[aristotle]

يا عبد المسيح يا خويا
انته عاوز تفهمني ان كل المعتقلين السياسيين من جميع الاطياف مش اسلاميين بس كلهم دخلوا بسبب قضايا جنائية
انا هقولك حاجة انا ملتحي حلو الكلام
انا اول ما التحيت طلبوني امن دولة وسين وجيم وصاد وطاء
تقدر تقولي ليه عشان بردو منظرة قدام الراي العام
كلام عام جدا ومش منطقي
وبعدين سيبك من شكليات دور العبادة والجوامع والكلام ده
احنا بنتكلم على الفساد
على الجوع على البطالة
فرقت معايا ايه اما تعملي جامع وتمنع كنيسة وانته عمال تجيبلي قمح فاسد
ولا القمح الفاسد راح للمسيحيين بس
طوابير العيش
بيقف فيها جرجس ومحمد
ولا محمد بيجيله العيش الفينو للبيت وجرجس بيقف في الطابور
انته بتقول مثلا ان في هجوم من واحد متطرف على كنيسة بيقتله تلاتة اربعة خمسة قول ياعم مية
بتاع العبارة قتل 1000 واحد هتلاقي 99.5 في المية منهم مسلمين بس مش بنقول الحزب الوطني بيضطهد المسلمين
بنقول الحزب الوطني فاسد
اما دبحوا الفراخ بتوع التجار اللي معظمهم ان لم يكن كلهم مسلمين واقرب حاجة مثال ليا هيا خالتي
قولنا الحزب الوطني اجرائاته غير علمه وماشية بالبركة كده ماقولناش بيضطهد المسلمين
اما ايمن نور ولا اي رمز اسلامي بيتحبس ما بنقولش لحزب الوطني مضطهد المسلمين
بنقول الحزب الوطني مضطهد مصر كلها لانه حزب فاسد
اما اكياس الدم الملوثة
اللي بتروح لعروق المسلم والمسيحي وبتلوثه
بنقول الحزب الوطني فاسد
اما نسمع عن الميه اللي بتجيب فشل كلوي
بنقول الحزب الوطني فاسد
عرفت ياعم عبد المسيح
صدقني يا خويا وبقولهالك الحزب الوطني الحاكم لو مصلحته واللي هيخليه في الحكم انه يسحل المسلمين كلهم هيعمل كده ولو مصلحته انه يسحل المسيحيين كلهم هيعمل كده المهم مصلحته وبس
امريكا نفسها ورقة الاقباط دي في ايديها كده بمزاجها وهيا ماشية تبع مصالحها لو عاوزة تضغط على بلد تقعد تصدع دماغنا بالديموقراطية لكن لو بلد ماشية معاها او قول نظام حاكم بيعملها كل اللي هيا عاوزاه تقول زي ما اونكل اوباما قال كل واحد ادرى ببلده وكل بلد وليها ديموقراطيتها اللي تحبها سواء بالطاجن ولا في الفرن
فالعملية براجماتية قايمة على المصلحة لا اكثر فنشوف مصالحنا كشعب مصر ونحط ايدنا في ايد بعض ونسيبنا من كلام مسلم ومسيحي وده مضطهد بس بنسبة اقل وده مضطهد بس اكتر مهو المحصلة اننا كلنا بناخد الطريحة على قفانا والحكومة مبسوطة بكده وخليهم ملهيين في بعض
وشكرا