بوش يتفاوض مع صدام فى السجن!!

الجمعة 02 يناير 2004 05:13


بوش يتفاوض مع صدام فى السجن!!

سامي البحيري

"أنا صدام حسين رئيس العراق، لا تطلقوا النار، أريد التفاوض"، هكذا صاح بعدما تم العثور عليه فى جحره، ورد عليه أحد الجنود الأمريكان: "مستر بوش يهديك تحياته". وتخيلت أن الرئيس بوش قد وصلته الأخبار السعيدة بالقبض على صدام، وفى نفس الوقت تعجب ما الذى يريد صدام التفاوض بشأنه وخاصة بعد أن أصبح فى قبضتهم، ودار الحديث التالى بينه وبين رئيس المخابرات المركزية "جورج بينيت":
بوش: الراجل ده مخبول، عاوز يتفاوض على ايه؟
بينيت: ياريس مش حنخسر حاجة، أتكلم معاه، يمكن نقدر نعرف منه أماكن أسلحة الدمار الشامل، وده حيساعدنا كتير لتبرير سبب الحرب أثناء الأنتخابات الجاية
بوش: أيوه يا جورج بس الراجل مجنون وأنا أخاف يقل أدبه علىّ أثناء التفاوض
بينيت : ما تخافش ياريس أحنا حنعمل أحتياطياتنا
....
يذهب بوش فى زيارة مفاجئة أخرى الى بغداد بمناسبة السنة الجديدة، وكان هناك ترتيب للقاء خاص وسرى مع صدام.

فى ظل ترتيبات أمنية معقدة تم أجراء اللقاء داخل أحدى قاعات مطار بغداد الدولى والمسجون فيه صدام حسين.
.....
دخل بوش على صدام والذى وضح على وجهه الصدمة والذهول لأنه لم يكن يتوقع أن يكون الزائر هو الرئيس الأمريكى جورج بوش شخصيا، ووقف صدام لتحية بوش وقال:
صدام : مرحبا بك فى بغداد ياريس بوش، كنت أتمنى أرحب بك فى ظروف أحسن من كده، أعذرنى مش حأقدر اسلم عليك علشان ال***شات فى أيدى. (يشير بوش الى الحراس لفك القيد عن يدى صدام)
صدام : متشكر ياريس ربنا يخليك لينا، (ويمد يده على بوش للسلام، فيرفض بوش)
بوش: ما فيش داعى للسلام علشان أنا عندى دور أنفلونزا وما فيش داعى أعديك.
صدام: سلامتك ياريس بوش
بوش: الله يسلمك، بلغنى أنك طلبت التفاوض
صدام: هم الضباط الأمريكان قالوا لك؟ ده كنت فاكر حتفاوض مع رئيس الكتيبة الرابعة مشاه اللى قبضوا علىّ
بوش : أحنا ناس نعرف الأصول، وأنت مهما كنت ومهما كان بينا فأنت كنت رئيس العراق، وواجب أنه يتفاوض معاك رئيس زيك
صدام: ده كله من ذوقك ياريس بوش، أصيل وابن أصل، والله يعلم أنى رغم كل اللى كان بينى وبين والدك وبينى وبينك، الا أن عائلة بوش عندى حاجة كبيرة قوى، وبالمناسبة أزى صحة الوالد دلوقت؟
بوش: الوالد بخير، خلينا ندخل فى الموضوع، أنت اللى طلبت التفاوض، طلباتك؟
صدام : أنا عندى معلومات وأسرار تهمك وأنت عندك حاجات أنا محتاجها
بوش: أعطينى أمثلة
صدام: أنا كنت متعود أنى بأشرب شاى بالحليب ومعلقتين سكر كل يوم الصبح على غيار الريق، هم هنا دلوقت بيعطونى كل يوم الصبح واحد قهوة أمريكانى بدون حليب وبدون سكر، فأنا نفسى فى الشاى بالحليب ومعلقتين السكر.
بوش: علشان أقرر فى الموضوع، عاوز أعرف لو لبيت طلبك، أيه المقابل؟
صدام : أنا ممكن أقولك أماكن أختفاء باقى القيادات المطلوب القبض عليها فى الكوتشينة بتاعتكم
بوش: أنا موافق، أعطى المعلومات المطلوبة لجورج بينيت رئيس المخابرات المركزية، وهو حيعطى الأوامر بخصوص الشاى بالحليب
صدام (مبتسما) : جورج هنا معاك؟ جورج ده حبيبى، راجل سكرة، أنا أعرفه من أيام حرب أيران من أيام ما كنا أصحاب، كانت أيام حلوة
بوش : غيره؟
صدام : الجماعة الحرس هنا بيسمحوا لى أروح الحمام مرتين بس فى اليوم، وأنا زى ما أنت عارف عندى تضخم فى البروتيستاتا، وضرورى أدخل الحمام اكثر من مرتين فى اليوم، وساعات فى نصف الليل أصحى علشان أروح الحمام وأقعد أزعق لغاية ما حد يصحى فيهم وأروح معاه الحمام.
بوش : ممكن نضع لك جردل فى الزنزانة بتاعتك
صدام : برضة يخلص لك ياريس بوش أنى أعملها فى جردل، الله يسامحك، ده لو أنت سمعت حأعطيك أيه فى المقابل، أكيد حتغير رأيك
بوش: قل لى ايه عندك؟
صدام: حأعطيك أرقام كل حساباتى الشخصية وأستثماراتى الخارجية، ولعلمك أنا كنت محوشهم ليوم زنقة زى كده، ربنا لا يحكم عليك بزنقة الحمام
بوش: موافق، ممكن نعمل لك حمام مجاور للزنزانة، حيكون عندك جناح كامل، هيص ياعم
صدام : ربنا يخليك، أنا كنت عارف ان التفاوض مع الراس الكبيرة ما فيش أحسن منه
بوش : طلبك الأخير؟
صدام : عاوز حبوب فياجرا مرة فى الأسبوع !!
بوش : فياجرا.. أيه الكلام الفاضى ده، مش عيب راجل فى سنك تقول كلام زى كده، وكمان مسجون
صدام: الفياجرا دى عملوها علشان اللى فى سنى !! وبعدين علشان أقدر أجربها أنا حأطلب زيارة أحدى عشيقاتى مرة فى الأسبوع
بوش: أنت أكيد الهرب والسجن أثروا على عقلك، ده مش ممكن يحصل أبدا، وحتى لو وافقت على المبدأ، أنا راجل متدين ومستحيل أسمح بالزنا يحصل تحت قيادتى
صدام: اذا كان الزنا حيزعلك، أنا مستعد أتجوزها على سنة الله ورسوله، بس لو تسمع آخر معلومة عندى هتكون خبطة العمر بالنسبة لك، وحتدعيلى
بوش: أيه عندك، خلصنى ياصدام، انا ضرورى أسافر واشنطن دلوقت
صدام: أن حأعطيك أماكن أسلحة الدمار الشامل، وأسماء العلماء، واسماء الشركات اللى ساعدونا فى الموضوع، وأسماء الدول كمان
بوش: (يحاول أن يدارى سعادته) : أتفقنا أنا موافق، أعطينا أسم وعنوان عشيقتك، وحنتصل بيها علشان تيجى تقابلك كل يوم سبت
صدام: ممكن نخليها كل يوم خميس أحسن !!

samybehiri@aol.com

http://www.elaph.com:8080/elaph/arab...20296560493200