لحظة حب وود وإخاء ورحمة ونظرة للمستقبل

[FiberOptics]

انا اي نعم عندي امتحان بكرة .. بس يلا ححاول ارد برضه .. عشان بس انبسطت لما ملقتش حد بيستهزا زي ما شوفت في اغلب المواضيع هنا ..

الصديق موسى : انت كتبت

ولماذا الصدمة أخي !
وماذا نفعل نحن فقد صدمنا منكم و بافعال اخوانك المسلمين من اعتداءات علي الكنائس و هدم وحرق و قتل و خطف بنات و اضطهاد في كل مكان في المدرس - العمل - التعيين - حتي وسائل المواصلات وجدنا هناك الاضطهاد فلماذا لم تصدم من ذلك ايضا .
لماذا لم تصدم ونحن في عام 2006 ولا نستطيع بناء دورة مياة بكنيسة الا بتصريح من معالي الرئيس . لماذا لم تصدم و قد كثر المتخلفين عقليا يهددون الكنيسة و المصلين الأمنين العزل من السلاح . لماذا لم تصدم و الدولة تعامل المسيحيين بالكبت الاعلامي .
احكم بنفسك هل هناك مساواه بين القبطي و المسلم في مصر .

انا معاك ان كل الي بتقول عليه ده صدمات بس هل الصدمات دي حنصلحها ونحلها بالصدمات الي انا شوفتها وقصدي عليها هنا .. احنا مش المفروض دلوقت على النت .. هل انا جيت وسبيت او شتمت هنا هل جيت انا هديت المنتدى مثلا .. عشان الاقي مواضيع وردود بعيدة كل البعد عن البناء والإصلاح
انا معاك ان الي بيحصل في شوارعنا المصرية هو صدمة ومهزلة .. ولكن اريد ان انوه الى نقطة هامة ارجو ان لا تحاول ان تتجاهلها ..
الأخطاء الموجودة انا كمان كمسلم بعاني منها ومستاء منها .. فمش معنى انها موجودة اننا كمسلمين راضيين بها ومقتنعين بها .. كما قلت هناك جزء من الشعب المصري بشقيه المسلم والقبطي غير راضي عن ما يحصل واصحاب السطلة هم السبب مش عشان لانهم مسلمين الافعال السيئة لا ترتبط بدين صديقي .. الافعال السيئة حاجة موجودة كل البشر .. واحنا كبشر عاقل وواعي لازم نواجهها هي ..

انا على فكرة بشتغل في مجال الكمبيوتر واول شركة اتعلمت فيها وفهمت فيها كان شركة لناس أقباط بحبهم ومتاكد من انهم بيحبوني وبنعيد على بعض لحد دلوقت وبزورهم ومينا صديقي كان شغال معايا برضه ووالله انا مش بفتعل أكاذيب عشان اقنعكم بصداقات حقيقة ليا بس انا بحاول اقول ان مش بالاستهزاء او السخرية حنقدر نحل مشاكل مجتمعنا كله بيعاني منها احنا كلنا في مركب واحد يا نغرق كلنا يا نعيش كلنا .. ومستحيل حندي فرصة لمجموعة تقتل الباقي على حساب فرض رأيها او تنفيذ إرهابها الفكري

انت كتبت

وماذا يقول الاسلام في الكتاب المقدس الذي توصفونه بالتحريف ان مجرد الدفاع عن الكتاب المقدس هو هدم للعقيدة الاسلامية . اخي لا تحزن فهذه حقيقة مؤكدة ولابد من الاعتراف بها انتم تدعون علينا مثل هذا و من حقنا الدفاع فلا تعتبر ذلك اهانة والا اعتبرنا ادعائك اهانة موجه لعقيدتنا .

انا زي ما قلت غير مطلع وغير مثقف دينيا بطريقة تسمح لي بان افتي او اقول افترا بس الي اعرفه اننا بنؤمن بالديانة المسيحية وبنؤمن بالمسيح عليه السلام اما اذا كان هناك تحريف عندكم فهذه شيء تعالجونه انتم بنفسكم وانا مليش اي دخل في اني اقول محرف او لا .. مش من حقي يعني اقول كده .. وانا مش بقول كده دلوقت انا بس بخلي ذمتي من الي انت بتقوله لاني مش بقول كده كمسلم مش بقول ان الانجيل


انت كتبت

اخي انت كما أعلمتنا انك جديد بمنتدانا فمن اين لك ان هناك كلام لهو وعبث ان الكلام الذي تدعي عليه بذلك موثق بالكتب و الادلة المادية الاسلامية فحدد اللهو و العبث من فضلك و لا يكون كلامك عائما .

انا تصفحت المنتدى .. وفيه ناس كتير بتفضل تضحك خلال المواضيع في امور لا تدعو الى الضحك ابدا .. انا ده الي شوفته .. وانا مش جديد على المنتديات يعني بقالي سنين مقضيها بكتب في منتديات ومش شايف اي داعي للضحك والسخرية من أمور نحن كمسلمين وأقباط المفروض منضحكش فيها واحنا بنتكلم عليها بالمرة ومفيش داعي اجيبلك وصلات عشان تشوف انت اتصفح وشوف ولو عجزت انا رؤية ذلك .. انا حجبلك وصلات تشوف بنفسك .. ده غير ان فيه اهانات ناس كتير بتقولها عن الرسول الكريم محمد وعن معتقداتنا احنا كمسلمين
والدفاع عن دين او عقيدة او فكر .. لا اعتقد انه بيكون بتفنيد الرأي الاخر والفكر الاخر .. يعني الدفاع لا يحتاج لهجوم لأثبات الحقائق


انت كتبت

قصة جميلة فعلا وماذا فعل صديقك مينا بعد حرق كنيسة العصافرة لسه بيضحك علي خيبته . المتعصبين والاغبياء المسلمين هم اللذين يعرفون امور دينك ودنياك وانت اعترفت انك غير مطلع كليتا علي امور دينك اذن فلست متعصب فهل سياتي يوم لك لتطلع علي امور دينك و تقرأ سورة التوبة آية 29 لتتعلم امور دينك السمح .

قرأت الاية يا صديقي الاية لا يوجد فيها اي تعدي على الديانة القبطية او المسيحية الاية تفيد او تحثنا في رايي على مقاتلة من لا يؤمن بالله وانتم تؤمنون بالله وايضا تحثنا على مقاتلة الذين لا يؤمنون باليوم الاخر ( يوم القيامة يعني ) وانتم تؤمنون باليوم الاخر
وعايز اقولك برضه على حاجة حاول تقرا الاية السابقة لهذه الاية فالايه الي بتقول عليها نزلت في سياق احداث تاريخية اقرا الاية السابقة لها وانت حتفهم قصدي ايه تحديدا

انت كتبت

استاذي الفاضل هات لي مسيحي ارهابي .. هات لي مسيحي حرق مسجد .. او قتل شخصا داخل المسجد .. هات لي مسيحي يضطهد مسلم . لن تجد . أتعرف لماذا لأن ايماننا ليس كذلك بل ايماننا محبة الآخر بل محبة الاعداء فهل ايمانك مثل ايماننا .

صديقي اجبلك ازاي مسيحي بيعمل كده .. عارف ليه مقدرش اجبلك عشان مش حينفع يبقى مسيحي ويعمل كده مش حقول عليه انا قبطي او مسلم .. حقول عليه متخلف او غبي الي يعمل كده

انت كتبت

صدقني انا نفسي كل مصر تعيش في سلام ومحبة و اخوية لكن أتضمن ان الحكومة المصرية تعطي حق الاقباط لهم مستقبلا و تلغي الخط الهمايوني . اتضمن ان لا يظهر متخلف مسلم آخر و يقتل شيخا مسنا وهو يقول فداك ابي وامي يا رسول الله .
اخي فلنتكلم بالعقل و القلب معا و ليس بالقلب فقط فالقلب لغة احادية لا تنتظر منها سوي الكلام فقط بدون فعل
فماذا فعلت انت بعد احداث الاسكندرية وبحسب كلامك انك اسكندراني .

وانا كمان نفسي مصر وكل الشعوب العربية تعييش في سلام وأمن وحرية ومساواة
ولكن مش مش حيحصل طول ما احنا بنتقاتل على النت .. يعني على الاقل احنا دلوقت على النت عشان على الاقل نتفاهم ونتكلم بلاش نحل مشاكل على الاقل نعزز حبنا لبعض ولـ وطنا مصر ..
المسلم الي حيقتل دون ده مش مسلم يا صديقي .. متقولش عليه مسلم ..
المفروض ان فيه قضاء هو الي يحكم دلوقت .. ومفيش اي حق لاي حد انه يحلل دماء انسان ويقتله
وعايز اقول كمان ان يوم الي حصل في الكنيسة في محرم بك صديقي مينا كان مستاء من الي حصل من اخوانا المسيحيين في الكنيسة ( المسرحية ) ( وهي مش موضعنا دلوقت ) وانا كنت مستاء من الرد الفعل الغير عاقل من الي قامو بتهديد الكنيسة يعني اانا وصديقي كان مش عاجبنا الطرفين واحنا مقعدناش نضحك طول الوقت اتكلمنا شوية عن الي حصل وبعدين هو قالي وهو بيضحك متيجي توصلني يا ابني لحد البيت انا خايف حد يطلعلي بسيف ولا حاجة .. قلتله متخفش ابقى رنلي وضحكنا وكل واحد روح على بيته

الصديق موسى في النهاية :انا بعرض عليك صداقتي .. كمسلم وقبطي واتمنى ابقى اشوفلك مواضيع تحث على الحب والإخاء والحرية والمساواة زي ما كلنا عارفين ان سيدنا المسيح عليه السليم كان بيدعو وزي ما سيدنا محمد كان دايما برضه بيقول ويدعو الناس كلها لذلك

وححاول ارد على باقي الاصدقاء ان شاء الله