|
الكرمة لأشجار الشوك : دلوقتى إحنا كلنا أولاد مكان واحد، ومتساويين ، ولازم نعمل لمصلحة المكان اللى إحنا عايشين فيه ومش مشكلة طبيعة كل شجرة إيه لكن كلنا أولاد المكان ده وبنعمل لصالحه وهنعمل ميثاق بالكلام ده
الشوك : وأنا موافق
__________
بعد 30 سنة
الكرمة : إيه ياشوك اللى إنت بتعمله ده ؟ إحنا قولنا كلنا بنعمل لمصلحة المكان ده ، وننتج كلنا عنب ونبقى متساويين لكن إنت بتمد جذورك فى كل حتة ومش بتنتج عنب خالص وكمان مش مدينى مكان كويس .. ده الكلام اللى إحنا إتفقنا عليه ؟
الشوك : إزاى الكلام ده ؟ ده أنا بأتعب ليل ونهار وبأنتج عنب على طول وحتى إسألى شجرة الشوك اللى جنبى دى
الشوك : ياشجرة الشوك إنتى .. آل إحنا بننتج شوك وماعندناش عنب ؟
شجرة الشوك 2 : إزاى ؟ ده إحنا بننتج عنب على طول وبعد 15 سنة الوطن كله هيبقى عنب ومش هنعرف نوديه فين
الشوك : قول .. إتكلم .. قول لها
الشوك 2 : إنتى ياشجرة العنب .. إنتى جاية تتبلى علينا وتعملى فتنة
الكرمة : أنا مش عاوزة أعمل فتنة ، أنا عاوزة المكان بتاعنا يبقى أحسن مكان وكلنا ننتج عنب أنا بأحب المكان ده جدا وحبه يجرى فى دمى
الشوك 2 : لا بقى إنتى بتحاولى تسوئى سمعتنا وباين عليكى عميلة وبتأخدى فلوس من بره
الشوك : الشجرة دى عميلة ؟
الشوك 2 : أيوه عميلة وبتتبلى علينا .. المفروض نقطع الشجرة دى علشان ماحدش يعكر الجو بتاعنا وكمان بتزاحمنا فى المكان ده
الكرمة : إحنا إتفقنا إننا كلنا نعمل لمصلحة المكان ده ، وننتج كلنا عنب ونعيش فى مساواة وعملنا وثيقة بكده ، وإنتم عمركم ما أنتجتم عنب وماليين المكان شوك ومانفذتوش الوثيقة اللى وقعّنا عليها
الشوك : لا مش ممكن .. إحنا كلنا بننتج عنب وبنشتغل لمصلحة المكان ده وبعد 15 سنة هيبقى جنة وما فيش شوك خالص .. حتى إمشى فى الحتة دى مافهاش شوك خالص
الكرمة : طيب أنا هأمشى فى الحتة دى وأشوف .. آه آه الشوك دخل فى رجلى .. المكان كله شوك .. ليه كده ياشوك تعمل كده ؟ وما تنتجش عنب ليه ؟ وليه مش بتعمل لمصلحة المكان ده ؟ زى ما اتفقنا ... آه آه آه
|