|
دمي محروق!
الموقف اللي هحكيه ده حصل معايا يوم الجمعة اللي فاتت, انا حبيت اكتبه هنا عشان فعلا من ساعتها وأنا متنرفزة!
كنت ماشية في احد شوارع مصر الجديدة, بالتحديد هو شارع موازي لصلاح سالم, هناك في جامع كبير, مربع كامل بيبص على اربع شوارع أعتقد اسمه جامع السلطان حسن.
المهم ده كان وقت صلاة الجمعة..اول ما قربت ناحية تقاطع الجامع لاحظت ان العربيات راكنة في نص الشارع و ايه بقى الاربع شوارع حوالين الجامع مقفولين.. بعد ما ادركت كده كنت خلاص وصلت لحيطة سد من العربيات قدامي, قلت مش مشكلة ارجع reverse زي ما جيت و اخرج من المربع ده خالص..فوجئت بالعربية اللي ورايا ركنت والست اللي كانت سايقاها نازلة بسلامتها تصلي, اقولها يا مدام عايزة ارجع يقوللي انا داخله اصلي و كلها عشر دقايق..ملحقتش حتى ارد عليا و راحت سايباني و ماشية, طبعا فضلت ازعق في الشارع طلعلي واحد بين الزحمة قلت بس اكيد هيحلها, تصوروا قاللي ايه؟؟!
"بصي يا انسه هي كلها عشر دقايق و مفيش حل غير انك تستني لأن من الاخر كده احنا اغلبية و دي بلدنا"
بأمانة انا سمعت الكلمة دي و حسيت اني يا قاتل يا مقتول بقى.. فضلت ازعق و اهلل في الشارع و ولا كأن في حاجة كل همهم يصلوا, حتى الضابط جيت اتكلم معاه شاورلي من بعيد و قاللي معلش انا داخل الحق الصلاه!!!!
و فعلا استنيت 20 دقيقة لحد ما الغنم شالوا عربياتهم بس ساعتها فعلا عرفت احنا ليه عمرنا ما هنبقى بلد محترمة طول ما في همجية و عشوائية و كله تحت ستار "صلاة الجمعه"
و سلملي على دين السماحة!!!
اسفه طوّلت عليكم بس بجد بجد دمي محروق من ساعتها :(
|
07-03-2009
مواضيع مشابهة
النمط المتطور