حصلك موقف محرج قبل كده؟؟؟؟؟؟

#1 07-09-2003

ياريت كل واحد حصله موقف محرج يحكيلنا عليه و اهو يبقى اسمه من باب التسلية والفكاهة

هابتدى انا عشان نشجع الباقى: امبارح فى نص الليل(اصل الاستحمام فى نص الليل مزاج عندى) قلت اخش اخد دش (بعد انقطاع 10 ايام عن الاستحمام) المهم دخلت خدت دش وبعد ماقعدت اغنى ووجعت دماغ العفاريت التى تسكن الحمام خلصت و خرجت من البانيو عشان اتنشف و اخرج اعيش حياتى ابص يمين ابص شمال
مش لاقى الفوطة اللى هاتنشف بيها يادى الليلة الهباب تعمل ايه يابو الانبريكبلات مفيش قدامى غير تلات خيارات:
1 - يااما اخرج كده يامولاى كما خلقتنى
2 - او البس الهدوم و انا مبلول (بصراحة مابحبش الشعور بالبلل لانه بيفكرنى
بذكريات مشينة ايام الطفولة)
3 - او امسك العصايا من النص و البس اللى يستر المسائل و اخرج بسرعة اجيب الفوطة و ارجع طبعا مش هاينفع انده على حد يجيبهالى لانهم كلهم كانوا نايمين

بعد ماقعدت نص ساعة افكر قلت اغامر ووقع اختيارى على الخيار الاول انى اخرج كده و اجيب الفوطة و ارجع اهم حاجة ان ماحدش يقوم يشرب ولا حاجة و يشوفنى و تبقى فضيحتى بجلاجل و ميكرفونات

المهم بدات التنفيذ بأن فتحت الباب تلاتة سنتىمتر و بصت اتاكد ان مفيش حد صحى و بسرعة لا تصدر الا من سبايدر مان قطعت المسافة من الحمام الى حجرتى فى تلاتة فمتو ثانية حتى ان نملة كانت معدية(حيث ان شقتنا يعمرها جحافل نمل فى فصل الصيف) فى الصالة كتبت بعد كده فى مذكراتها قالت انها افتكرت أن فى طبق يوفو معدى فى سماء الشقة المهم و بعد الاستعانة بمناظير الشعة التحت حمراء للرؤية فى الظلام الدامس وصلت
للدولاب و فتحت الضلفة و طلعت الفوطة و بسرعة لا تصدر الا عن الطائرة الF117A قفلت عائدا الى الحمام و الحمدللة الليلة عدت من غير فضايح ولا حاجة

ياريت ياجماعة ماتتكسفوش و تكتبوا مواقف محرجة حصلتلكم انتم كمان

saker_america · #2 07-09-2003

حلوة اوى يا Unbreakable_81

بس فى حاجة غريبة

انت قعدت نص ساعة تفكر ومنشفتش ازاى انتا استك ولا بلاستك ولا كوتش

#3 07-09-2003

ماهو عشان النص ساعة دى عمال اعطس و انف من امبارح

يادى النيلة البرد رجع بمشاكله

bush · #4 07-09-2003

ياجماعه .. الموقف ده حصل لمؤذن الجامع ياللي قريب من البيت ..

كان وقت صلاة الظهر .. فتح الموذن الميكروفونات وكان عايز يأذن .. ما طلعش صوت ... راح يخبط على الميكروفون .. ويقول اشتغل الله يــلــعــنك .. ومع الخبط اشتغل وسمعت وسمع كل الناس ياللي بالشارع صوت الموذن وهو يشتم الميكروفون ..

#5 08-09-2003

ايه ياجماعة ماحدش حصله موقف محرج قبل كده؟؟؟؟؟؟؟؟

#6 10-09-2003

المواقف المحرجة كتير واكتر موقف محرج انك تحكيها او تجيب سيرتها تانى لكن موقفك دمة خفيف وبيوضح معالم شخصيتك المرحة الذكية كما يوضح معالم الشقه
من حمام كبير بداخلة بانيو ولة باب يفتح على المسطرة بالسنتى
و صالة كبيرة الحجم جدآ تساع من اول النملة لحد الطبق الطاير
وكمان اوضى خاصة بيك لوحدك ليها باب لا يقل عن باب الحمام فى الامكانيات
وكمان دلاب خاص بيك فى الاوضة بتعتك وطبعى فية الى جوار الفوط هدوم
وعجبنى جدا انك لم يفوتك وصف بعض من عينات الهدوم داخل الدولاب ووظائفها الهامة وذلك فى الجزء الخاص بستر نفسك
بجد معلومات جميلة ودمها خفيف غير انها مهمة وضيف لكدا انك بتحب الكرتون وقصص الاطفال ونفسك تكون ذيهم وان كنت ارى انك احسن منهم وادق فلا اعتقد ان ذلك الاسبيدر مان بالكفائة ان يلاحظ نملة فى صالة كبيرة بهذا الحجم اثناء قيامة بعملية انتحارية كالتى قمت بها بل واية كمان سجلت رد فعلها الم اقل لك انك افضل منة ولكنى اعتقد ان عليك القيام بمهمة سرية ربما تقلب وتبقى انتحارية هى الاخرى وهى مهمة البحث عن مكان الفوطة المختفية.

#7 11-09-2003

ياه يامنير ده انت رسمت خريطة تفصيلية للشقة ... متهيألى ده خطر على امنى الشخصى

يااااااااااااه بجد انا اقوى و اسرع من سبايدرمان؟؟؟؟ ميرسىىىىىىىىىىىى اوىىىىىىىى

شكرا ياعم و خلينا نشوفلك مشاركات كتير فى المنتدى

عدد الأعضاء الذي يتصفحون هذا الموضوع : 1 (0 عضو و 1 ضيف)