الموبينيل موبينيل أبونا ومش عايزين يعبرونا

[abomeret]

الموبينيل موبينيل أبونا ومش عايزين يعبرونا

بقلم إسعاد يونس - المصرى اليوم

■ هو انتى ممكن تنشرى شكوى لشخص؟؟.. طبعا لو على حق.. ولو كانوا عشر أشخاص؟؟.. طبعا طبعا.. طب ولو كانوا آلاف بقى؟؟.. كده انت ما تستأذنش.. تؤمر على طول.. تفهمى فى البورصة؟؟.. لا ما افهمش.. مالكيش بها أى علاقة؟؟.. والله يا أستاذ بقعد قدام أى حد بيتكلم عنها زى طور الله فى برسيمه.. ده أنا حتى مش عارفة أصل مثل طور الله فى برسيمه ده جاى منين.. أؤمر.. اسمعى وحاولى تفهمى عشان تنقلى رسالتنا..

■ إحنا شوية ناس من صغار المستثمرين المساهمين فى البورصة.. مين اللى صغار؟؟.. إنتوا؟؟.. شباب صغير يعنى؟؟.. آه.. أول القصيدة كفر.. إحنا ناس عاديين من جميع الأعمار.. مساهمتنا هى اللى صغيرة.. يعنى كل واحد شاريله ألف ألفين عشرتلاف سهم.. مصريين وآمنا بنجاح مؤسسة زى موبينيل.. وقلنا إن مساهماتنا حاتساعد فى عملقة صرح مصرى زى ده.. لكننا كأفراد كل واحد على قده، ومساهمته دى هى تقريبا كل ما يملك.. حلو الكلام؟؟.. فاهمانى؟؟.. آه لحد كده فاهمة، والنبى ما تصعبها بقى..

■ إحنا.. صغار المساهمين دول نتعد بالآلاف.. لحد كده كويس؟؟.. نشكل كام بقى من ملكية موبينيل دى كلها؟؟.. تلاتين فى المية.. يعنى إحنا نملك تلاتين فى المية من كل الشركة دى.. وفيه شوية مساهمين كمان يملكوا خمستاشر فى المية من موبينيل عن طريق ملكيتهم لأسهم فى أوراسكوم تليكوم.. يعنى كلنا على بعض كده نعدى الخمسة وأربعين.. سهل لحد كده؟؟.. سهل.. زاررة عينيا شوية ومشغلة الحسّابة.. لكن سهل..

■ لما ساهمنا فى الشركة دى كنا مبهورين بشخصية المهندس نجيب ساويرس.. الصراحة ولازلنا.. توسمنا خير واتعلقنا كلنا ف رقبته.. راجل عصامى شاطر جاى من عيلة محترمة ليها مجهودات فى بناء الاستثمار فى مصر.. وحتى اسمهم بييجى فى مجلة فوربز العالمية.. بقولك إيه.. أنا ماشية معاك حتة حتة.. ماتكلكعهاش بقى بأسامى أجنبية..

■ طب ما علينا.. المهم يعنى إيمانا منا بهذا الراجل كل واحد طلّع التحويشة واتكلنا على الله واشترينا.. قلنا حانشارك بقى الراجل اللى يملك موبينيل وصاحبها من بابها.. من باب يعنى جاور السعيد تسعد.. والواحد يقعد عالقهوة يقول قدام أقرانه أنا والمهندس نجيب كده.. صباعين لزق ف بعض.. ويمكن روحين فى زكيبة..

■ والراجل نشيط وذكى ومشهور عالميا.. وله مواقف كويسة على المستوى الوطنى والشعبى.. وبيقول إنه طول الوقت مدفوع بمصلحة المصريين والاقتصاد المصرى.. ولو إنه فى الفترة الأخيرة دخل فى الغميق قوى وبيكوّن حزب وبيدلى بآراء وبيكوّن تحالفات وبرضه عداوات وحاجات كده.. وكل ده مبنى على شهرته بإنه صاحب موبينيل الأوحد..

■ ابتديت أزهق.. قوم حصل إيه يا حضرة؟؟.. قوم راح هو وقع عقد بين أوراسكوم تليكوم المالكة لحصة فى موبينيل واللى هو يملك فى الحصة دى خمسين فى المية.. وبين فرانس تليكوم.. ومن تلات شهور أصبح هو ذات نفسه لا يملك فى أوراسكوم دى حاجة لأنه باع نصيبه فيها لشركة روسى.. لحد كده فاهمة؟؟.. بصعوبة بس فاهمة.. العقد ده مش ممثل فيه صغار المساهمين دول.. يعنى إحنا مش ظاهرين فيه ولا لينا صفة مع فرانس تليكوم دى.. مع إننا ملاك.. مش دى القضية برضه.. القضية بقى إن المهندس نجيب واخداه العزة والجلالة.. السهم بتاعه فى مصر واقع وجايب تسعين جنيه.. أنا مثلا شارى السهم بمية وتلاتين جنيه وهو دلوقتى بتسعين.. أبقى خسران كام؟؟.. أربعين جنيه فى السهم الواحد.. وأنا إيه؟؟.. صغار مساهمين.. يعنى فى الأيام السودة اللى بنمر فيها دى والغلا والكوا والضنك اللى إحنا فيه.. مكوى فى القرشين اللى حيلتى..

■ طب فين المشكلة؟؟.. المشكلة إن الراجل ده معروض عليه يبيع السهم بميتين جنيه.. مش راضى.. المفاجأة بقى.. هو يملك كام فى الشركة اللى رايح جاى يقول إنها شركته؟؟.. خمستاشر فى المية فقط.. وكمان ما بيديرهاش..

■ لأ لحد كده ووقف عندك.. إنت هاتهيس بقى؟؟.. أنا بقالى ستاشر سبعتاشر سنة أعرف إن الراجل صاحب الشركة.. يعنى كل الهلمة دى ومش محصل الربع حتى؟؟.. أيوه.. إحنا نملك ضعفين نصيبه.. ومع ذلك سايبنا فى الطل..

■ طب المطلوب إيه؟؟.. مطلوب يفعّل المنطق وينقذنا من الخسارة والإفلاس.. مش جزاتنا إننا وقفنا جنب الشركة.. إحنا لينا حق عليه برضه.. لو باع بميتين النهاردة.. مش حاينقذ آلاف المساهمين دول؟؟.. وحتى لو متمسك بالشركة قوى ومش عايز يمارس الحق ده.. يشترى هو مننا مادام مُصِرّ.. أو يحول الحق ده لينا من خلال الشركة نفسها.. من حقنا نقف على رجلينا ونعيد ضخ الفلوس العطلانة دى فى السوق تانى.. أو على الأقل ما نخسرش الجلد والسقط.. وللا هو الموت لازم يلحقه خراب ديار؟؟؟؟؟؟؟؟؟؟؟؟؟

■ خلصت الشكوى.. وأنا فهمت وبلغت.. اللهم فاشهد..

■ اللى جاية دى بقى أنا مش فاهماها.. يعنى إيه حد يتبوأ منصب مهم فى البلد ويبقى عنده ازدواج فى الجنسية؟؟.. إزاى يعنى حد يأسس حزب وهو أمريكانى مثلا؟؟.. وللا يرشح نفسه فى مجلس الشعب أو الشورى وهو طوليانى؟؟.. هو مش فى أمريكا شرط الرياسة إن الشخص من دول يكون من أب وأم أمريكية وكمان مولود فى أمريكا؟؟.. رغم إن دى بلد طبق سلطة.. ماحدش فيها أمريكى على أبوه إلا الهنود الحمر.. يعنى هل ممكن واحد من دول يوصل للرئاسة فيبقى عندنا رئيس جمهورية معاه باسبور كندى؟؟.. فلما يعوزوا حاجة فى كندا يندهوله يقوم بواجبه هناك.. والله ما فاهمة بجد..

■ المدرسين اللى سكتوا سكتوا وقاموا يضربوا فى أول يوم دراسة.. حدش خد باله طول التمن شهور الأخيرة من كتاب العربى بتاع سنة أولى يا بهوات؟؟.. حدش لاحظ إن فى الصفحة الأولى مكتوب إن رئيس جمهوريتنا يبقى الأستاذ حسنى مبارك؟؟.. حاتضللوا العيال كده من أول يوم دراسة؟؟.. والنبى مش مكسوفين من نفسكوا؟؟؟؟؟؟؟؟؟؟؟

zahqanin@gmail.com

[اناالقبطى]

دى لعبة جديدة على ساويرس ولا ايه كل ده علشان عمل حزب ولا دى اوامر الباب العالى فى الرياض