مسلسل الإختيار

[net_man]

الإختيار .. !!
ا-------------
.
بعد إذاعة حلقتين فقط من مسلسل الإختيار ، اللى بــ يجسد السيرة الذاتية لأسطورة الصاعقة المصرية #الشهيد_أحمد_منسى .. وحالة السعار اللى اصابت الإخوان وكل مراكيبهم .. أصبح من الواضح لينا كلنا ، لييه كان فيه حملة ممنهجة على السوشيال ميديا وعلى كل قنوات الإخوان وأبواقهم الدعائية والإخبارية والتوك شو بتاعهم ، لتشويه المسلسل قبل عرضه .. ونشر أكاذيب وسفالات عن الجيش المصرى .. و عن كل اللى كان ومازال بيحصل فى سيناء ..
.
ومش كدة وبس .. لكن القيام كالعادة بمحاولة إغتيال الوعى الجمعى للمصريين بالحديث عن المسلسلات فى رمضان فى إطار دينى ، كعادة التلفيق والتزوير الإخوانى .. لأ وكمان محاولة إستفزاز المصريين باللعب على نغمة أجور الممثلين زى ما بيعملوا كل سنة .. والمرة دى كان التركيز على مسلسل الإختيار بالتحديد ، وبطل العمل أمير كرارة .. لدرجة إنه فيه سكريبت معين قامت اللجان الأليكترونية بنشره بكثافة فى اليومين اللى فاتوا .. علشان يشوهوا العمل ، ويستفزوا مشاعر المصريين بالشحتفة على الشهيد والتسخين على بطل العمل .. و النكتة إنه تم تداول الإسكريبت ده فى كل إستاتيوساتهم على الفيسبوك وتويتر بنفس الغلطات الإملائية اللى فيه ... ��
إبنك حافظ مش فاهم يا حاج ��
.
و لأن أفة حارتنا النسيان .. فالإخوان دايما بيلعبوا على الحتة دى .. وإذا كنا إحنا عاصرنا وشوفنا بعنينا قذرات الإخوان الإرهابيين ، و كل اللى عملوه فى خلال الــ 10 سنين اللى فاتوا من قتل وذبح وإغتيالات وتفجيرات .. لكن هــ ييجى وقت والجيل ده هــ يتنتهى .. ويبدأ اللعب على عقول الأجيال الجديدة من تانى ، وتلاقى اللى يقول ميين قال !؟ ... وإزاى !؟ .. وفين الدليل !؟ .. و ده ماحصلش ... و هنا بقى ييجى دور مسلسل زى ده علشان يؤرخ و يوضح اللى حصل ، و يوثق اللى هم عملوه بأحداث حقيقية فى حدوتة واحدة .. كجزء من تاريخ مصر فى الحقبة الماضية بكل الفظائع اللى عملوها ، وكل اللى إرتكبوه من جرائم فى حق مصر والمصريين ..
.
خوارج العصر ، وتابعهم قفة ، كانوا عارفين كويس جدا تأثير عرض مسلسل زى ده ، و فى فترة شهر رمضان بالذات .. لأن مسلسل زى ده مش هــ يتنسى .. لكن هــ يبقى جزء من أبجديات وذاكرة الدراما المصرية للأبد .. زى رأفت الهجان وجمعة الشوان وليالى الحلمية وغيرها من المسلسلات اللى ترسخت فى وجدان وعقول المصريين .. وعلشان كدة كانوا بــ يعملوا المستحيل لمنع خروج العمل ده للنور .. و لو ماقدروش يمنعوه ، يبقى على الأقل يشوهوا العمل ويشوهوا صورة البطل المصرى.
.
اللى حصل بقى إن كل اللى عملوه جاب نتيجة عكسية .. و زوّد درجة إلتفاف المصريين حول العمل وأبطاله ... و حالة العواء اللى سمعناها فى اليومين اللى فاتوا أثبتت إن المسلسل واجعهم أوى .. و بيجلدهم كل يوم .. زى ما عمل فيلم الممر بالضبط .. ويمكن أكثر .. لأنه بدل ما كان فيلم واحد .. دلوقتى عندهم 30 حلقة .. كل حلقة منهم ، فيها توثيق لجرائمهم ، وأسلوب تفكيرهم ، وفكرهم المتطرف المغلوط .. و فى المقابل فيها إبراز لصورة البطل المصرى ، بكل سماته الأصيلة .. واللى بالمناسبة مافيهاش أى مبالغة من أى نوع ! ��
.
التوثيق ده كان لازم يتعمل .. و دلوقتى قبل كمان شوية .. لأن لو إحنا ماعملناش ده ، ووثقنا حقيقة البطل المصرى ، والتضحيات اللى بيعملها أبنائنا من أجل الوطن .. هــ تلاقى توثيق من عندهم ، لصورة الإرهابى الكيوت المتدين الضحية اللى بيحارب جند الطاغوت وجيش فرعون اللى بيقتل المدنيين .. ومع الوقت ، و مع إستمرار عمليات التغييب الممنهج هتلاقى ألف صوت بيشكك فى جيشك ومؤسسات الدولة لحساب **** السكك .. ويتحول الإرهاب لجهاد ، و الإرهابى لمناضل ، والتطرف لتدين ، والجيش الوطنى لمجرد طغمة من الأوغاد اللى مايفرقوش حاجة عن جيش الإحتلال الصهيونى
.
الحلقة الأولى من المسلسل أرّخت و وثّقت حادث مذبحة رفح الأولى ، وربطت بعبقرية بين تصوير المسلسل وبين الحدث الحقيقى بلقطات حية .. هتفضل راسخة فى تاريخ المصريين لسنين طويلة .. لكن الحلقة الثانية هى اللى كان فيها تيمة المسلسل كله .. التيمة اللى بتعرض قدامك الصورة بكل وضوح .. صورة واضحة للحق والخير .. صورة بتقولك إن إنت صاحب القرار والاختيار للطريق اللى عايز تمشى فيه .. وبتكشف بكل وضوح زيف الفكر الخرفانى المتطرف اللى بيجرى وراء حلم هدم الدولة الوطنية ، وتدمير مقدراتها علشان بس يوصلوا للحكم ويحكموا ويطبقوا اللى هم بيقولوا عليه شرع الله ، واللى هو أبعد ما يكون عن الدين
.
التيمة كانت فى المقارنة الرائعة بين إثنين زملاء .. والإثنين نالوا شرف إرتداء البلدلة العسكرية المصرية ... الأول ساب بيته وزوجته اللى محتاجاه وأولاده .. وسافر علشان يدافع عن بلده ويحمى ناسه ، من الإرهابيين اللى قتلوا زملائه فى رمضان و هم صايمين ، و ماعندهمش مانع إنهم يقتلوا شعب بحاله .... والثانى ساب بيته وزوجته وأولاده ، وسافر علشان يدور على جماعات إرهابية ينضم لها تحت فكر الجهاد وتكفير الاخرين .. علشان يبدأ مسلسل جرائم خطط لها بنفسه ونفذ بعضها لكن بارد .. وراح ضحيتها زملائه نفسهم .. وكثير من الأبرياء اللى مالهمش أى ذنب .. ويمكن من هنا جاء تسمية المسلسل بــ #الإختيار
.
هو ده الواقع اللى بنعيشه بالفعل ... ناس إختارت بلدها .. وإختاروا إنهم يبقوا جزء من الفطرة السليمة للدفاع عن مقدرات الحق والخير سواء بالسلاح زى البطل أحمد المنسى ، أو بالتضامن كظهير مدنى زيك و زى معظم المصريين اللى فطرتهم سليمة .. وناس إختارت فكر متطرف ، وإنهم يبقوا أداة للقتل والتدمير والتخريب .. سواء بالسلاح زى الإرهابى هشام عشماوى .. أو بالتضامن والأفكار التخريبية زى بعض اللى بنسمعهم ، أو بنشوفهم بعنينا سواء على السوشيال ميديا أو فى قنواتهم المتطرفة
.
ما تقولليش مش كل إخوانى إرهابى .. لأن اللى إحنا شوفناه فى الكام سنة اللى فاتوا ماكانش برنامج مقالب من بتوع رامز جلال .. ولا القتل و السحل والتفجير اللى كنا بنشوفه عيانا بيانا فى الفضائيات وعلى الهواء كانت برامج مسابقات من سيربح المولوتوف .. لأ .. ده كان واقع مر .. شوفناه وعيشنا فيه سنين من أول الجلد فى الشوارع بإسم إقامة الحد ، وذبح المخالفين سواء كانوا مسلمين أو مسيحين .. وقتل النساء وضربهم فى الشوارع .. و صولا لحد إلقاء الأطفال من فوق أسطح العمارات .. وعلشان ما تزعلش يا سيدى .. أنا معاك .. هو مش كل إخوانى إرهابى .. حقيقة الأمر إن كل إرهابى إخوانى !
.
ما تقولليش الإخوانى والإخوانية مابيفكروش كدة ، و لا بيتكلموا كدة ... إييه .. نسيتوا جبنة نستوا يا مفنين !؟ .. نسيتوا الخرائر بتوعهم واللى كانوا بيقولوه وبيعملوه فى الشوارع !!؟ .. نسيتوا إللى كنا بنشوفه وبنسمعه منهم فى الاعلام وعلى السوشيال ميديا و فى المصالح الحكومية والمؤسسات الخدمية و فى اشغالنا .. وحتى بعض جيراننا ويمكن اقاربنا كمان !! .. طب نسيتوا إللى كان بيتقال من على منصة رابعة الارهابية !!؟
.
ما تقولليش أنا ضد الإخوان بس بأحترمهم .. الكلام ده تروح تضحك بيه على ناس مغيبين زيك علشان تبرر لهم و تبرر لنفسك ، إنك ظهير داعم للإرهاب والتطرف والفكر الهدّام اللى هدفه تدمير بلدك بإسم الدين .. يعنى ماتبقاش بتتابع إعلامهم ، و متبنى وجهة نظرهم ، وبتردد كلامهم ، وبتشير من صفحاتهم ، وتروّج أكاذيبهم وشائعاتهم .. وبعدين تقول أنا مش إخوان بس باحترمهم .. إنت كدة ما تفرقش عنهم .. لأنك كدة مش فاضل لك حاجة غير كارنيه العضوية .. مع الفارق إن الأعضاء الفاعلين بيقبضوا .. لكن إنت بتعمل ده متطوع .. وبإختيارك ����
.
المسلسل لسة مكمل معانا كمان 28 يوم .. ولسة هــ نسمع تأوهات كتيرة .. وتشويه كثير .. وكربلائيات كثيرة .. مش بس علشان بــ يوثق لجرائهم .. لكن كمان علشان زى ما قولنا ، بيبرز صورة البطل المصرى .. الصورة اللى هم مش عايزينك تشوفها .. عايزينك دايما مطاطى راسك .. وعندك شعور مستمر بالدونية والإنبطاح .. و زى ما هم طول الوقت بيحاولوا يشوهوا تاريخك ... برضوا بيشتغلوا على تمييع حاضرك .. وتدمير مستقبلك فى عنيك .. وكسر شعورك بإنك قوى .. و تقدر ��
.
إرفع راسك يا كل مصرى ..
إنت من الشعب اللى أفرز البطل أحمد منسى
و أفرز غيره من الابطال اللى تفخر بيهم مصر كلها
.
تابعوا المسلسل .. وخلوا أولادكم يتابعوه علشان يعرفوا الحقيقة !!
.
.
حفظ الله مصر و شعب مصر
.
.
الموقع الأرشيفى لصفحة كلام فى الصميم:
http://www.kalamfelsamim.com/
حساب الصفحة على تويتر
https://twitter.com/Kalamfelsamim