الاقباط بيشتغلونا

[abomeret]

الاقباط بيشتغلونا

بقلم فادى يوسف - المنسق الاعلامى لاتحاد شباب ماسبيرو

ياعم دول الاقباط بيشغلونا ..... الجملة دى سمعتها كتير قوى الفترة الى فاتت مرة فى مترو ومرة فى شارع ومرة فى الفضايات واخيرا سمعتها من يومين فى مؤتمر بين اتنين المفترض انهم ممثلين احزاب سياسية بس المرة دى بالذات قولت افهم وسالتهم يعنى ايه الاقباط بيشتغلوكم رد واحد وقالى الاقباط بيعملوه كنائيس عشان يحطوه فيها اسلحة وبيعملوه اديرة عشان يحطوه فيها اسود والهيكل بتاعهم ده بيت سحر والقسيس ده بيبوسوه ايده عشان يديهم فلوس وبيخطفوه بناتهم ويقوله احنا الى خطفنهم و .....و ..... و

ودول كوم وبتوع المهجر كوم تانى دول بقى عاوزين يولعوها نار وبيعملوه هما الفتن دى عشان يدخلوه الاجانب مصر وهما الى بيحرقوه فى الكنايس وبيقتلوه فى الاقباط بتوع مصر عشان يطلعوه ويقولوه عاوزين امريكا تخش وخد من ده كتير...

لا يا سادة الاقباط مش بيشتغلوه حد الاقباط فى معاناة وقمع بيسمى فى اللغة العربية بمصطلح الاضطهاد الكلمة الي بيحاول كتير يخفيها عن الحقيقة والحقيقة الي كتير بيحاول يدفنها فى القبور والقبور الي كتير منها لسه مفتوح عشان يضم شهداء اقباط لسه بيعانوه من الاضطهاد .

معادلة صعبة انك تكتشف ان غيرك مش بس مش حاسس بيك وبمعاناتك لكن معتقد انك بتمثل او بتشتغلوه والاغرب كمان انه بيعتقد ان الاقباط فى نعيم ومميزين عن باقى المصريين !!!!! عنا يا عبد المعين .

بس فك الغاز المعادلة دى سهل وبسيط لكن مين المفترض يحل المعادلة ؟

المعادلة حلها فى التوعية عن كل طرف ومن كل طرف من خلال كل قنوات وطرق التوعية بس هى مسؤلية مين يا ترى !!!؟؟؟

هل هى وزارة التربية والتعليم لانها مسؤلة عن تربية النشئ وتعليمه مبادى واصول كل ديانة وتوضح للتلميذ ان الاخر ده شريك فى الوطن مش ذمى ولا درجة تانية وتعرفوه تعاليم الاخر ده لانها تعاليم سماوية سامية لا تخدش حياة البشر ولا تساهم فى ارهاب العالم وتعلم الطالب من صغره ازاى يقعد جنب زميله فى الفصل بصرف النظر ديانته ايه وميطلعش مدرس بعصايا ويقول المسيحين يطلوه بره دى حصة دين !!!

ولا هى مسؤلية اعلام بيقدم قماشة واحده من المجتمع وناسى او يتناسا باقى النسيج وكل مواضيعه وبرامجه عن طرف واحد والطرف الاخر لا مصرح ولا مسموح له ببرنامج واحد للعامة وكانه بيقدم كفر والالحاد اعوز بالله .

انا يوم الجمعة لما بفكر افتح التيلفزيون بمسك سبحه واعد بيها البرامج الدينية الاسلامية ده غير الايام العادية وبمسك سبحه تانية يومين فى السنة يوم عيد الميلاد ويوم عيد القيامة بس هما 3 حبيات بالعدد الي بعدهم .

ومحتوى البرامج مشكلة اكبر من عددها وعدم توازنها مع اى برامج اخر او حتى تقديم برنامج واحد يومى او اسبوعى عن الاخر ده الى محدش يعرف عنه حاجة وفاكرينه بيشتغلهم فالمحتوى فيه كم من الهجوم والتكفير فى الاخر والابتعاد عن اى شى يخصه لانه محرف كما ذكر فضيلة مفتى الديار المصرية على الفضايات المصرية .

وفى مشكلة اكبر وهى الاعلام المجهول زى الانترنت ونشر اى اشاعة وتصديقها ويتعمل عليها مليون لايك بدون حتى التاكيد منها او مراجعتها منطقيا او فكريا وكأن بقت من المسلمات ان الكنايس فيها اسلحة وبتخطف وبتحتجز الناس طيب ازاى وفين ومين الى بيفكر كده ومين اصلا الى بيسمح بكده ولو فرضا قولنا امين فين الحاجات دى لما بيهاجموه الكنائيس او يحرقوها زى ما حصل قريب فى صول وامبابة .

وكمان الازهر والكنيسة مسؤوليين ان اى اشاعة تطلع لازم تتقابل بحزم واستنكار مش نقول خلى الى يقول يقول لا دى بقت سياسة خاطئة ومضرة للكل وبتساعد اكتر ان اى حد بنشر اكاذيب مدام محدش بيتصدر ليها وبعتبروها هيافات زى موضوع دولة اسيوط
الاشاعات سهل انتشارها وسهل جد الاقتناع بيها مدام فى باب مفتوح للكراهيه او بث الفتن بين النفوس او الاهم عدم المعرفة عن الاخر شئ وتحريم من يعرف شئ وومكن توصل لاعلى الدرجات زى ماحصل مع رئيس جمهورية مصر العربية السابق انور السادات وقال كلام غير منطقى بالمرة ان الاقباط عاوزين يكونوه دولة داخل دولة والبابا شنودة يكون الرئيس بتاعها !!!! وكان رد البابا شنودة منطقى ازاى يحصل ده ونسيب تراثنا واديرتنا الاثرية فى كل مصر ونقعد فى اسيوط وكان رده حيكم لما قال امن الاقباط وسط اخوتهم المسلمين .

وثقافة الشارع دى لوحدها من اخطر انواع الاشاعات لانه كفاية ان واحد وهو ماشى يتقال عنه كافر ولا ملحد ولا يهودى زى ما علموه مع مذبعة التحرير ماريان عبده وزى ما بيعانى اى قبطى بمشى فى الشارع دلوقتى ويتقال عنه عضمة زرقة وكوفتس .

وكل ده وغيره ليه عشان مفيش طريقة تواصل افكاروتوعية وحقائق من كل طرف للتانى وبقى سهل تطلع اشاعة والكل يصدقها .

احنا فعلا محتاجين رؤوية واضحة للتواصل ويكون فى توعيات لكل دين والدين الاخر عشان لما حد يطلع يقول الاقباط بيمارسوه السحر جوه الكنائيس نقول لا مش صح والقداسات والصلوات الى بتشوفها مفيهاش الكلام ده .

ولما يطلع يقول الاقباط بيشيلوه اسلحة نقول لا واتفضلوه كزوار شرفونا ونكتة الاسود دى ملهاش صوت ملهاش مكان وهل يعقل نحطهم فى كنائيس ولا الاحسن حديقة الحيوان !!!!!

كل جهة وكل مسؤل وكمان كل فرد فى المجتمع عليه حفاظا على البلد الغالية والام مصر انه يتصدى لاى اشتغاله او مسماها الحقيقى اشاعة ضد الاخر لان يا سادة يا عظام الاقباط مش بيشتغلوه حد انهم مضطهدين لانهم فعلا مضطهدين والاقباط مش بيشتغلوه حد انهم بيحبسوه حد لان الكنيسة مش سجن والاقباط مش بيشتغلوه حد انهم عندهم اسلحة لانهم مبيعرفوش يمسكوه اسلحة او حتى ليهم مكان يخزنوه فيه ولو فرض ليه الامن ممسكش اى احراز او اسلحة جوه الكنائيس وليه اساسا رغم كم الاعتداءات على الكنائيس مطلعش منها رصاصة واحده والاقباط مش بيشتغلوه حد انهم بيمارسوه اى سحر او شعوذه ولا حتى مسمى الدجالين ده عندهم والاقباط مش بيشتغلوه حد انهم بيطلبوه اى حماية دولية لثقتهم اولا فى الحماية الالهية ثم حماية اخوتهم فى الوطن المصريين المعتدلين الى عمرهم ما قالوه ان الاقباط بيشتغلونا .