انتخبوا ابن الدايرة

انتخبوا ابن الدايرة
تعالوا كده مع بعضينا نتوهم ان فعلا عندنا انتخابات يوم سبعه سبتمبر ، مع ان الشوارع ليس فيها اى شكل من اشكال الدعاية اللهم ما الا يفط من عينة الحاج كلاوى والعاملين معه يؤيدون الحج حسنى مبارك ، وطبعا ربنا يكون فى عون المرشحين فهم عارفين ومتأكدين انهم هيجيبوا صفر كبير ومع هذا دخلوا الامتحان .
لكن لو طولنا شوية فى الحلم ،وبقى لنا فعلا حق على رئيس الجمهوريه تفتكروا نطلب منه ايه ؟
وايه هى الاولويات ؟
انا مثلا عايز مكان ما حدش يشاركنى فيه ، امدد ايدى وما تخبطش فى حد ،
وعايز الاقى مكان ادمى للمرور فى الشارع وعايز نوزع مصادر الدخل القومى بالتمام على كل ابناء الوطن لانى بصراحه كده انا اكتر واحد مظلوم فيكم ، يعنى انا عرفت ان قناة السويس بتدخل تلت دولار لكل مواطن يوميا وانا سايهلكوم تنهبوهم منى لمده عشرين سنة ودول يعملوا ثروة
وبعدين عايز مستشفى اتعالج فيها ، تكون باسعار متهاودة مع امكانياتى فمن المستحيل اننا فى عصر العلم والتقدم وان الناس ما تلاقيش فلوس تصرفها على علاجها
وعايز مدرسه نظيفة لابنى ومدرس عنده دم وضمير مش بيدفعنى سبعمائه جنيه دروس خصوصيه وعند التخرج سيعمل ابنى بمائه جنيه فى الشهر
وعايز رغيف عيش نظيف لان بصراحه كده استغفر الله العظيم شكل العيش تقرف منه الحيوانات وثلاث ارباعه بيترمى فى الزبالة
وعايز شارع نظيف واشارات مرور
وعايز الريس يجبر الناس على التوسع الافقى
وعايز حاجات تانية كتير
انت بقى عايز ايه من الحاكم العسكرى الامريكى بالقاهرة عفوا رئيس الجمهورية

كل مرة بنثبت لنفسنا اننا مخنعين
او ان الناس لا يهمها بلدهم
او انهم عايشين عيشة فللى ومية مية
لكن انا عندى رأى تانى ان ده اسمه
الخوف