هل من مسلم يستطيع الرد

[elmafdy]

العزيز مينا
كلامك منطقى و منظم و رائع , و يعبر عن حقيق و واقع ملموس.
احييك عليه و انتظر معك الاجابه عليه .

و الرب يبارك و يهدى الجميع

المفدى

المشاركة الأصلية بواسطة Mena0064

الإخوة الأعزاء، إسمحوا لى بالمشاركة برأيى المتواضع،
أتفق مع رد غلباوى فى الكثير من النقاط من أهمها إنى لا أظن إن غالبية المسلمين شاغلهم الشاغل محاربة المسيحيين لأن ساعتها فعلا كان زمان مصر فى حالة حرب أهلية، لكن أضيف كام نقطة:
1. لو إفترضنا إن فعلا 10% من المسلمين فقط هم من يمارس هذة التفرقة الدينية ده معناة إن البلد فيها لكل مواطن مسيحى مواطن آخر مسلم مواظب على مضايقتة لأن عدد المسيحيين هو أيضا حوالى 10% من عدد السكان! و ده يفسر لية المسيحيين بيشتكوا شكوى مريرة بينما الكثير من المسلمين مش فاهمين إية اللى بيحصل و لية المسيحيين عمالين يتباكوا!؟
2. بنفس الإفتراض الرقمى ال 90% الباقيين من المسلمين 99% منهم هم من المتفرجيين، يعنى مثلا لو واحد إخوانجى شتم واحد مسيحى فى وسط ميدان التحرير و أهان دينة هل يتوقع أحد إن يطلع 9 أشخاص ينتهروه؟ بكدة الغالبية المعتدلة من المسلمين يقل وزنها بالنسبة للقبطى. و ده فعلا اللى بيحصل يصدر قرار جمهورى ببناء كنيسة و يكفى إن مسئول واحد مسلم فى الجهة التنفيذية يأخذ على عاتقة مهمة عرقلة القرار ولا يعترض أحد من المسلمين و لا حياة لمن تنادى.
3. المسيحيين هم فعلا اللى جابوا الذل لنفسهم لكنهم ما بين فخين، فخ مقاومة الإضطهاد وإتهام الأغلبية -اللى معندهاش فكرة- لهم بالعمالة و فخ الإستسلام للأوضاع السيئة.

الكلام ده كلة ممكن البت فية لكن أديك مثال يا غلباوى لا يمكن إنكارة:
فى مناهج التاريخ يدرس الطالب تاريخ مصر الطويل من أول الملك مينا لحد ما يسمى إنجازات مبارك مرارا و تكرارا كلة يعاد و يعاد الا 600 سنة بعد ميلاد المسيح لا يأتى ذكرها! و سواء شئنا أم أبينا هى جزء من تاريخ مصر فكم مواطن مصرى و كم عضو مجلس شعب و وزير و مسؤول فى وزارة التعليم من الآلاف اللى مروا على مصر منذ الثورة إعترضوا على هذا الإهمال؟ هل ياترى كلهم متعصبين؟ لا. طب يا ترى كلهم "ما خدوش بالهم"!؟ برضة لا.

اللى أنا عايز أقولة من اللك و العجن الكتير ده هو إن رغم إن القليل نسبيا من المسلمين بيكون من أهدافة مضايقة المسيحيين الا إن فية مناخ واضح من الرضا العام على هذة الأفعال. و دة بيخلى المسيحى يتشكك من الكل لأن لما واحد يضربك و 9 واقفين يتفرجوا ما تبقاش عارف تلوم مبن!

شكرا للاخ مينا على اشتراكة في الموضوع معانا ... وهجاوب عليك يا مينا في كل نقطة ذكرتها ان شاء الله

1- بخصوص موضوع الـ 10 % دول انا متفق معاك بس النسبة لعتقد اثل بكتيير لانى عارف كويس لو ان نسبة المضهدين ليكم 10 % يبقي في واحد لكل واحد منكم بيضهدكم ... ودة طبعا شيء غير صحيح بالمرة ....... وعشان نكون واضحين في الامر اكتر لازم نعمل تقسيم بسيط كدة ..
(أ) اذي واضطهاد مباشر : ودة اللى ممكن يحصل من مسلمين متطرفين او زي ما بتقولوا اخوانجية بيحاولوا يحتكوا او يتحرشوا بيكم .. او ممكن من سلطة النظام لو طبعا هما شافوا ان في حاجة تستلزم كدة ... وساعتها طبعا عارفين كويس انهم بياخدوا عاطل مع باطل .. وعلى ما يثبت انك بريء بتكون اتبهدلت جامد في ظل نظام قانون الطواريء .. وفي الموضوع دة مش بييفرق مسلم ولا مسيحي ولا حتى هندوسي ... الكل بيتاخد والكل بيطحن ودة شيء معروف كويس ... لكن طبعا الانسان اللى حاسس بالظلم طول عمرة بيكون اللى بيحصل دة اكتر واكتر فبيحس بالظلم اكتر واكتر ويحس انه هو لواحدة اللى مضطهد ومتبهدل ومش بيقدر يشوف الطرف التانى كمان ...... ياتري نقدر نخمن كدة المسيحين اكتر في المعتقلات ولا الاخوانجية ؟؟!! مع ملاحظة ان الاجابة غير مرتبطة بالنسبة العددية فقط بقدر ارتباطها بالمضمون نفسة

(ب) أذي واضطهاد غير مباشر : ودة اللي بيحصل بطريقة غير مباشرة زي القوانيين الظالمة المجحفة لكم زي قانون العزبي او الخط الهاميوني ... والمناهج الدراسية ...... الخ
دة بتدي احساس بالظلم والاضطهاد والتهميش مع ان الاعتقاد الراسخ في الاذهان منذ الصغر انكم اصاحب البلد ومن دونكم هم العرب العراة الحفاة الغزاة القادمون من جزيرة المعيز .. ودة طبعا رغم انه مش اذي مباشر الا ان تأثيرة النفسي بيظهر دايما وبيطفو على السطح مع حدوث اي مشكلة وبيصعدها زي موضوع الكشح كدة . يعنى على سبيل المثال لو حادثة عربية بتحصل كل يوم في مصر وشيء عادي جدا ... بس لو الميت مسيحي والسائق مسلم .. بتقوم الدنيا وبدل ما نقول حادثة .. تتحول لكلمة قتل عمد او اغتيال .. ولو حادث ثأر في الصعيد يتحول برضة لابادة جماعية رغم ان الطرفين سببهم الرئيسي هو الثأر لكن احنا اللى بنحب نلون الكلام بلون الدين ... ممكن يكون اسلوب من اساليب جلد النفس او اثارة الرأي العام او الرأي العام العالمي او تقليب وزيادة المشاكل لاثارة القضية اكثر واكثر في رغبة ان يتم حلها اذا تم تصعيدها ...والحقيقة انا من وجهة نظري الشخصية اعتبر كل من يتهم النظام او الحكومة بأنها اسلامية او اخوانية بالغباء اللا متناهي والكل يعلم جيدا ان ما يحدث ليس ننابع من اسباب دينية بقدر ما انها قوانيين ترسيخية لاقدامة ودستور يعمل على تثبيثة اكثر .. فلا يعقل ابدا نسب الاسلام دائما لما يقترفة الحكام او الانظمة لسبب واحد فقط انهم يدينون بالاسلام شكليا بالطبع ليس الكل كما قلت من قبل متشابهين وكما ان هناك من يتحاور وهناك من يتشاجر .. وهناك ايضا من يقتل ...

فاذا تتبعنا هذا الكلام سنجد ان الامر اولا واخيرا هو نتاج نظام يجب تعديلة وقوانيين يجب تغييرها وتحديثها مع مرور الزمن لتتوافق مع الحياة وتكون في صالح المواطنيين اولا واخير
واذا تم تعديلها بما يتوافق مع متطلباتنا جميعا .. لا اعتقد ان مثل هذه المشاكل يمكنها ان تظهر مرة اخري ... اما موضوع اننا راضيين عما يحدث .. فلا اعتقد ان هناك من هو راضي بما يحدث ... هناك العديد من الاحداث تحدث وتبدو انها مباركة من الشعب والحقيقة تخاف ذلك تماما وانت تعرف ما اقصد جيدا . ولكن السلبية نابعة من احساسنا ايضا بالظلم في عدة نواحي في الحياة فمشغولين للاسف بمشاكلنا ايضا ... الا جانب نقطة هامة وغاية في الاهمية .. كيف نصدق ان لديكم مشاكل او اضطهاد طالما البابا لا يتكلم عن ذلك وكل كلامة ينصب في بوتقة النسيج الوطنى والشعب المصري والتسامح الوطنى.. ما رأيكم ؟
استحلفكم بكل غالي ونفيس وأستحلفكم بالله كيف يستطيع رجل الشارع العادي ان يحس بمشاكلكم اذا كان كبيركم وعظيمكم قداسة البابا لا يتكلم عن مشاكلكم نهائيا .. وفي المقابل امثال نبيل باباوي يؤكد ان كل شيء تمام ... هل يمكن بعد كل ذلك تصديق انك تعانون او مظلومون ؟؟ هل يكذبون البابا ويصدقونكم ؟؟ وكما قلت في موضوع من قبل وتم قفلة وحذفة .. لو ان البابا تكلم عنكم اكثر بدون اثارة للفتنة او عمل بلبلة .. يمكن ان تحل مشاكلكم بصورة بسيطة لان سيكون ذلك احراجا للنظام بأكملة .. تخيلوا معي لو كل مناسبة دينية لكم تنقل في التلفزيون كعيد الميلاد او القيامة وعلى الهواء يتبنى ولو قضية واحدة كل سنة كقوانيين العزبي او بناء الكنائس او المنهاج ... الخ .. سيكون الامر محسوما بعد ذلك وسيتم حله لانه سيكون اكبر من اخفاؤه وانا اعرف عن قداسة البابا انه رجل فصيح ويمتلك موهبة الاقناع والكلام السلس السهل الهادئ .. ...
في هذه الحالة فقط سيتنبه الشعب بالكامل مسيحية قبل مسلمية للحقوق والمطالب التى تطالبون بها ما رأيكم ؟؟

تحياتي

[CrocodileTearz]

المشاركة الأصلية بواسطة غلاباوي

ياتري نقدر نخمن كدة المسيحين اكتر في المعتقلات ولا الاخوانجية ؟؟!!

يا عم انتا بتقارن الاقباط بقاتلين؟

الاقباط دول للتسلية و كسب الحسنات, اما الاخوان لانهم يفجرون و يقتلون السائحيين (فلوس البلد) و لانهم يطمعون لحكم مصر

وفي المقابل امثال نبيل باباوي يؤكد ان كل شيء تمام

حلوة دى, لو مشيت فى القاهرة هتجد فى كل مكان يفط ممضية من نبيل لوقا مكتوب عليها: 70 مليون مصرى مسلمين و مسيحين يقولون نعم لمبارك.

فهل تصدقه؟

مع العلم انا لا اعرف الرجل و مش عارف ازاى عرف رايى

والحقيقة انا من وجهة نظري الشخصية اعتبر كل من يتهم النظام او الحكومة بأنها اسلامية او اخوانية بالغباء اللا متناهي

يبقى انا بتصف بالغباء اللا متناهى (من وجهة نظرك)

[Mena0064]

الأعزاء المفدى و غلباوى و كل المشاركين،

الحكومة مش إسلامية و لا إخوانجية، الحكومة هدفها الأول هو البقاء تمام زى حيوان الغابة و السادات هو مخترع لعبة فرق تسد فى مصر للتغلب على التيار الناصرى، و النهاردة مبارك بيلعب نفس اللعبة بالإخوان و الأقباط و غيرهم و الإخوان فعلا ماليين المعتقلات و ينالوا من التعذيب ما لا يخطر على بال، لكن لا تنسى إنهم إختاروا سكة المقاومة المسلحة و زى ما بيقول الإنجيل "من يقتل بالسيف بالسيف يقتل" بفتح الياء فى يقتل الأولى و ضمها فى الثانية.

لحد هنا متفقين...أختلف معاك فى نقطة المبالغة فى الإضطهاد لأن حتى إنت قلت إن سيدنا البابا شنودة لا يتحدث عن حوادث الإضطهاد و الكنيسة التى يرأسها قداستة هى لسان حال الأقباط فكيف نبالغ و لا نتحدث فى نفس الوقت؟! أرجو تلاحظ إن الأقباط ما بيعملوش دوشة الا فيما لا يمكن السكوت عنة زى القتل و العرض وأنا عايزك تجيب لى مثال واحد لقضية بالغنا فيها -بلاش قضايا الخطف لأن دى البت فيها لا ينتهى و كلها قال و قلنا-.

اللى بدأت أستنتجة من الكلام هو إنك مقتنع إننا تحت ظلم و نعانى من عنصرية إضافة للظلم العام. يمكن نختلف فى قياس كم هذا الظلم لكن أنا مش شايف إن دى القضية لأننا متفقين على المبــــــــدأ. إنت بتقترح إن قداسة البابا يبتدى يتبنى حل هذة المشاكل لكن رغم إنى من أشد المعارضين لبعض سياسات قداستة الا إنى أختلف، قداسة البابا رئيس كنيسة و ليس قائد مدنى و كل ما نطلبة منة هو أن يفسح الطريق لقادة الأقباط علشان يكونوا فى مكان يسمح لهم بالدفاع المدنى عن حقوق الأقباط، تخيل حضرتك لو رئيس الكنيسة إنتقد الحكومة عل الهواء هتلاقى الإخوان فى الشوارع عاملينها حرب أهلية!

المفروض فى رأيى إن قيادة الأقباط دى تتحد مع المسلمبن المعتدلين و يكونوا جبهة "مصربة" لأن أى جبهة مافيهاش مسلمين هتبقى جبهة "مسيحية أمريكية"، الجبهة المصرية دى هيكون عندها القدرة إنها تكون لاعب له قدرة فى السياسة المصرية و لو إن ساعتها هيكون عليها مواجهة الإخوان و الحكومة بس خلق هذة الجبهة أساسا هو قفزة فى الطريق الصحيح و هو أصعب خطوة فى نفس الوقت.

آسف للإطالة أديك الأول فرصة ترد و فرصة للمفدى و باقى الإخوة يشاركوا بأفكارهم.

[lovealleg]

انا موافق على اللى الاستاذ قالة بس الموضوع مش موضوع فرق تسد

الموضوع انهم اما حد بيكر بيضربوة بواحد تانى



لما الشعيين طلعوا ضربوهم بالاخوان

واما الاخوان اشتدوا حبسوهم وطلموهم وعاوزين يضربوهم ببتوع الانفتاح والعولمة بس مش قادرين لحد دلوقتى

[elmafdy]

تحيه خالصه الى جميع أخوتى فى المنتدى , فمازال حوارنا حوارا عقليا راقى ناضجا لم يتدنى لأى شتائم او خروج عن الاحترام المتبادل .
و لكن اسمحوا لى أن اختلف معكم فى الرأى , أنتم ترون أن جبهه من المسلمين المعتدلين مع المسيحيين يمكنها ان تفرض موقف معتدل يناسب الجميع , ربما يكون هذا صحيح نظريا , و لكنى لا أعتقد انه يمكن تحقيقه على أرض الواقع , انت نفسك يا عزيزى مينا صاحب هذا الرأى ذكرت فى مقاله سابقه ان كل انواع التفرقه و الاضطهاد و الاساءه الينا تحدث من نسبه من المسلمين و لكن بموافقة و مباركة باقى المسلمين , و هذا ما سيحدث , المشكله يا عزيزى ان نزعة المسلمين الدينيه تفوق اى نزعه وطنيه او اجتماعيه او اى شئ أخر , و الغريب ان هذا الامر يحدث حتى من اقل المسلمين تدينا , فتجد احيانا مسلم لا يعرف أى شئ عن دينه , و حينما يرى مشكلة بين مسلم و مسيحى مثلا يتدخل بكل قواه لنصرة المسلم ظالما او مظلوما , الامر - رغم عدم عدالته - قد يبدو منطقيا على اعتبار انه اخاه فى الاسلام , و لكن المشكله ان ذلك الشخص لا يفعل ذلك حبا فى اخيه المسلم , لأنه بعد ذلك سرعان ما سينقلب ضده هو الاخر و يحاربه , الامر يكمن فى نظره زرعت بداخله تحمل تحقير و كراهيه و رفض للاخر , أى أخر حتى لو كان الاخر مسلم مثله , لقد سألت فى منتدى اخر من قبل , هل يقبل مسلم ان يحكم مصر مثلا شخص مصرى مناسب رائع و لكنه مسيحى , ام يقضل مسلم حتى لو كان غير مصرى و أن كان من ملالى افغانستان او حتى الزرقاوى , أرجوكم أن تفكروا فى هذا الامر بصوره موضوعيه و من يرى انى لست محقا يتدخل برد فى المنتدى .

ما أود أن اقوله هو ما أقوله فى كل مره , أن الافعال و المواقف تحكمها فى النهايه توجهات و قناعات و انتماءات شخصيه زرعت بداخل كل منا , و اذا أردت ان تصلح الافعال و المواقف , اصلح أولا التوجهات و القناعات .

و للحديث بقيه

و الرب يبارك و يهدى الجميع

المفدى

قداسة البابا رئيس كنيسة و ليس قائد مدنى و كل ما نطلبة منة هو أن يفسح الطريق لقادة الأقباط علشان يكونوا فى مكان يسمح لهم بالدفاع المدنى عن حقوق الأقباط، تخيل حضرتك لو رئيس الكنيسة إنتقد الحكومة عل الهواء هتلاقى الإخوان فى الشوارع عاملينها حرب أهلية!

انا معك ان البابا سلطتة سلطة دينية وليس سياسية ولكن المفترض انه راعي لشعبة ويهتم بامورهم وقضاياهم .. ويقودهم في وقت الازمات بغض النظر عن كونة زعيم دينى وليس سياسيا او اضعف الايمان يحاول ان يلقي المسؤولية على احد القادة المسيحيين ويساعدة بمباركته له .. وذاك ايضا لا يحدث ... ( يعنى مثلا او قام بمباركة اعمال مايكل منير ونصبة على انه قائد سياسي للمسيحيين بمصر يتكلم بأسمهم داخليا وخارجيا ....... ) اعتقد ان الامر سيكون متغير 180 درجة ...

المفروض فى رأيى إن قيادة الأقباط دى تتحد مع المسلمبن المعتدلين و يكونوا جبهة "مصربة" لأن أى جبهة مافيهاش مسلمين هتبقى جبهة "مسيحية أمريكية"، الجبهة المصرية دى هيكون عندها القدرة إنها تكون لاعب له قدرة فى السياسة المصرية و لو إن ساعتها هيكون عليها مواجهة الإخوان و الحكومة بس خلق هذة الجبهة أساسا هو قفزة فى الطريق الصحيح و هو أصعب خطوة فى نفس الوقت

رأي جيد جدا ولكن هل يمكن تطبيقة عمليا ..؟ اعتقد ان هناك صعوبات كثيرة جدا ستقابلة

فى البدايه احب ان اشكرك على كلمه الاخوه وارجوا ان تكون كلمه صادقه نابعه من قلب تقى مهما كانت عقيدته فكل الاديان من عند الله.
واحب ان اجيب على تساؤلك فاننى دخلت المنتدى هنا عن طريق صديق مسيحى واصر على كلمه صديق قلبه نابض بحب السيد المسيح وذلك لم يكن فى اى وقت من الاوقات نقطه خلاف بيننا وهذا هو الحال هنا فى مصر منذ قديم الازل لم نعانى من وجود اى فروق بين المسيحى والمسلم فكلانا ابنا وطن واحد وكلانا نؤمن بالله باختلاف العقائد ونحن نكرم السيده مريم العذراء ونكرم السيد المسيح حق التكريم لانعتدى على مقداساتكم ونوفى لكم كامل الاحترام وهذا ما نشئنا عليه اخوه فى الوطن اخوه فى الله مع اختلاف العقائد كلانا نؤمن بالوصايا العشر والتى حضت عليها جميع الاديان ولكن مع الاسف مع دخولى لموقعكم وجدت الوجه الاخر والذى هالنى وجوده كيف تطلب منى ان اصمت امام سب ديانتى واهانه رسولى الكريم كيف تطالبنى بالهدوء ومنكم من يتطاول على عقيدتى بصوره مستفزه وافتراءات واضحه لكل انسان لديه عقل وفكر . عندما دخلت المنتدى هنا صدمت بمجتمع متحامل قليل فيه هم المعتدلون وتتهمونا بالارهاب ومنكم هنا معتادى الارهاب الفكرى تتحدوثون هنا وكأننا المسلمون نهدر دمكم وعرضكم لا لشئ الا لاختلاف عقيدتكم وانتم تعلمون جيدا كذب ادعائاتكم.
قفوا يكفيكم تشتيتا فى نسيج الوطن الواحد تتحدثوا عن الاستنجاد ببوش وبالغربيين واين هم منكم ولماذا تشتت كنائسكم اعلموا جيدا اننا ابناء الوطن الواحد ومهما حاول الغربى نصرتكم فلا لشئ الا لاتمام قصه الثيران الثلاثه واعتقد اننا جميعا نعرفها افيقوا من غفلتكم وان كانت هناك معاناه فى مصر فهى تمس المسيحى والمسلم على السواء كم فتاه اغتصبت مسيحيه وكم مسلمه كم منزل مسيحى سرق وكم منزل مسلم افيقوا وكفى افتراء يا اتباع المسيح يا اتباع المحبه وارونا محبتكم وكفاكم افتراء ةاستيقظوا من غفلتكم فالدين واحد باختلاف العقائد والرب واحد باختلاف الشرائع واننا لنؤمن بايه سماويه تقول بسم الله الرحمن الرحيم
" امن الرسول بما انزل اليه من ربه والمؤمنون كل امن بالله وملائكته وكتبه ورسله لا نفرق بين احد من رسله قالوا سمعنا واطعنا غفرانك ربنا واليك المصير "
صدق الله العظيم

[Mena0064]

عزيزى المفدى، أنا متفق معاك إن الغالبية تغض النظر عن مثل هذة الجرائم لكن أنا متأكد إن أحد أسبابة الرئيسية هو السلبية و فية نسبة ممكن تكون بذرة كويسة و نسبة أكبر تلحقها لو حصل تحرك من أى نوع فى سياسة مصر الراكدة. أنا فاهم قصدك، سياسة أنا و أخويا على إبن عمى و أنا و إبن عمى على الغريب مع شحنة من التعصب الوهابى بتخلى الإنسان يفقد مبادئة الإنسانية لكن زى ما فية غلباوى أكيد فية غيرة كثير من الناس اللى على دراية باللى بيحصل و دول بذرة ممتازة. أما الأخ المحترم سادكاندل فهو بالظبط مثال الناس اللى لن تنضم الا لجبهة تكون متحدة من المسلمين و المسيحيين، هو شكلة راجل طيب دخل المنتدى و صدم من "المخطط الصهيونى لتفكيك الوحدة الوطنية" و الكلمتين إياهم يعنى بإختصار واحد بيقرأ الأهرام و معندوش أى فكرة عن الباطن، مواطن عادى بيحب بلدة و أكيد فية منة الملايين بس محتاجين جهة يترابطوا من خلالها. تعالى قول لواحد زى الراجل الطيب ده تعال إنضم ل"جمعية أقباط الولايات المتحدة" اللى كلها مسيحيين، إنت عارف الرد! لكن إدعية للإنضمام ل"جمعية الوحدة الوطنية الجديدة" ساعتها ممكن. أنا يمكن أكون غلطان لكن بصراحة لو مفيش مسلمين عندهم الإستعداد يسلكوا طريق جديد من الديمقراطية و المساواة فيبقى مفيش فيكى أمل يا مصر لأن الأقباط أقلية عددية و كمان مضطهدة و لا يمكن تفرض الإصلاح على الشعب كلة.

عزيزى غلباوى، يا ريت تعلق على الكلام الأعلى كونك واحد مسلم معتدل، رأيك إية؟ إزاى نصحصح الناس من التفكير الوهابى و نعرفهم بمشاكل الأقباط و الحاجة للمساواة، عندك مثلا الأخ سادكاندل اللى بيستنكر الكلام و كأننى أعيش على القمر.
أدينا بنترجى قداسة البابا يشيل إيدة مما لقيصر و بدى الأقباط الفرصة يدافعوا عن حقوقهم و الرأى ده إبتدأ ينتشر خصوصا فى بلاد المهجر و أنا متأكد إن قداستة مستنى اللحظة المناسبة، إحنا مهما ننتفد سياسة البابا لازم تبقى عارف إننا بنموت فية و عندنا فية ثقة كبيرة ليس لأنة رجل دين بل لأنة ضحى بكل حياتة فهو لم يتزوج و لا عندة أولاد أو حتى حساب فى بنك و حتى الهدوم اللى لابسها هى ملك الكنيسة يعنى ليس لة مطامع أو أهواء أو طموح شخصية و هو صايم بصفة مستمرة حسب معلوماتى يعنى حتى طعم اللحمة قد لا يتذكرة. على كل حال إحنا بنوصل لة رغباتنا و نعمل من أجلها يعنى الموضوع مش زن على ودان المسلمين و بس. لكن بدون أمثالك الأمل ضعيف فأرجو إنك على قد ما تقدر تنشر الوعى بمشاكل المصريين و منهم المسيحيين علشان لما نيجى نتكلم ما ييجيش واحد يدينى خطبة فى الوحد الوطنية.

الأخ ساد كاندل، المنتدى هنا بيدى حرية للكل إنة كتب اللى عابزة و العبء على القارئ إنة يختار إللى يقراه، و أنا واثق إن مفيش إثنين فى المنتدى كلة موافقين بعض فى كل شئ فعندك مختلف الآراء تحاور مع اللى يعجك و تجاهل اللى ما يعجبكش. أنا لا أحب الشتيمة و لا أسلوب الشتيمة لكن إسمح لى أعبر عن تعجبى من ذهولك! هل تستطيع بكل أمانة تقول لى إنك عمرك ما سمعت خطبة جمعة فيها شتيمة أو إستفزاز للمسيحيين؟ فى الميكروفون و على الملئ كمان.

[Mena0064]

طب لية ما نساندش واحد زى أيمن نور؟ أنا معلوماتى عنة محدودة لكن كل اللى قريتة مبشر.

[New_ManII]

بسم الله الرحمن الرحيم
" امن الرسول بما انزل اليه من ربه والمؤمنون كل امن بالله وملائكته وكتبه ورسله لا نفرق بين احد من رسله قالوا سمعنا واطعنا غفرانك ربنا واليك المصير "
صدق الله العظيم

عزيزي, هل تستطيع ان تقول بان موسي مثلا, هو سيد الخلق و اشرف المرسلين و اطهر خلق الله ؟!

مع الاسف بهذا المنتدى
ناس(مسلمين ومسيحيين)
المناقشه معهم كا الحرث فى الماء

وهم ماشين على طريقه اللى له عدو يعرف .......... عا الكوم

المشاركة الأصلية بواسطة Mena0064

عزيزى غلباوى، يا ريت تعلق على الكلام الأعلى كونك واحد مسلم معتدل، رأيك إية؟ إزاى نصحصح الناس من التفكير الوهابى و نعرفهم بمشاكل الأقباط و الحاجة للمساواة، عندك مثلا الأخ سادكاندل اللى بيستنكر الكلام و كأننى أعيش على القمر.
أدينا بنترجى قداسة البابا يشيل إيدة مما لقيصر و بدى الأقباط الفرصة يدافعوا عن حقوقهم و الرأى ده إبتدأ ينتشر خصوصا فى بلاد المهجر و أنا متأكد إن قداستة مستنى اللحظة المناسبة، إحنا مهما ننتفد سياسة البابا لازم تبقى عارف إننا بنموت فية و عندنا فية ثقة كبيرة ليس لأنة رجل دين بل لأنة ضحى بكل حياتة فهو لم يتزوج و لا عندة أولاد أو حتى حساب فى بنك و حتى الهدوم اللى لابسها هى ملك الكنيسة يعنى ليس لة مطامع أو أهواء أو طموح شخصية و هو صايم بصفة مستمرة حسب معلوماتى يعنى حتى طعم اللحمة قد لا يتذكرة. على كل حال إحنا بنوصل لة رغباتنا و نعمل من أجلها يعنى الموضوع مش زن على ودان المسلمين و بس. لكن بدون أمثالك الأمل ضعيف فأرجو إنك على قد ما تقدر تنشر الوعى بمشاكل المصريين و منهم المسيحيين علشان لما نيجى نتكلم ما ييجيش واحد يدينى خطبة فى الوحد الوطنية..

يا مينا انا علقت بالفعل على الكلام ولو قرات كلامي كويس هتوصل ببساطة لوجهة نظري في الموضوع دة احنا بنحترم الراجل بتاعكم جدا لانه ابسط شيء نقدر نقولة انه راجل عايش وواهب حياته ومخلص جدا لدينه وعقيدته .... بس لو تقرأ كلامي كويس تعرف انا رايي اية .. وانه يحاول يساند واحد منكم كقائد لو هو ميقدرش يتحرك بنفسة لانة قائد دينى وليس سياسي .... ولازم يتكلم عن مشاكلكم بوضوح وصراحة وجرأة بدل ما الشعارات بتاعة النسيج الوطنى والوفاق الوطنى والكلام دة ... بدل ما نضحك على بعض .. نظهر المشاكل دي ونحاول نحلها

[lovealleg]

اهلا ياشباب


اللى بيقول ان سلطة البابا دينية انا بعترض معاة وبشدة


سلطة البابا فى الاصل دينية ولكنها اتحورت فى السنين اللى فاتتت واصبحت سياسة بالدرجة الاولى


موائد افطار واجتماعات وخطابات توحيدية مفهوم مغزاها واعتكفات من حين لاخر بهدف الضغط


الامر مفهوم ...........من الاول



وياريت اما واحد من الاخوة يحب يستدل باية من القران ياخد راينا فى معناها الاول
اصل الاقباط معرفين بالتحريف المتعمد بس عشان يبقى فية مصداقية

[elmafdy]

السيد لف
مازلت مصمم ان أغير رأيى فيك يا لف , لقد دافعت عنك و اعترضت على كل من هاجمك و و لكن يبدوا انك تصورت اننى سأدافع عنك حتى تهاجم انت المسيحيه و نحن نباركك و نشجعك و نقول لك برافو , مازلت تكرر الهجوم و الخروج عن الاداب فى الحوار من منتدى لأخر , و بما انى غير مسئول عن اعاده تشكيل شخصيتك فسأكتفى بالرد على ما كتبته فى منتداى هذا :

1- انت ترفض و تعترض على موائد الافطار و الخطب التوحيديه كما تسميها , و تقول ان مغزاها مفهوم , انا الحقيقه مش فاهمك, هل البابا يريد ان يرشح نفسه فى الانتخابات , ام يريد ان يصبح وزيرا , أم ماذا ؟؟ ما هو فى رأيك هدف البابا من تلك المجاملات الاجتماعيه ؟؟

2- من جهة أخرى انت ترى ان البابا يقوم بالاعتكاف احيانا بهدف الضغط , الضغط على من و لماذا ؟؟ , و كيف تتفق النقطه الاولى من مجاملات و عزومات مع الضغط و لوى الذراع , ثم اذا كان البابا يريد ان يضغط على الحكومه مثلا , اليس من الاولى به ان يستعين بجهات حقوق الانسان التى تأتى لمصر كل فتره لتناقش حقوق الاقليات و دائما ما يكون موقفه اننا نحيا فى عداله و لا نعانى من اى اضهطاد رافضا أى تدخل خارجى لحماية الاقباط او غيره , اليس هذا هو المنطق ؟؟؟

3- اصل الاقباط معرفين بالتحريف المتعمد , لقد ذكرت تلك الكلمه الغير مهذبه فى رسالتك , و الحقيقه ان عندى سؤال , اذا كنا نحن محرفين و حرفنا الانجيل , فما هو هدفنا من ذلك و كيف نتبع دين نعرف انه محرف , هل نحن نريد ان ندخل جهنم , فنبتدع دينا محرفا ثم نؤمن به و نتبعه حتى نهلك جميعا , عزيزى الا ترى انك تريد ان تدخل فى تفكيرك بعض المنطق و العقلانيه قبل ان تخوض حوارا يعتمد على العقل.
بالمناسبه , أنت لم تجب على اسئلتى التى بدأت بها هذا المنتدى , لعل المانع خيرا .

و الرب يبارك و يهدى الجميع

المفدى