مظاهرات الغضب رسائل لم يفهمها النظام والحكومة

[abomeret]

ليا وجهه نظر خاصة ..
اولا الاخوان وحلفائهم اول من سيستفيدوا من المظاهرات والدليل صورهم فى المظاهرات وهتافاتهم .
ثانيا انا ضد المظاهرات الغوغائية .
ثالثا كان على الدولة ان تستوعب درس تونس .. طبعا ماعندهاش مصباح علاء الدين لتحقيق كل المطلوب .. ولكن بحس سياسى كان يمكن ان تحل الجزء الاكبر والاهم من المطالب :
* حل الحكومة وابوطويلة نظيف اللى مش حاسس بينا خالص ويطلع يستفزنا بقولة ان الشعب مرتاح وغنى ودليلة الخايب الموبايلات بقت مع الجميع وعدد السيارات الجديدة التى يتم ترخيصها .. مايعرفش ان اغلبها التاكسيات البيضاء ام قسط والباقى الملاكى بأقساط تقصم الوسط مايقدرش عليها الا ذو المرتبات العالية او الأغنياء اللى البيت الواحد فية 4 و 5 سيارات جديدة والذين لايشعروا بالشعب ابدا .
* حل مجلس الشعب اللى نجح بالتزوير ومافهوش معارضة خالص .. معقول دة .. ويوجد 200 حكم قضائى بالتزوير فى 200 دائرة .. يبقى الباقى كام .
* تغيير المادة 76 من الدستور الذى يعطى الفرصة لمبارك للرئاسة مدى الحياة وبدون منافسة فعلية من مرشحين مستقلين أقوياء ولهم شعبية .
* تعيين نائب لرئيس الجمهورية فورا .
* إجراء انتخابات جديدة بنظام القائمة النسبية علشان نبعد عن العصبية والقبلية وشراء الاصوات وتمثيل لجميع فئات المجتمع .. أقباط - نساء - مستقليين - وفديين - تجمع - جميع فئات المجتمع .
* إلغاء نسبة ال50% عمال وفلاحين .. حيث لاتمثل اطلاقا لا عمال ولا فلاحين .. تصوروا لواء شرطة سابق (باشا باشا ) وكان نائب مدير أمن .. ينزل فى دائرة العجوزة بصفة فلاح ( فلاح ياعالم ) وطبعا نجح .
جميع الطلبات السابقة ممكن إقرارها بسلطة رئيس الجمهورية وفورا .
اما الطلبات الأخرى من بطالة وغلاء ومرتبات .. فستحل تلقائيا بوجود حكومية شعبية تنظر للمواطن بعين الاحترام والأدمية .
أخيرا .. اقول ربنا يستر .. وكلنا نصلى .