|
الأخ يوساب، أولا مرحبا بوجهة نظرك لكن لازم تكون واعى لأن كل فرد فى المنتدى لة وجهة نظر قد تختلف، و الحرية يا عزيزى مش إن إنت تعمل اللى إنت عايزة و تقول اللى إنت عايزة فقط! بل إنك تشوف و تسمع الف واحد يختلفوا معاك، هى دى الحرية. وإذا كنت فاكر إنك هتقنع الجموع بوجهة نظرك فتبقى أمانيك لن تتحقق.
المنتدى هنا فى وجهة نظرى بتاع كله، يعنى فية أقسام سياسية و أقسام دينية إلخ. أنا مش محتاج الفت نظرك لأن مؤسسين المنتدى ليس لهم صفة دينية لكن لهم طموحات سياسية، و لا إن إسم المنتدى هو منتدى "الأقباط" و ما حدش ينكر إن فية أقباط غير مسيحيين و غير أورثوذكسيين.
و ما تنساش إن زى ما إنت بتعتبر الأفكار العلمانية كفر و إلحاد العلمانيين كمان بيعتبروا الأفكار المشابة لما تقولة يمينية رجعية. و ما تنساش برضة حكم الكنيسة فى أوربا فى العصور الوسطى أدى لإية.
كل شئ نسبى يا عزيزى بس يا ريت تتقبل الإختلاف بروح رياضية.
ملحوظة، فية ناس كتير معانا من الأول لكن بس مشاركاتهم مش بنفس الكثافة، صدقنى عدد القراء الصامتين أكبر مما تتخيل.
|