[elmafdy]

اخوتى فى المنتدى

رغم أنى لست طبيبا ولا خبرة لى بالطب , انا مهندس , و عارف من اصحابى الدكاتره انهم لما الطلبه فى كلية الطب لما بيحبوا يتريقوا على طالب زميلهم بيقولوه له يا باشمهندس , المهم انى مش جاى افتى فى الطب , لكن جاى اتكلم عن حاجه انا شفتها و لمستها اكتر من مره , الفكره يا اعزائى اننا اتعودنا ننقل التحذيرات و الاخبار المشابهه لذلك من الاجانب و من النشرات الطبيه الاجنبيه , و هما ناس ارقى مننا بمراحل و بياخدوا بالشبهات زى ما بيقولوا , يعنى لو نتيجة ملايين الابحاث و الدراسات اثبتت خطوره بسيطه من حاجه معينه بيعلنوا كده و يحذروا منه حتى لو نسبة خطورته 1% , انتم اكيد تفتكروا كم الدراسات والتحذيرات اللى اتعملت على الموبيل و خطورته و اضراره سواء على المخ او على القلب او غيره , نفس الكلام على شبكات التقويه الخاصه بالمحمول , و كتير يخرجوا بدراسه عن مثلا الشاى او القهوه او الشيكولاته و تنتهى بتحذير ان نسبة اللى جالهم المرض الفلانى بعد سن السبعين من اللى بياكلوا شيكولاته طلعت اكتر بقيمة 10% من اللى ما بياكلوش شيكولاته , انا فاكر كمان التحذير اللى كان من حوالى 6 او 7 سنين لما حذروا الناس من النظر للشمس وقت الخسوف و الناس عندنا اتفزعوا و ما ودوش عيالهم المدارس و فيه اللى قفل الشبابيك و الابواب كلها , لدرجة ان فيه ناس اجبروا ولادهم يفضلوا مغمضين عينيهم جوه بيوتهم والشبابيك مقفوله من الساعه تلاته ونص لغاية الساعه خمسه اللى هو وقت الخسوف , و طلع الامر فى الاخر أن الاجانب بيحذروا الناس اللى ناويه تراقب الخسوف طول الوقت ان ده ممكن يكون خطر على الشبكيه و لازم يلبسوا نضارات غامقه , و احنا نقلنا و ترجمنا من غير تفكير ولا تفاهم .

المهم ان اللى عاوز اقوله انه جميل جدا ان الاجانب ياخدوا بالاحوط و يحذروا من الحاجات اللى نسبة خطورتها قليله جدا طالما انها وارده و ده طبعا بحثا عن الافضل فى كل مناحى الحياه و بحثا عن حياه اكثر امنا و اطمئنانا و سلاما , لكن احنا هنا عايشين فى مستوى اخر من الحياه , احنا بنشرب ميه لو شرب منها حصان ها يموت فى خلال سنه و بنتنفس هوا , لو ملينا منه كاوتش العربيه , الكاوتش ها يبوظ , و بناكل هرمونات عليها خضار و فاكهه , و بنقربع فى زيت الشلجم اللى بيموت اى مخلوق طبيعى , عاوزين كمان ولا انتوا عارفين اكتر منى .

خلاصة الكلام انه لما نبقى نتنفس هوا نضيف و نشرب ميه صالحه للشرب و ناكل أكل ادمى نبقى ندور على الحاجات اللى خطورتها محدوده دى , خصوصا ان استعمالنا ليها لا يقارن بالماء او الهواء او الغذاء , و على فكره لو اى جهه اجنبيه من اللى بتدرس و تطلع الابحاث دى جت عملت بحث على هوائنا و مائنا و غذائنا , غالبا ها يسجلونا فى موسوعة جينيس على اعتبار اننا من الخوارق .

المفدى

ملاحظه أخيره : اختى العزيزه كريستيان دكتور , من فضلك استعملى حرف الذال لأن استعمال حرف الزين مكانه مؤذى جدا للعين , أنا متأكد انك عارفه ان اسمهم ذلك و هذا و تحذير . . . الى أخره , لكن يبدوا انك مش معتاده على كتابة حرف الذال على الكى بورد , عموما هو جنب رقم واحد على طول .