|
في ذكري شهداء الكشح
بقلم: أشرف يواقيم
لما تكون غير مسلم عايش
في بلادك بـس على الهامش
أو تسمع عـن شخص مسيحي
قتلوه ويقولوا رصاص طايش
لما الدين كده يصبح ساتر
والناس تتجمل بمظاهر
والأخلاق تتشال في دفاتر
وتدوق طعم الأيام مر
لما تنول درجات في العلم
ولا تعرفش تحقق حلم
يومها بتكويك نار الظلم
وتشعر إنك تحت القهـر
يبقى انت أكيد.... أكيد من مصر
لما قضاتنا حماة العدل
تصدر أحكامهم عن جهل
لما وجود القاضي وعدمه
يبقوا سيان كده صبحت خل
لما الأب يغير دينه
وولاده بيصبحوا كارهينه
ويّا الأم يلاقوا حياتهم
زى كابوس على طول عايشينه
لما يضيع معنى القومية
من أمة وتصبح سخرية
لما بننسى تاريخ أجدادنا
ونهتف لبلادنا العربية
يبقى انت أكيد.... أكيد في مصر
لما تلاقى الأمن في بلدك
من غير أسباب دايما ضدك
نهبوا في أرضك داسوا كرامتك
شوف بقى مين ها يجيب لك حقك
لما الكاهن رمز الدين
فجأة يلاقى نفسه سجين
في قضية وهو ضحيتها
إتقلبت كل الموازين
لما المظلوم فجأة يفكر
يا خد حقه بأيده ويقتل
بعد ما خذله الأمن وقرر
يحمى الجاني ويصبح حر
يبقى انت أكيد.... أكيد في مصر
لما جريمة تكون فردية
وللا إشاعة تهيج دنيا
وتكون نتيجتها المعتادة
سلب وحرق بيوت مسيحية
لما دقون تطلع ع الشاشة
ومفروض تتصالح ببشاشة
والفضائيات تطلع وتغنى
وتورى إن حياتنا بوغاشا
لما مراة قسيس تتهان
أو رهبان على إيد عربان
لما الأسقف يلقى محاضرة
يتهاجم على رأيه الحر
يبقى انت أكيد.... أكيد في مصر
لما تشوف التليفزيون
لاغى عقيدة كام مليون
لما الحق بيصبح كدبة
لا البيت بيتك ولا ها يكون
لما تلاقى الناس كده رخصت
في العبّارة اللي زمان غرقت
وللا حريقة في مجلس مسكت
أو قطر خرج عن قضبان
كل ده كان ولا فيش مسئول
إزاى هاتفهّم في عقول
خدها نصيحة صريحة مريحة
لو أيامك مش ها تطول
يبقى انت أكيد....أكيد في مصر
__________________
طلبت الى الرب فاستجاب لي ومن كل مخاوفي أنقذنى" (مز 34 : 2-4)[SIGPIC][/SIGPIC]
مدونتي كلمة حب
|