[menaa2005]

الاقباط فى مصر اصبحوا ملطشة


واصبحوا ليه ؟ خلينا نقولها بصراحة الاقباط من زمان ملطشة


مشاكل فى كل مكان ، فى الشارع ، فى المواصلات ، فى الشغل الخ ..


لو سألنا اى قبطى ليه كل ده


يقولك علشان المسلمين كخة ووحشين مش بيحبونا وبيكرهونا يشوفوا المسيحى كأنهم شافوا العمى


طيب دول المسلمين الوحشين وانتم بقى بتواجهوا المشاكل ازاى


ها نعمل ايه يعنى ربنا هو اللى بيحمينا


ونعم بالله


وها نفضل على كده يعنى


ايوة طبعا ده الكتاب بيقول فى العالم سيكون لكم ضيق


اممممممممم


طبعا اللى بيقول الكلام ده مش شماس يعنى وكل يوم فى الكنيسة لا ابدا


ده شاب زيى كده بيشوف الكنيسة لما يعدى من قدامها بالصدفة


ارجع لحوارى مع صاحبى اللى بأحاول اخليه مهموم ...


انت عندك بطاقة انتخابية


طبعا ده القسيس ( قصده ابونا ) رفض يعملى محضر الخطوبة الا لما اطلعها


وانتخبت


طبعا


انتخبت مين فى انتخابات مجلس الشعب اللى فاتت


مش فاكر .. بس هو كان واحد بتاع الوطنى


وده كان برنامجه ايه


انا مالى بالكلام الكبير ده ياعم مهموم


انا قصدى المرشح قال ها يعمل ايه بعد ما ينجح


يعمل اللى يعملوا احنا مالنا


امال انتخبتوا ليه


اصل انا سألت مالقتش حد مسيحى مرشح نفسه وقالولى ان الكنيسة بتقول رشحوا بتاع الوطنى


انت تعرف المكرونة بتتزرع فى الصيف ولا الشتاء


ومال زراعة المكرونة باللى احنا بنتكلم فيه


مالهاش بس لما محصول المكرونة يطلع ها نفهم يعنى ايه قيمة صوتنا الانتخابى ومين المستحق لأخذه


_______________


طبعا حوار هايف


ولكن ديه حقيقتنا وده مفهوم الشعب القبطى عن الانتخابات والبطاقة الانتخابية


البطاقة الانتخابية عندنا هى مجاملة لأبونا الكاهن او منظرة علشان الناس تقول علىّ واعى ومثقف


والادهى ان اغلب الاقباط اللى معاهم بطاقة انتخابية معاهم كارنيه عضوية للحزب الوطنى لزوم المنجهة برضه


والاباء الكهنة بيلموا بطايق الرقم القومى بالزكايب لعمل كارنيهات الحزب


ليه يا ابونا


الرد المعروف : علشان يبقى لنا صوت


وكإن صوتنا ها يبقى بلاوزن لو ما اتغطسش فى معمودية الحزب الوطنى


حد يقدر يقوللى عمل لنا ايه الحزب الوطنى على مدار عشرات السنيين وهو المتربع على قلبنا وعلى قلب كراسى مجلس الشعب بالأغلبية الساحقة


للأسف انا مش شايف إلا ذيادة للمشاكل التى يعاني منها القبطى زائد المعاناة المفروضة على كل الشعب المصرى مسيحيين ومسلمين وبهائيين وكل الطوائف


اخيرا لكل شاب وشابة قبطية عايز اقولكم حاجة فى ودانكم وما تقولوش لحد


لو ابونا الكاهن سمح لعيل او عيلة من بتوع الحزب الوطنى اللى بيلفوا على الكنائس يضحكوا عليه ما تمشوش ورا ابونا


افهموا المرشحين اللى نازلين الانتخابات اتجاهاتهم ايه وشايفين الاقباط ازاى وها يعملوا لنا ايه ، بعد كده انتخب او ما تنتخبش .. الاخوان والوطنى مش هما بس اللى بينزلوا الانتخابات اكيد ها تلاقوا ناس كتير تانية بس ما تبصوش من خرم الكوز