللي طلع بمنتهي البجاحه يقولك انا 90% من اللي بيشتغلوا عندي مسلمين و سكرتيرتي محجبه و اللي بيبعتلي طلب عليه باسم الاب و الابن و الروح القدس باركنه في مهزله اكتر من كده و بعدين هاعمل ايه في البلد يا استاذ انج عايزني اغلط و اتجوز و اجيب اولاد في البلد اللي مافيهاش امن و لا امان و لا باينلها رايحه في اي داهيه اليوم الجايين دول و لا اعيش كده و خلاص ايام و اقضيها لحد ما اتكل علي الله و اموت صدقني لو كان ينفع اعمل قرش و اتعلم حاجه من هنا لا كنت فكرت في سفر و لا هجره و لا دخلت هنا و اتكلمت و اشتكيت و رديت و هادفع نص عمري و اسافر علشان استمتع بنصه التاني و انا عايش هناك كبني ادم و مايجيش علي وقت و انا في رقبتي حمل و عائله و مسئوليه زي حضرتك و ابقي في حييص بيص مش عارف اروح و لا اجي و لما اسافر هايبقوا تقل علي مش هاعرف اتحرك منهم ( مع الاعتذار طبعا انا لا اقصد الاهانه و لكنه تشبيه تمثيلي مش اكتر ) اسف يا استاذ انج بس ارجوك لو عندك نصيحه لي افضل تتعلق بالسفر فلتتفضل علي بها اما ماعدا ذلك فاعتقد انه كلام لا معني له و لن يقدم او يؤخر و لا انت رايك ايه ؟

سلام المسيح معاكم جميعا اخواتي الاحباء و ارجو و اصلي للمسيح الهنا الصالح ان يعطينا بركه و نعمه و يحقق لكل منا رغبته و يساعدنا فيما نصبو اليه و يسير معنا في حياتنا حتي المنتهي و لا يتركنا دائما حتي يجمع رعيته كلها في الملكوت الذي سبق و اعده لكل المؤمنين به
اخوكم
ماكس بين

[أبرهة العصبي]

ماكس انا كمان فاكر اللي كتبته
محدش قال ان الموضوع سهل
مشفتهاش دي خالص
واي حد لازم ياخد امتحان الالتس كله بيعمل كده مش هتقولله وحياة ربنا الانجليزي بتاعي حلو
مش دي جزاة الراجل انه حاول يساعد وانت اللي كنت بتلح عليه اصلا
مفيش حد بيفرمل من الخطوات اللي قلت عليها دي فيه ناس طلع دينهم بس في الاخر قدروا يسافروا... حاولوا في كذا حتة بكذا طريقة وفي شهور لاقيتهم حاطين صورهم وهما لابسين الجاكيت الصوف

حاول تاني
ومفيش حاجة اسمها متزمتين
اللي بيعملوه ده عشان البلد متحتلش من شعوب يدمروا موارد البلد ويجيبوها الارض وساعتها حكاية الشريعة دي (اللي مستحيل تحصل) هتبقى اقل مخاوفهم بالنسبة للي هييجي من ورا ده
انا اسف لو طريقتي ضايقتك
صديقك فيني ججنتي :)

[lorans]

من يهرب من الضيقه يهرب من الله نفسه ومن لايحمل صليبه ويتبعنى فلا يستحقنى فى العالم سيكون لكم ضيق لكن ثقوا أنا غلبت العالم اتعتقدون انه يوجد فرودس خارج مصر. اللجوء الى الله هو الانقاذ هو الحياه الحقيقيه . مايحدث فى مصر يحدث فى بلاد اخرى واكثر من ذلك .

[peter x]

سلام ونعمة
انا شايف ان الموضوع ده مهم جدا اليومين دول وانا بجد اتخنقت من البلد دى و على فكره انا معايا اوراق تثبت انى مضطهد دينيا بس المشكله انى مش عارف اقدمه فين يعنى انا عندى فرصه ان اقدمه فى اى سفاره خارج مصر ومعرفش ده ينفع ولا لا بس كل الى كلمتهم قلولى ينفع تقدم الورق الى اى سفاره بس من اى دوله غير مصر فا انا عاوز نصيحتك يا جماعة هل من الممكن تقديم الاوراق فى اى السفاره ولا لازم اروح الدوله الى انا عايز اعمل لجؤ فيها و شكرا

[abomeret]

بيتر .. ربنا معاك
انا اول مرة اشارك فى هذا الموضوع .
معاك ورق رسمى انك مضطهد دينيا .. دة عظيم .
توجة الى سفارة ( امريكا مثلا ) بالقاهرة بأوراق سفر ( من البنك التجارى الدولى ) وبعد ماتحدد ميعاد .. وذلك للسفر زيارة ( فقط ) .. وانت فى الشباك وريلها الورق ( وياريت يكون مترجم ( فؤاد نعمة مثلا ) .. هتاخد فيزا زيارة ( بس ياريت يكون فية حد تعرفة هناك ) .
واول ماتوصل هناك فى المطار .. قدم ورقك واطلب لجوء دينى .
بالتوفيق وابقى طمنا .

[peter x]

المشاركة الأصلية بواسطة abomeret

بيتر .. ربنا معاك
انا اول مرة اشارك فى هذا الموضوع .
معاك ورق رسمى انك مضطهد دينيا .. دة عظيم .
توجة الى سفارة ( امريكا مثلا ) بالقاهرة بأوراق سفر ( من البنك التجارى الدولى ) وبعد ماتحدد ميعاد .. وذلك للسفر زيارة ( فقط ) .. وانت فى الشباك وريلها الورق ( وياريت يكون مترجم ( فؤاد نعمة مثلا ) .. هتاخد فيزا زيارة ( بس ياريت يكون فية حد تعرفة هناك ) .
واول ماتوصل هناك فى المطار .. قدم ورقك واطلب لجوء دينى .
بالتوفيق وابقى طمنا .

شكرا حضرتك على الاهتمام بس انا خايف اقدم فى مصر وانت عارف طبعا ليه فا انا متاح قدامى اقدم الاوراق فى السفاره الامريكية فى لبنان فعاوز اعرف ده متاح ولا لا وفى نفس الوقت عاوز اعرف هل السفاره بتعرف الحكومه المصريه حاجه او اى تفاصيل حتى لو كانت صغيره عشان انا عندى اهل فى مصر اخاف عليهم من الامور دى وشكرا تعب محبتك.

[mina_]

استاذ بيتر

انا اختلف مع الاستاذ ابو ميرت اختلاف كلى

هذا الورق ليس لة اى فايدة فى مصر بس ممكن اول ما توصل امريكا تقدمة و دة حيقوى موقفك

افضل انك تقدم على فيزا سياحة عادى جدا من غير ما تقول انك مطهد و انك عايز تتفسح

او ممكن تروح لبنان و من هناك تقدم الورق للمفوضية العليا للاجئين بس اهم حاجة اوعى تقدمة فى مصر

فية محامى اسمة جورج مليكة فى امريكا بيمسك موضوع اللجوء و رقمة 7145630111

كلمة من على النت و قولى اية الاخبار ..

فى انتظار الجديد منك

و يا ريت اى حد من برة يدخل يساعدنا فى المعلومات .. اية كل الجالية القبطية اللى برة مفيش حد عايز يساعد ؟؟؟؟؟؟

سلام المسيح

[sant1]

الافضل انك تقدم فى امريكا نفسها .... وياريت لو فى حد عندة خبرة فى المواضيع دية هنا فى مصر او برة مصر يقولنا

[mina_]

السلام للجميع

اية يا جماعة مفيش اى اخبار ؟؟؟؟؟؟؟

[nour10]

أخوتى الأحباء
سلام ومحبه ربنا يسوع المسيح يكون معكم
بالنسبه الى السفر الى الخارج أنا أمامى فرصه لجميع من لهم الحلم السفر الى أوربا و لكن الشرط الوحيد المطلوب هو المثابره والقدرة على العمل و مواجهات الصعاب وسوف أشرح لكم ( من له الرغبه ) كيفيه السفر

[nour10]

هذا الموضوع بجد مش هزلى السفر سوف يكون لبلد أسمها الجبل الأسود بلد ساحلى تقع على البحر المتوسط جنوب صربيا وقباله إيطاليا وهى بلد سياحى وأنفصلت ونالت أستقلالها عام 2006 وسوف تنضم الى الأتحاد الأوربى خلال العام المقبل من يريد أن يحصل على إقامه تتيح له العمل أيضا المراسله و لاتوجد هنلك معوقات للسفر أنا على أتصال بشركه هناك تسهل كل الأجراءات وتعطيك الأقامه

[kivan]

سلام المسيح

هذا الموضوع رائع و مفيد جدا
و انا من واقع خبرتى فى التعامل مع ملف اللجؤ
حيث اننى مصرى مسيحى متزوج و لى ولد و بنت و مقيم فى بلد عربى
تقدمت بطلب لجؤ الى المفوضية العامة لشؤون اللاجئين و مرت بنا مشاكل كثيرة مع موظفين المفوضية من تعنت و لكن لاننا كان معنا ما يثبت من اوراق رسمية تعرضنا الى الاضطهاد فى مصر و ما يثبت ايضا الخطر علينا فى حال العودة القسرية الى مصر
و لكن فى النهاية حصلنا على الموافقة على التوطين و تم رفع الملف الى i.o.m التابع لوزارة الهجرة الامريكية
و نحن الان فى انتظار مقابلة المحلفين و هى الخطوة النهائية قبل موعد السفر
و الى الان لا اعرف ما هى اجرائات السفر او ماذا سيكون الوضع فى داخل الولايات المتحدة
هل نجد من زوار المنتدى من المقيمين داخل امريكا ليعرفونا ما هو باقى الاجرائات

الرب يبارك خدمتكم

[In Jesus name]

سلام ونعمه للجميع من فضلكم عندي استفسار ضروري جداا
انا والدتي اخدت اللجوء من امريكا و بعتت لأخواتي و بابايا واتوافق علي استمارات ال i-730من فيزا سنتر و اتبعتت للسفاره والسفاره بلغتنا و بعتتلنا الاستمارا و عملوا الكشف الطبي و المفروض نبعت بال dhl لتحديد ميعاد مقابله و طالبين صور تثبت العلاقه مع والدتي . قضيه والدتي اتقبلت بناء علي مشكله تعرض لها بابايا و تم تلفيق قضيه ليه و بعتنا كل المستندات والحكم و كل التفاصيل و برغم كده اتوافق عليها و نشكر ربنا لكن الخوف انهم يتعنتوا معاهم و انا بحاول ادور علي معلومات عن المقابله او تفاصيلها لكن مش لاقيه اي معلومات او المده او ياتري ممكن بعد كل ده يترفضوا في المقابله. من فضلكم لو حد يعرف اي حاجه عن موضوع follow-to-join asylees يساعدني .
السؤال التاني طبعا والدتي قدرت تبعت لأسرتي كلها ما عدا انا لأني فوق ال21 يا تري ايه الحل ليه مع السفاره انا عارفه ان احتمالات قبولي كسياحه كده ضعيفه جدا . و مظنش انهم هيهتموا بظروفي اني هكون بنت و عايشه لوحد هنا و اني محتاجه امون معاهم حد يقدر يساعدني بحل . أشكركم علي تعب محبتكم.

[In Jesus name]

سؤال تاني من فضلكم ياتري ال biographic information and fingerprints جوه السفاره بيكشفو عن امريكا بس ولا يقدروا يعرفوا بيانات لو في مشاكل في مصر من خلال ال fingerprits جوه السفاره؟