[kittyy]

المشاركة الأصلية بواسطة h_srm

مافيش مصري بيعرف مصر بجد بيخاف ياباشا.

ماهى للأسف ياأستاذ h مصر دلوقتى مابقيتش مصر اللى احنا نعرفها بجد ، للأسف الفئران والحشرات السامة اللى كانت مستخبية فى الجحور خرجوا وبينشروا سمومهم وفسادهم دلوقتى عينى عينك ومافيش حد بيقولهم انتوا بتعملوا ايه ، للأسف مرة تانية مصر بتاعة 50 سنة ايام ماكان المصرى مصرى بجد وماحدش كان يعرف ديانة اللى قاعد جنبة فى الجامعة او المدرسة او فى الجيش ايه وهى دى السمعة اللى احنا عايشين على اطلالها دلوقتى.

المشاركة الأصلية بواسطة h_srm

ياباشا وهي فين الحكومة المتطرفة؟ قصدك اللي كانت متطرفة لو مصممين تبصوا للمجلس العسكري على انه متطرف لو كان كدة كان وقف جنب مبارك وابادنا زي ليبيا او سوريا او اليمن

فين الحكومة المتطرفة !!!! أااه هو حضرتك علشان مسلم فا بتلبس نضارة سودا قدام الاخبار اللى بتتعلق بأفعال المسلمين فى المسيحيين حالياً فى البلد ، صحيح اللى ايده فى المية مش زى اللى ايده فى النار ، وعلى فكرة هى الحكومة المتطرفة دى مش حكومة بعد الثورة انت فاهم غلط ، الحكومة المتطرفة دى بقالها بتاع 20 سنة كدا بس اكيد حضرتك تسمع عن درجات الألوان اللى بتبتدى من اول الأبيض مروراً بالرمادى وانتهاءاً بالإسود المنيل بنيلة وهو اللى احنا وصلناله حالياً ، المسيحيين بتتهدم كنايسهم وتتحرق علناً كدا ومافيش نفر واحد يوحد الله اتحاكم ولا سمعنا انه اخد عقوبة عادلة وكله بيخلص يااما بالقعدات العرفية والتصالح الاهبل يااما مستشفى الامراض النفسية والعصبية بتزيد واحد يااما بتتحفظ لعدم اثبات الادلة على الفاعل (رغم ان احداث امبابة الأخيرة جابولهم الناس فى الفيديو بالوشوش ومتصورين وهما بيحرقوا الكنيسة من جوة دكة دكة) وبرضه مافيش واحد منهم اتمسك رغم ان الفاعل معروف ، واللى زاد وغطى عليه اللى حاصل فى عين شمس دلوقتى والكنيسة اللى حضرات المسلمين اخواتنا واشقائنا فى الوطن زى ما بتقول حلفوا على المصحف ان كنيسة العذراء والانبا ابرام هناك مش هتتفتح الا على جثثهم وفرشوا الحصير قدام الكنيسة كمان واقاموا الصلاة فى الشارع قدام باب الكنيسة عشان يضمنوا ان ما حدش هيدخل الكنيسة دى ولا هتتفتح ابداً ..

(هتقولى ان اللى عملوا كدا دول مش مسلمين ، هقولك طب والمسلمين بقى المسلمين اللى تقصدهم فين بقى من دا كله ؟ يعنى هى عين شمس مافيهاش مسلمين كويسين زى حضرتك كدا ولا شيوخ محترمين يعملوا خطب فى الميكروفونات يتكلموا مع الناس ويقولولهم كدا عيب والاسلام كويس وجميل وما قالش نعمل كدا فى اخواتنا فى الوطن وسيبوهم يفتحوا الكنيسة بتاعتهم ويصلوا فيها ايه المشكلة وان الرسول وصانا عليهم اقباط مصر دول اللى انتوا مسودين عيشتهم ليل ونهار ؟ ) يااستاذ h احنا تعبنا من الكلام بتاع احنا اخوات ياجماعة وعايشين من زمان مع بعض مسلمين ومسيحيين ومافيش بينا حاجة وحشة وكل دا كلام فض مجالس كدا وخلاص انما الواقع واللى بيحصل حاجة تانية خاااااالص مالهاش علاقة بالصورة اللى انت حاططها قدامك دى كل شوية تبصلها وبتتكلم وكإنك فاقد الوعى بقالك 20 سنة ولسة صاحى انهاردة من النوم وجاى تتكلم عن حاجة ما بقتش موجودة خلااااص الله يرحمها بقى ..

المشاركة الأصلية بواسطة h_srm

ياباشا اختطاف فتيات ده اتهام متبادل وللاسف المفروض الجيش يردع اي حد يتطرف مسلم او مسيحي ويعدمه ووالله هيكون خير لانه هيضمن الامن كل مجرم او مثير فتنة لما هيشوف الاعدام في ميدان هيخاف, التطرف او الفتنة حاولت الحكومة اللي فاتت تزرعها بتفجير كنيسة القديسين اللي طلع اصلا ما حصلتش تحقيقا!! يعني مالوش الا تفسير واحد وهو ارتكبها امن الدولة.
لو كان فيه تطرف في النفوس العادية كان بان ايام الثورة, لكن لان الكل كان مشغول واوساخ النظام والمتطرفين لما ليقوا الثورة انتصرت بفضل الله ثم فضل كل مصري شارك فيها بدأو يلعبوا على الارهاب خطف فتيات ووو ثم لما الموضوع هدأ شوية لعبوا على حبل الفتنة اللي لازم يا مسيحين تكونوا عارفين وكل مصري عارف انها لعبة وعيب نقع في الفخ ده

المفروووووووض .. برافو عليك ما انت حضرتك كويس وبتقول اهو ... والسؤال هنا هو المفروض دا مش بيحصل ليه ؟؟ لما الجيش والحكومة والبوليس دلوقتى بيقفوا يتفرجوا على المطاوى والسكاكين والسنج والناس بتلعب بيهم البخت فى وش بعض ما بيعملوش حاجة ليه وتحس كدا انهم بقوا موجودين دلوقتى لتشجيع اللعبة الحلوة وعلشان يطلعوا فى التصوير مش اكتر ، وان كنت حضرتك بتتكلم عن الحكومة اللى فاتت ما احنا ما قولناش ان الحكومة اللى فاتت دى كانوا ملايكة بس على الأقل كان كل فترة سنة مثلاً اما تحصل حاجة انما دلوقتى حضرتك بقى كل يوم ويمكن فى اليوم مرتين كدا زى كورس الدوا ياكنيسة بتتحرق يا بنت بتتخطف وتانى يوم تتأسلم يا مش عارف سلفيين دخلوا على مسيحيين فى بيوتهم سرقوها وحرقوها بالجاز دا يومياً كدا لدرجة ان دلوقتى بقى اليوم اللى يعدى وما نسمعش فيه خبر من دول احس ان المسلمين عيانين وصحتهم بعافية شوية وبنقلق عليهم والله.

وسورى يعنى اسمحلى حضرتك انت بتقول لو كان تطرف فى النفوس كان بان ايام الثورة !! انا بختلف معاك كلياً فى الجملة دى ، ساعة الثورة كان فيه هدف واحد لكل الناس حتى للأرهابيين والسلفيين نفسهم اللى دلوقتى بيحرقوا فى البلد ساعتها كان التركيز كله على الايقاع بالنظام والحكومة لأفساح الطريق لهم للتوغل بكل شكل ولون فى البلد واثبات حضورهم وتواجدهم والخروج من الكهف اللى كانوا ملمومين فيه زى الفئران فى ظل وجود قانون ، صحيح هو كان قانون عاجز بس اهو اسمة موجود بشكل او بأخر ، غير دلوقتى بقى مابقاش فيه حاجة اسمها قانون اصلاً واللى عاوز حاجة دلوقتى بيروح ياخدها بدراعة زى الغابة لدرجة ان البوليس دلوقتى هو اللى بقى بيخاف من الناس مش العكس .، ولتحقيق الهدف بقى فى انهم يخرجوا من الجحور استخدموا الوسيلة اللى بتبرر الغاية بتاعتهم واللى هى التلاحم والتداخل بين الناس فى فترة الثورة لتحقيق الهدف الأسمى وهو الايقاع بالحكومة والنظام ..

يعنى من الأخر كل شباب الثورة كان هدفهم تحقيق هدف نبيل وجميل والأرهابيين والسلفيين بقى قالوا نلحم مع الناس دى ونوحد الهدف ونركز دلوقتى فى الايقاع بالحكومة وبعدها بقى وبعد ما دا يحصل نبقى نطلع نلعب براحتنا بقى من غير ما حد يطبق على نفسنا بمعنى انه (توحدت الاهداف واختلفت الغايات)

المشاركة الأصلية بواسطة h_srm

ان شاء الله الاحكام تكون رادعة في احداث امبارة والكل هيخاف, مش مبرر ضعف الامن في فترة حالية اننا نطلب حماية دولية ودي معناها دخول بلا خروج واحتلال تحت مظلة الأمن .

يااستاذ h والله حضرتك دمك خفيف بجد مش بهزر احكام ايه اللى هتكون رادعة فى احداث امبابة ؟ طب انا اهو وحضرتك اهو وماحدش فينا هيسافر لكوكب تانى قريب والايام بيننا .. هما دلوقتى شغالين بيقبضوا على الناس وشوية كدا وهيخرجوهم لتضارب الاقاويل واختلاف القصص بين اذا كانوا داخلين بهدف حرق الكنيسة ام بهدف البحث عن اسلحة موجودة داخل الكنيسة واستخراج الفتيات المحتجزات فى سجن الكنيسة فى الخنادق اللى تحت الارض .. يااستاذى العزيز لا تنسى انه ( لا يؤخذ المسلم بدم الكافر ) ودا كان النظام المعمول بيه حتى فى ظل وجود قانون ايام قبل الثورة حضرتك بقى عاوز تقنعنى دلوقتى ان فى ظل عـــــدم وجود قانون نهائى الأن ولا شرطة ولا حكومة هيبقى فيه احكام ورادعة كمان ، والنبى انت قلبك ابيض وزى العسل.

وبعدين الحماية الدولية لا تعنى تدخل عسكرى فى البلاد وإنما الحمايه الدوليه عبارة عن وجود لجنة تقصى حقائق دائمة بمصر.تقوم هذه اللجنه بمراقبة الاوضاع فى مصر .وفى حالة وقوع حدث مثل احداث امبابه مثلا.تقوم اللجنة بمطالبة المسئولين بعقاب المتورطين بهذا الحدث .فاذا لم تفوم الحكومه بذلك تلجا اللجنة للقضاء الدولى ضد المسئولين اللذين لم يتخذوا اجراء تجاة المتورطين.ويتم محاكمة المسئولين بمحاكمات دولية سريعة.ففى حالة احداث امبابة مثلا وزير الداخلية وطنطاوى . فالذى يقول لا للحماية الدولية يحمى مسئولين مجرمين ولا يحمى الدولة لان الحماية الدولية فى مصر ليس كما يصور الاعلام بانها عملية عسكرية غربية (هل تعلم حضرتك ان من ال190 شخص الذين قبض عليهم فى احداث امبابة من بينهم 120 مسيحى اخذوا من بيوتهم وهم لم يفعلوا شيئا ) هل لوا كانت فى مصر الان حماية دوليه كان ممكن يظلم 120 شخص برئ هل كانوا يخطفون كل يوم بنت او زوجه او ام مسيحية هل كانو يستطيعون حرق الكنائس والدوس على مقدساتنا بارجلهم هل يعقل انهم يقتلوا ويغتصبوا ويحرقوا وفى الاخر يقبض علينا؟ هل نجاملهم على حساب ارواحنا ؟ طب مش مهم ارواحنا ...على حساب شرف بناتنا وهدم كنايسنا ؟...

واحب اعرف حضرتك حاجة مهمة جداً وهى ان الحماية الدولية موجودة بالفعل بين المغرب والجزائر وموجودة بين لبنان وأسرائيل وداخل لبنان وموجودة بيننا وبين أسرائيل على الحدود وموجودة فى السودان وموجودة فى البوسنة والهرسك
الحماية الدولية الآن موجودة فى ليبيا ومن طالب بها كانوا أولهم الدول العربية بزعامة عمر موسى
الحماية الدولية موجودة فى كثير من بلدان العالم فهل كل بلدان العالم خائنة وكفرة ؟...

المشاركة الأصلية بواسطة h_srm

لو كل مصري اتصدى للفتنة وكل مصري ركز في شغله بعيد عن الاعتصامات اللي بيتغلغل فيها مشعلي ومثيري الفتن والله هنعدي البر.

لو بقى كل مصرى اتصدى للفتنة زى ما حضرتك بتقول .. انما لو دا زى ما بيقول المثل المصرى حرف شعلقة فى الجو

المشاركة الأصلية بواسطة h_srm

هو ايام مبارك كان الامان على أشده؟
ماكنش فيه اختطاف وسرقة وقتل؟
العيب فينا احنا يا باشا مش من الامن بشكل مباشر, لازم نتكاتف ونعدي الفترة دي على خير وباذن الله هنعديها. ودي مش شعارات بس ده صوت العقل.
امريكا اللي عايزينها تأمن حياتنا, أسال اي شخص عايش في امريكا معدل الجريمة اد ايه؟ اصحابي في امريكا بيتكلموا على بلاد عصابة ولاد شوارع فعلاً.

حضرتك بس احب اصحح لك معلومة .. الحماية الدولية دى لا تساوى امريكا ، ياريت بس حضرتك تقرا اكتر عن قانون الحماية الدولية علشان تعرف ان الحماية الدولية هى كل دول الغرب وكل دول اوربا مجتمعة على قانون معين لحماية الحقوق وموقعين على اتفاقية بالإلتزام بأحكام هذه اللجنة بعد صدورها بناءاً على موقف او حدث معين ينتهك ويخترق حقوق مجموعات معينة من الأفراد داخل مجتمعاتهم ... الناس للأسف مش فاهمين يعنى ايه حماية دولية وفاكرين انها معناها ان امريكا البعبع هيلموا بعضهم ويحشدوا الجيوش وييجوا يخيموا عندنا ...

المشاركة الأصلية بواسطة h_srm

حاجة اخيرة حقوق الانسان ليست الا غطاء بدون ظهر, حقوق الانسان فين من فلسطين والشهداء الفلسطينيين؟ أوباما ال*** خارج امبارح بيقول فلسطين لازم تكون بلد منزوعة السلاح؟ عارف يعني ايه؟
في شرع ومنطق مين ان الاحتلال يبقى معاه السلاح ومايلاقيش مقاومة؟
كلهم اصحاب فكر متطرف ورب الكعبة, وشوف اليابان وهيروشيما وشوف فيتنام وافغانستان والعراق, امريكا فاقدة للشيء فكيف تعطيه؟

ياعم حرام عليك .. حقوق الإنسان فين من فلسطين ؟؟ اومال هو مين اللى بيبعت قوافل العلاج والطعام والغذاء للفلسطينيين ؟ انت فاكر ان العرب بس هما اللى مهتمين بقضية فلسطين ؟؟

بص يااستاذ h رغم انى ليا وجهة نظر تانية فى موضوع فلسطين دا لأنهم ناس خونة اصلاً بيخونوا حتى بعضهم وانا لن انسى انهم ضربوا فى الجيش المصرى على الحدود واستشهد فيها جندى مصرى زى الورد ولن انسى لما طلعوا قالوا ان مصر دولة عميلة لإسرائيل وخاينين بعد ايام من اغلاق المعبر لأن دا سد عليهم سكة تهريب المخدرات والسلاح الى ومن وبين مصر وفلسطين ، ولن انسى زميل فلسطينى كان معانا فى الجامعة وبيتكلم عن العلاقات الجيدة جداً ما بين الفلسطينيين واليهود داخل البلد وانهم بيشتغلوا وبيتاجروا مع بعض عادى وبيتجوزوا كمان من بعض عادى ولا فى دماغهم قضية ولا بتاع واحنا بس اللى سايبين حالنا ومحتالنا ومشاكلنا اللى ممكن تدمر البلد وبنعمل مظاهرات قدام سفارة اسرائيل من اجل قضية فلسطين فى حين ان الأثرياء الفلسطينيين اللى عايشين فى امريكا واوربا عايشين فى البطاطا وبايعين القضية من زماااان بس سيبك من دا كله

افتكر بس اهم حاجة هى ان الحماية الدولية لا = امريكا وياريت نفصل بين امريكا وبين موضوع الحماية الدولية دا علشان ما نقولش لأ كدا على الفاضى وخلاص واحنا مش فاهمين حاجة..

المشاركة الأصلية بواسطة h_srm

تفاؤلوا خاصة انتم يا اخوتنا في الوطن

الله يخليك يابرنس واللهى كلمة اخواتنا فى الوطن دى طالعة من بقك زى السكر بس وحياة الغاليين عندك ممكن تعربها كدا وتفنطها وتقولى بأمارة ايه ؟

يلا اهى ايام وبنقضيها وهتخلص قريب انشاءالله لأن الرب قريب على الأبواب ... واجمل ايتين بحب دايماً افتكرهم دلوقتى هما :

تصمتون ليتكلم الرب ... والرب يدافع عنكم وانتم صامتون

..