شعر حسني مبارك .. اهداء الى شعب مصر

[nabilms]

الشعر ده وصلنى اليوم وعجبنى قوى وحبيت ابسطكم معايا مش عارف المفروض نضحك منه والا نبكى على حالنا وما وصلنا اليه !!!!
ربنا موجود

شعر حسني مبارك .. اهداء الى شعب مصر



ياشعبي حبيبي ياروحي يابيبي ياحاطك في جيبي يابن الحلال


ياشعبي ياشاطر ياجابر خواطر ياساكن مقابر وصابر وعال


ياواكل سمومك يابايع هدومك ياحامل همومك وشايل جبال


ياشعبي اللي نايم وسارح وهايم وفي الفقر عايم وحاله ده حال


احبك محشش مفرفش مطنش ودايخ مدروخ واخر انسطال


احبك مكبر دماغك مخدر ممشي امورك كده باتكال


واحب اللي ينصب واحب اللي يكدب واحب اللي ينهب ويسرق تلال


واحب اللي شايف وعارف وخايف وبالع لسانه وكاتم ماقال


واحب اللي قافل عيونه المغفل واحب البهايم واحب البغال


واحب اللي راضي واحب اللي فاضي واحب اللي عايز يربي العيال


واحب اللي يائس واحب اللي بائس واحب اللي محبط وشايف محال


واحبك تسافر وتبعد تهاجر وتبعت فلوسك دولار او ريال


واحبك تطبل تهلل تهبل عشان مطش كوره وفيلم ومقال


واحبك تأيد تعضض تمجد توافق تنافق وتلحس نعال


تحضر نشادر تجمع كوادر تلمع تقمع تظبط مجال


لكن لو تفكر تخطط تقرر تشغلي مخك وتفتح جدال


وتبدأ تشاكل وتعمل مشاكل وتنكش مسائل وتسأل سؤال


وعايز تنور وعايز تطور وتعمللي روحك مفرد رجال


ساعتها حجيبك لايمكن اسيبك وراح تبقى عبره وتصبح مثال


حبهدل جنابك واذل اللي جابك وحيكون عذابك ده فوق الاحتمال


وامرمط سعادتك واهزأ سيادتك واخلي كرامتك في حالة هزال


وتلبس قضيه وتصبح رزيه وباقي حياتك تعيش في انعزال


حتقبل ححبك حترفض حلبك حتطلع حتنزل حجيبلك جمااااال

.

[sweeper]

صدقني ده قليل من الكثير الموجود بالبلد
بس انا مشعارف افسر ليه احنا من ايام الفراعنه مغلوب علي امرنا و كتيرنا نكتب كام بيت شعر مثل الفلاح الفصيح

[mena-gerges]

حقيقى أبيات جميله ومعبره عن حالنا الذى لايسر عدو ولا حبيب .. وتسلم يد اللى كتبها .. فإنه فعلا من المأساة تخرج الملهاة .. يعنى بالبلدى هم يضحك وهم يبكى .